مسائكم ورد وفل بنوتاتي ومداماتي

حبيباتي بوست اليوم ح يكون ع حقن التبيض الي كدا سؤال يجيني عليهم من العضوات وللاسف الشديد ف بعض الصفحات الليبيه تروج ليهم وحتي بعض دكاترة لليبين ينصحو بيهم ويقولوا مافيهم اي تآثير سلبي ع البشره ولا ع الصحه بنقوللهم اتقوا الله ف انفسكم عيب عليكم تنصحوا وتكذبو ع البنات لان في ناس ماعندهم درايه ب الموضوع ولما تسمع كلام من دكتوره تقول مافيهم ضرر تمشي اديريهم ولآمس بس كانت عضوه معاي بدير كارثة ف روحها لانها سمعت دكتوره ليبيه عندها صفحه ع الفيس اتقول مافيهم ضرر بس ستر ربي سئلتني والحمدللله اثبتلها ب الصور وكلام طبي موثق وبعد ما شافت الصور البشعه حولت الفكره من بالها نهائياً فلهذا اي صفحه كانت او اي دكتوره تنصح بيهم اعتبروها دكتوره فاشله وماعندها ضمير انا ع طول انقوللكم يا عالم اي كريم او حبوب او حقن تبيض فيهم اخطار ماليها اول ولا اخر تآثر ع بشرتك وع صحتك وبتقرير اليوم من دكتور تجميل بشره (شمس الدين) ومعتمد التقرير من منظمة الفدراليه الامريكيه للدواء والغداء؛؛ 

• بالنسبه للحقن التبيض وهي الماده الفعاله الي فيها من الجلوتاثيون Glutayhinone الماده هادي موجوده ف اجسامنا خلقها فينا ربي بكميه اقل من الموجوده ف حقن التبيض وهي وظيفة الماده هادي ف اجسامنا كمضاد للاكسده؛؛
• الاستخدام الطبي فقط المرخص له عالمياً لهذه الحقن بنسبه ومقدار معين هي لحالات مرضي (السرطان) لتقليل العلاج الكيميائي الي ياخدو فيه مرضي الكانسر بمقدار محدد ومرخص طبياً واللهم اشفي كل مرضانا؛؛ 
• اما من ناحية استخدامها لتفتيح البشره تعطي الحقن هادي بجرعات عاليه جداً جداً لتقليل من نشاط الخلايا الي تعطي للجلد لون البشره؛؛ 
• الكارثه في هالجرعات العاليه الي بياخدها جلدك وغير آمنه ولا مرخص بيها طبياً ع مستوي عالم وبنعطيكم الكوارث الي بتسببها هالحقن ف المستقبل:-
  ـ  قصور ف الكلي وتوصل للفشل الكلوي.
  ـ كسل في وظائف الغده الي تسبب تساقط الشعر وتولي صلعه.
  ـ حساسيه بالجلد توصل للتسلخات الجلديه والتسلخات هادي تغطي الجسم كله تؤدي للوفاة ح نحط الصوره ف التعليقات لان منظر بشع مانبيش نحطها صورة البوست لان معانا حوامل خفت عليهم من المنظر مش كويس ليهم واي حامل ماتراجع التعليقات وتشوف الصوره ولكن نبي الصوره يشوفها الي مهوسين ب التبيض ويسئلوا فيا ليل ونهار عليهم يرايت تشوفوا الصوره باش تحولوا الفكره من بالكم نهائياً وصورة المريض هادي صارت ف الفليبين لان فكرة حقن التبيض وصلت للوطن العربي من شرق آسيا المهووووووسين بتبيض بشرتهم خاصةً الفلبيين وطبعاً توفت منهم هلبا من النساء نتيجة حقن التبيض فاآلزمت وزارة الصحه الفليبينيه تحذيرات شديده ضد حقن التبيض وتم منعهم من الفليبين.
• في نقاط مهمه ضروري تعرفوها انه لون جلدكم محدد من جيناتكم وتآثير كريمات التفتيح والتبيض المؤقت الي تاخد فيها ضروري تستمري طول عمرك تستعملهم والا تنقلب النتيجه عكسيه سلبيه بشعه ب النسبه الي تبي ادير الحقن كل ما زدولها الجرعه كل ما سببلها اعراض الخطر الجانبيه الي قلتها واصلاً مافيش ولا دراسه طبيه موثقه تنصح بحقن التبيض؛؛
• الحقن هادي غير مرخص بيها ف امريكا ولا دول الخليج ولا مرخصه من منظمة FDA،،
• بالنسبه الي يسئلوا فيا كريم فوكس لتبيض الايدين الي مصور عليها قرد اكرمكم الله هادي بنقوللكم مش كويسه وفيها مخاطر ماليها اول ولا اخر وفي بنوته معاي والدها دكتور جلديه علقت مره ف واحد من التعليقات والدها قاللها الكريم تسبب الكانسر يحفظكم ربي ومع هذا مية الف ترليون مره انقول مش كويسه فلهذا الصفحات الي تجيب وتبيع فيها لغرض كسب المال اتقوا الله ف انفسكم وفي هالشعب الغلبان الي كل مره اتجارو فيه بشي جديد يكون مضر وخطر عليهم راهو في رب بيحاسبكم ع قرش الحرام وخاصةً الي كان تبيعي فيه بيضر غيرك؛؛
• اخيراً انا اعطيتكم تقرير طبي موثق يعني ما نبيش واحده تناقشني واتقولي لا ما ادير ضرر تبي اديريهم ما تسئلني لان اجابتي ف البوست موثقه طبياً ع مستوي عالم واالاهم انك تبي تهلكي روحك انتي حره ف نفسك بس مش حره انك اضري غيرك وتحليلي اديريهم لان ذنبها ح يقعد ف رقبتك قدام ربي وانا ضد كل حقن حبوب كريمات تبيض ومستحيل نعطيكم اي منتج ولا ننصح بكريمات التبيض فلهذا حبيباتي يرايت معاش تسئلوني ع كريمات مبيضه لان ضدهم تماماً انا انسانه مؤمنه ب خلق الله سبحانه اي كان الشكل او لون البشره بعيداً عن العنصريه وهوس تغير شكل الخالق لمقايس جماليه غبيه وخرافيه وضد كل عمليات وحقن التجميل ب المجمل مهما كانت جودتهم وصناعتهم لان احنا شني قدام الخالق ولا شي ف نهاية بشر مهما تطورنا من طب او احدث تقنيات التجميل لاشي قدام الذي خلقه فسوي فلهذا ننصح كل بنوته او مدام تهتم بشكلها وتحافظ ع بشرتها الي عطاه لينا الخالق وترضي ب الشكل الي انخلقت بيه لان ربي كل انسان عاطيه ميزه ونعمه يتميز بيها عن غيره؛؛
• ترجمة الكلام الي ف الصوره وانا المقوله هادي معاها 100% هي (أبدع الخالق سبحانه وتعالي في خلقنا ع ستة ألوان مختلفه ولكن نتساوي في الروح بلون واحده)

(اللهم اني بلغت اللهم أشهد) 

وبس حبيبات قلبي بوست شامل ع حقن التبيض واثارها أتمنى الإفادة للجميع ……….