صباحكم ورد وزها خاطر بنوتاتي مداماتي الحلوات؛؛
حبيباتي بوست سريع ع لمعة البرونز احنا في الصيف وهذا وقت استخدام البرونز؛؛
- الي ف الصوره من افضل انواع استخدمتهم للمعة البرونز للوجه او للجسم او للشعر رووووعه لمعتهم قويه وثابته وتعطيك شكل سباركل حلو انا درتلكم سواتش ع ايدي باش اتشوفو نتيجتهم ع البشره واكيد الكريم موس اللمعه امتاعها اقوي واثقل ؛؛
- بالنسبه للموس البرونز الي اول واحد ف الصوره ملمسه ناعم اسفنجي لان موس بسرعه ينشف اول ما تدهني بيه ريحته حلوه لمعته قويه نفس ع ايدي بالزبط انا خديته من المهندسين محل 1.2.3 ش جزيرة العرب والمحل هذا حبيبي هههههه فيه كل شي وفيه دكتور متخصص ف تاتو وتركيب الخرصات الي مقيمين ف مصر ح تفيدهم المعلومه سعره حوالي 60 دينار مصري تقريباً 15 ليبي سعره مناسب ونتيجته حلوووووه؛؛
- اما بالنسبه لزيت نوكس الماركة هادي فرنسيه معروفه طبيعيه ب الاعشاب كل كريماتها وزيوتها مصنعه طبيعياً نفس ماركة بودي شوب موجوده حتي ف ليبيا الصيدليات الكبيره وحتي ف تونس موجوده انا خديته من العزبي وهو زيت للشعر وللوجه وللجسم ريحته تجنن ولمعته حلوه يعني لما تدهني منه جسمك يعطيك لمعه صحيه تجنن خاصةً لما تدهني رجليك يبانوا كآنك لابسه شخشير لحمي وخفيف ما يتلصق ولا يدهن بسرعه يتلاشا وريحته رهييييييبه عجيبه معاش نذكر سعره لان خديته مع مجموعة حاجات بس ننصحكم بيه ف الصيف وللمناسبات حلو ع الاخر؛؛
- طبعاً جربت برونز من كدا منها ماركة اتش&ام و بودي شوب وكدا ماركة اه وفي لمعه عند انقلوت اسمها سباركل ب40 دينار لمعتها خرااااافيه للوجه وللجسم حلوه ع الاخر جربتها خاصة للجسم فظيعه بسرعه تتوزع بالفرشه خاصةً العرايس الي يبو لمعه قويه للجسم ع الڤيلو ننصحكم بيها هي تعطي لمعه للجسم رهيبه بس ما تغطي العيوب لو عندك تصبغات ولا تحاولي ابداً ابداً تغطي تصبغات بكريم اساس ولا ب باودر ما تسمعوا كلام المزينه راهو المنظر بشع بكل ما تعنيه الكلمه ح تطلعي كآنك غاطسه ف قردل دقيق ويقلب اللون ع رمادي ردو بالكم اوكي ديري لمعه بس بدون اساس وللبز الزايد الي يقعد طبقات طبقات مخططه خاصةً الرقبه شكل مقزز ومش حلو وكلهم ح يقرموك ف العرس خودي الكلام مني انا سلمي بنتي انتي واياها لان لون البشره الي انخلقنا بيه مافيش ولا كريمة اساس ولا باودر تغير لون البشره بتاتاً بالعكس لما تحاولي تفتحي لون بشرتك ب الاساس ح يقلب ع رصاصي مجير كآنه يبان اتقول ليك سنين ما درتي دوش؛؛
وبس حبيبات قلبي اتمني الافاده للجميع دومتم متآلقات وكا العاده اوووهبكم….
