مسائكم ورد بنوتاتي ومداماتي الطرفونات

حبيباتي بوست اليوم ح نعلمكم مكياج او ااااسهل طريقه للسموكي ايز بدون تكلف ولا كثرت ظلال مكياج قوي للعيون بس ناعم ف نفس الوقت مش باكو الوان،،

1. أول شي رطبت وجهي عادي بمرطب ڤيشي اكواليا ممممتاز جداً وترطيبه خفيف لانه اساسه مائي،، توا نبدو في الخطوات:
2. استعمالي للوك هذا هو في 10 خطوات بسيطه،،
3. حطيت بيز للعين لان نبي للون قوي البيز وظيفته يوحد لون الجفن ويتبث الظل اكثر ما يخليش الجفن يخطط ويسهل عليك دمج الظل فوق العين انا استخدمت بيز من ماركة انقلوت رهيب رهيب شبيه بيز ماك سوفت اوكر بس ارخص ف السعر؛؛
4. حطيت ظل اسود من ماركة انقلوت ع الجفن المتحرك لون قوي هلبا وفيه لمعه خفيفه السر ف دمج الظل كويس لان اسود يبي الدمج كويس كويس حطيت ع الجفن المتحرك فقط وقعدت ندمج ف الظل كويس كويس؛؛
5. حطيت ظل لون بني غامق من نيكس مطفي بدون لمعه ع كسرة الجفن ودمجت دمجت كويس ع كسرة العين و زاوية العين زدت شوية ظل اسود طبطبه ،،
6. حطيت بصبعي ظل ذهبي من نيكس ع نص بؤبؤ العين حاجه بسيطه طبطبه بصبعي فوق الظل الاسود وبعدين دمجت كل الظلال بفرشة نظيفه باش يبان اللوك انظف؛؛
7. رسمت عيني ف الاول ب لكود ايلاينر يعني الايلاينر السائل فرشته رقيقه من برجوا بعدين زدت فوقه لوكد ايلاينر من اتش اند ام رهيب رهيب ثباته عالي واسود فاحم ومطفي مافيش لمعه؛؛
   ـ كحلت عيني من داخل بقلم انقلوت رقم واحد سواده فااحم وثابت ومن تحت الرموش السفليه ظللت بالبني والاسود نبي اللوك قوي ورسمة فوقه ب لكود ايلاينر من اتش اند ام ،،
   ـ الي عينها صغيره ما تكحلش ب الاسود تكحل بلون بيج نود داخل العين باش تعطيها وسعة العين اافضل وتحته ظلل ب ايشادو لونه بني مطفي؛؛
   ـ حطيت مسكرة للرموش من برجوا بدون تركيب رموش اللوك ناقص رموش لو تبيه اقوي ركبو رموش افضل بس لان انا مانحبهمش ندير ف مسكرة فقط ورموشي ع الطبيعه احلا من الصوره؛؛
8. مشطت حواجبي وحطيت عليهم شويه كونسيلر طبطبه ع شعر الحاجب كله وبعده مشطه دمجته لان نبي نفتح لون الحاجب وحطيت مسكرة حواجب من كركتر لونها تشكلط فاتح ررررررهيبه ننصحكم بيها خديتها من محل اليمامه ب15 دينار وبعدها مشطت الحاجب كله باش ندمج كل شي الي حطيته؛؛
9. بعد كملت عيوني حطيت كونسيلر من كريولاين السداسي رقم واحد اول شي حطيت لون بيج من العجله امتاع الكونسيلر بعدين درت الاضاءه لون بانانا من نفس العجله دمجته كويس وثبتت الكونسيلر ب باودر الاضاءه من انقلوت لونها اصفر تنور العين اكثر؛؛
10. حطيت هايلايتر الي هي اللمعه من انقلوت اسمها سباركل رقم واحد ع تفاحة الخد والي عندها مسام تحط للمعه ع عظمة الخد حاجه بسيطه لان الاضاءه تبين عيوب البشره لو بشرتك فيها عيوب ما تكثري منها وبعدين حطيت شويه ع دمعة العين ودمجتها لفوق باش تعطي لمعه للظل ودرت شويه تحت عظمة الحاجب باش يعطي اضاءه اكثر للعين،،
11. ودرت احمر خدود لونه ورد نود من انقلوت و رسمة شفايفي بقلم ماركة لليلا لونه نود يعني لحمي وبعدين حطيت روج من ماركة اتش اند ام لونه نود لحمي وحطيت قلوس ف نص الشفايف من ماركة فلومار لمعته ع الفضي رررهيبه لمعته؛؛
    

• ملاحظة تقدرو تغيرو لون الروج مع احمر الخدود عادي انا درت لون لحمي باش نهدي للوك لون العيون قوي بس لو تبوه اقوي تقدرو اديرو روج احمر عادي يقوي للوك اكثر ولو تبوه اقوي تركبو رموش وطبعاً الي تحط ف اساس عادي انا لان ما نستعملش ف اساس ولا باودر فلهذا ما تتقيدو بالخطوات ولا بالماركات اهم شي لون العيون لو عجبكم تقدرو اديروه بكل بساطه،،
• ملاحظه تانيه تقدرو تخففو من اللون ع كسرة العين بس انا ثقلت للوك لان نبي درماتك اكثر وحاد ف العيون،،

وبس حبيبات قلبي اتمني الافاده للجميع  اوووهبكم اموووواه…..