‫ ‏زيت القهوه ‫لعلاج الترهل علامات التمدد”التفزير”

مسائكم مبروك وعدوكم مهلوك بنوتاتي ومداماتي فلذات تشبدي

حبيبات قلبي البوست هذا مهم جداً جداً ضروري تقروه ب تركيز تام لان المشكله هادي اصبحت هاجس لمعظم النساء زي ما وعدت بعض عضواتي انه انزلهم بوست مفيد ومجرب ونتائجه حلوه لعلاج الترهل او التفزير بالجسم،،

186

  • عزيزاتي السيلوليت يعني ترهل الجسم شبيه بقشرة البرتقاله من الخارج هذا ليه عدة اسباب من ضمنها انه كان وزنك زايد ولما ضعفتي بدون رياضه سببلك ترهل ف جسمك هذا علاش ديما انقول لو تبو فعلاً تنزلو ف الوزن وجسمكم يقعد مشدود ضروري رياضه مع نظام اكل صحي ضروري لا محال اما الاسترتش مارك يعني التفزير او علامات تمدد الجسم الي تجي بسبب الحمل او زيادة الوزن او ضعف يعني تبدي ما بين السمن والضعف وزنك مش ثابت يصيرلك التفزير ف الجسم؛؛
  • عرفنا الاسباب توا بنقول طرق حمايه وتخلصنا من المشاكل هادي:ـ
  1. بدون نقاش شرب الميه ضروري يومياً ما يقل ع 8اكواب يعني من 2/4لتر تشربي ميه ضروري وغصباً عنك كان تبي تحافظي ع بشره نظره ولون موحد وجسم صحي وطبعاً الرياضه يا بنات ضروري منها حتي لو اديري نص ساعه رقص ف دارك مفيد جداً للجسم ؛؛
  2. تاني شي عليكم بالقهوه يا جميلاتي القهوه هادي سرها بااااتع فعلاً ف توحيد لون البشره التخلص من التفزير ومن ترهل الجسم خلوها ع طول معاكم ف البيت وتكون سر من اسرار جمال بشرتك لان القهوه تحتوي ع كافيين وطبعاً الكافيين معروف مضاد للاكسد ويحارب الذرات الحره وتعني المواد المضره لخلايا الجسم وخلايا البشره الي تسرع ف الشيخوخه والتجاعيد المبكره ف مضاده الاكسده الموجوده ف الكافيين تحمي الجسم من هاذي الذرات الحره ويساعد ف تفعيل مضادات الاكسده الموجوده ف الجسم خاصةً فيتامين ف تحمي الجسم والبشرت بشكل اكبر؛؛
  • انجو لزيت القهوه الساحر العجيب ممتاز للبشره للتصبغات وللارهاق تحت العين للتفزير للترهل للتقصف الشعر بتاع كلو هالزيت ممتاز؛؛
    ـ طريقة تجهزيه زي ما تشوفو ف الصوره عباره عن قهوه عربيه + زيت زيتون المقادير 4 كواشيك كبار قهوه مع 8 كواشيك كبار زيت زيتون وتسخنيهم ع النار ف طاوه اقعدو حركو ع نار هاديه نص ساعه لين يطلع معاك الزيت وطبعاً تقدرو تقللو المقدار بس انا هكي درته هادي الطريقه الساخنه وفي حالة تبي تصفي الزيت عادي صفيه بشاش او قطنه خودي الزيت صافي بس الحثاله ما تلوحيهاش خليها واحتفظي بيها للتقشير؛؛
    ـ الطريقه البارده تاخدي طاسه وسط قهوه عربيه + طاسه كبيره زيت زيتون تخلطيهم مع بعض وتحطيهم ف فازو وصكري عليهم وكل يوم رجي الفازو مع المكونات لمدة شهر؛؛ وانتم اختارو الي يريحكم !
  • زي ما تشوفو ف الصور ف ادوات مساج الترهل لازم منهم يا بنات لو فعلاً تبو تهتمو المساج او كسر الدهون والترهل ف الجسم ضروري تاخدو واحده في اليدويه يعني بدون كهرباء زي الاداة الورديه ف النص الناس الي مقيمه برا تلقو زيها عند ماركة اتش اند ام في جهة الإكسسوارات ؛؛
  • اما الادوات الكهربائيه لمساج الترهل متوفرات ف كل الصيدليات ع جميع الاشكال في الي احجام كبيره لمتوسطه لصغيره اختارو الي يناسبكم؛؛
  • طريقة استخدام زيت القهوه هو تدهني منطقة الترهل او التفزير وتلفي المنطقه ب السيلوفان الشفاف بعدين تاخدي اداة المساج سواء كهربائيه او يدويه اديري مساج للمنطقه بحركه دائريه لمدة نص ساعه وتخلي الزيت ع جسمك لمدة ساعه واغسلي بعدها عادي يومياً تستمري نفس الطريقه بآذن الله خلال شهر تشوفي نتيجه ترضيك ومع الاستمرار اكثر ح تشوفي نتائج احلا و احلا،،
  • اما بالنسبه لتقشير با القهوه ضروري يكون مره ف الاسبوع تاخدي قهوه عربيه+سكر+زيت زيتون المقدار كاشيك كبير من كل حاجه وخلطيهم كويس لو تبيها سائله وتنفرد ع جسمك بسهوله تزيدي معاها شامبو امتاع جسمك وطبعاً قشري جسمك بحركه دائريه خفيفه 10دقايق واغسلي عادي لو تبو اديروها لوجهكم مافيش مشكله مره ف الاسبوع تقشري وجهك بحركه دائريه خفيفه 10دقايق واغسلي؛؛ *اما بالنسبه للترطيب ننصحكم ب لوشن ماركة بالمرز للتفزيرات بعد الحمل وشد الجسم اللوشن هذا مشكور هلبا وينصحو بيه دكاترة جلديه وع فكره مش غالي لان بالمرز ماركة رخيصه ومتوفره ف كل الصيدليات اكيد طريقه هو تدهني كل جسمك قبل النوم وتركزي ع اماكن الترهل والتفزير اكثر وهكذا تستمري عليه لين تشوفي نتائج حلوه بآذن الله؛؛ 

بوست دسم نوعاً ما بس مفيد اتمني انكم تستفيدو بالمنشور دومتم متآلقات و ك العاده اووووهبكم اموووواه….

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Animated Social Media Icons by Acurax Responsive Web Designing Company
error: Content is protected !!