تحذيرات لتفادي التحسس بعد ازالة الشعر من الوجه

مساؤ ورد ف بنوتاتي ومداماتي الحلوات

حبيباتي بوست ع تحذيرات الي نتفادوها باش نحمو وجهنا من تحسس بعد ازالة الشعر؛؛ 

195

  • اول حاجه خلي بنفهمكم انه مية مليون مره انقوللكم الشمعه والسير ممنوع اديروه لوجهكم مانعاً باتاً ماتناقشني ولا واحده ف الموضوع ارجوكم لانه كلام من دكاترة وخبراء تجميل انه الشمعه او السير بعد فتره من استعمالهم تسبب الكلف وتصبغات للوجه فلهذا احذرو منها وب النسبه للحلوه حتي هي للوجه مش كويسه ترهل البشره وتكثر فيها التجاعيد فلهذا حتي هي امنعوها للوجه لانها مش كويسه بتاتاً ولا ينصحوا بيها دكاترة تجميل بشره؛؛ 
  • انسب واصح وافضل شي تحولي بيه شعر وجهك هي الفتله فقط انسب شي للوجه بدون ماتسبب اضرار للبشره وصحيه بتقولولي تكثر الشعر بنقولولكم هاذي معتقدات خاطئه تماماً لان كثرت الشعره او غلظها ماليها علاقه ابداً بآي وسيلة تحولي بيها شعر الوجه لانه هادي مسآلة هرموووونات سواء حولتي بالشمعه او حلوه او فتله ماليهم اي علاقه بكثرة الشعر وابسط مثال انا شخصياً لان طبيعتي مش مشعاره وشعرة وجهي وجسمي خفيفه خفيفه جداً وتطلع بعد وقت مع اني نحول ف شعر وجهي بماكينة براون ويعطل مايطلع بسرعه الشعر نحول فيه مره واحده ف الشهر لان طبيعتي من الاول شعرتي خفيفه؛؛ 
  • به بنقوللكم كم مره المفروض تحولو شعر وجهكم ف الشهر لو كنتي اديري ف حلوه او شمعه مره واحده ف الشهر لو كنتي تحولي ب الفتله مرتين ف الشهر لو بتزيدي اكثر من هكي بتحولي شعر وجهك كل اسبوع اعتبري بشرتك ادمرت ب الكامل ومش كويس نهائياً ليها ديما اذكرو كل مازاد الشي عن حده انقلب ضد ف افضل الامور اوسطها؛؛
  • طبعاً اكيد بعد ماتحولي شعر من الوجه يولي تحسس ومتفرفر وملمسه خشن وهلبا يشكولي الحقينا ياجود درنا حلوه و وجهنا قعد حالة العدو بنقوللكم حل سحري للمشكله هادي بس ارجوكم ارجوكم تفهموا كلامي كويس وتتبعوه حرفياً ما تخلوني نندم اني قلتلكم لان مانبيش نتحمل مسؤولية ح نقوللكم ع حل هالقصه الحزينه وحلها بمرهم اسمه (دريموڤيت) شكله نفس الي ف الصوره هذا المرهم علاج سحري للتهيجات البشره بعد الحلوه او الفتله او الشمعه لان كرتيزون لاحظو قلت كلمة (كرتيزون) يعني تستعمليه بطريقه صحيحه والا ح يدمر بشرتك فلهذا ارجوكم تفهموا الاستعمال كويس هذ المرهم بعد ماتحولي شعر وجهك تروحي للبيت تغسلي وجهك بمية مصقعه وتمرري ثلجة ع كل الوجه لان الثلج يهدي البشره بعدين لما بترقدي ف لليل طبعاً تدهني طبقه خفيفه ورقيقه جداً من المرهم هذا لما تنوضي الصبح تمسحيه بقطنه وتغسلي وجهك عادي مش ح تلقي ولا حبه ولا اي تحسس ولا اي تهيج ولاشي زي السحر وطبعاً يستعمل فقط فقط فقط بعد الحلوه مباشرة من مره واحده لمرتين يعني ف نوع من البشرات تستحق تدهن مره تانيه باش يختفي التحسس ب الكامل و ماتزيدو تدهنو اكثر من مرتين ردو بالكم مية مره ما يخدعك مفعولها ولا يغرك نتائجها الرهيبه السريعه لان لو استمريتي عليها بدون استشارة دكتور او لعلاج معين اعتبري وجهك وبشرتك ادمرت ب الكامل وح تقلب عليك بنتيجه سوده نوده وتحرق بشرتك حرق فلهذا ارجوووووكم بناتي ومداماتي نستعملوها بعد الحلوه فقط من مره لمرتين كحد اقصي اكثر من هكي ممنوع مانعاً باتاً ومش ح نتحمل اي مسؤولية لسوء استعمالكم فلهذا تبعو كلامي حرفياً وبإذن الله مشكلة تحسس بعد الحلوه او شمعه او فتله ح تنسوها وتحولوها من بالكم نهائياً؛؛
  • ونبي انبه كل البنات او المدامات من كريمات ازالة الشعر بجميع ماركتها واشكالها والوانها مش كويسه نهائياً ما تفكرو تستعملوها لازالة شعر الجسم او الوجه تسبب تحسس وتهيج واسوداد شديد للبشره فلهذا ممنوع تستعملوها مش كويسه نهائياً مهما كانت ماركتها؛؛ 
  • حاجه اخيره اليوم الي بديري حلوه او شمعه او فتله لوجهك ردي بالك تفكري تحطي مكياج ع وجهك ف نفس اليوم كان هذا اعتبري وجهك ادمر لما تحولي شعر وجهك تقعمزي ف البيت حتي الشمس ردي بالك تتعرضيلها لان ح يسببلك كلف وتصبغات للبشره يعني لو عندك مناسبه حولي شعر الوجه قبلها ب3ايام ماتجي ف نفس الوقت وكله تبي اديريه مع بعض تولي سلاطة شرموله فلهذا ردو بالكم يوم تحولو الشعر قعمزي وهني روحك ف البيت  
  • ف حالة مش مقتنعين ب الفتله وماتبوش تسمعوا كلامي لو تبو اديرو شمعه ارفعو شمعتكم معاكم ما تستعملوها من المزين لانها اغلب المزينات يكررو فيها ويستعملوا فيها 100مره فلهذا تاخدو شمعه من محل مكياج وترفعوها معاكم ف كل مره تبو اديرو شمعه لوجهكم ونفس الكلام ينطبق ع الحلوه ع الاقل تضمني حاجه انظيفه ع عينك لانك استعمالها المكرر من وجه لوجه يزيد البكتيريا والحب والبلاء كله بس ردو بالكم تجي واحده بعدين تشكلي من حرقة شمعه ولا من كلف ليا تصرف تاني معاكم ايوا انا نبهتكم وانتم احرار ؛؛

وبس حبيباتي اتمني الافاده للجميع دومتم بود اووووهبكم امووواه ….

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Plugin for Social Media by Acurax Wordpress Design Studio
error: Content is protected !!