بشره تلمع [ستروبنق لوك]

معرض الصور
2 صور
بشره تلمع [ستروبنق لوك]
37

بشره تلمع [ستروبنق لوك]
184

صباحكم طيب يا اغلا الناس عندي بنوتاتي ومداماتي استحشتكم هلبا هلبات
ـ الصوره بدون افيكت ولا فوتوشوب وحطيتلكم بفلاش وبدون فلاش ـ

37حبيباتي بوست اليوم ح يعجبكم وانعلمكم تكنيك جديد بطريقتي واسلوبي المعتاد والي كله طلبوا مني اخر صورة بروفايلي قالولي شني مستعمله لوجهك باش يلمع هكي نفس صورة البوست وهي انا شخصياً ح نقوللكم السر باش اتنفذوه ع انفسكم بكل سهوله ولا جميل حد

  • التكنيك الي طلع من شهرين تقريباً بعد صيحة الكونتور ونحت الوجه طاحت موضته وطلع بعده تكنيك كل الارتست ف العالم نفذوه وهو اسمه [ستروبنق لوك] يعني بشره تلمع ومتوهجه نفس صورة البوست انا عن نفسي انفذ فيه للوك هذا قبل ما يعطوه اسم في عالم المكياج لان بطبيعتي انحب البشره الي تلمع وتكون فرش وكآنه لمعه بلاستيكيه زي البمبله انا من عشاق للوك هذا ومن كاررررهي الكونتور ابداً ما اقتنعت بيه ولا ح نقتنع ومستحيل انفذه ع نفسي بتاتاً انا نحب تفاصيل وجهي وما نحبش نغير فيها لانها ما تحتاج مع هذا ممكن انفذه ع غيره لو طلب مني هكي بكل سهوله بس ع نفسي مستحيل؛؛
  • التكنيك هذا يعتمد ع الهايلايتر الي هي لمعه فقط بدون كونتور يعني بتحطي إضاءه فقط وللعلم للوك هذا يبي بشره صافيه بدون تصبغات ولا أثر لان الاضاءه ح تبين كل عيوب البشره لو فيها عيوب ولكن ما تخافوش اصحاب البشره الي فيها مشاكل عندكم حلول مش ح نحرمكم من شي؛؛؛
  • به انا شني مستعمله في الصوره هادي ع فكره انا ما نحبش نكثر كدا حاجه ف المكياج بالعكس نعتمد ع البساطه ف كل شي وانا مش من عشاق الايشادو ما نحبش انحط ظلال فوق عيني بكثره لان نرسم ف عيني ثقيله شويه يعني بالنسبه لشخصي هذا اثقل لوك عندي ف مناسبه اكثر من هكي مستحيل ممكن اخف بس اثقل لا الصوره هادي كانت السبت الي فات عندي مناسبه والتصوير بعد ما روحت من مناسبتي وشوفو المكياج ثاااااابت ف مكانه ما تحركش بتاتاً ولا صلحت فيه بتاتاً من لما مكيجت وطلعت من البيت لين روحت ف مكانه حتي الروج ما عدلته والصوره بدون اي تعديل ولا فوتوشوب الفرق بينهم واحده بفلاش والتانيه بدون فلاش؛؛ 
  1. بدايةً رطبت وجهي بكريم مرطب من ڤيشي اسمه اكواليا يجنن ترطيبه حلو رطبت وجهي معاد منطقة الانف والجبهه يعني حرف T لان ف الصيف انا تزيت شويه منطقه تي زون رطبتها ب متحكم للمعان من ڤيشي ممتاز جداً يتحكم ف زيوت البشره تقدرو اتقولو زي البيز،،
  2. بعدين السر هنا في بشره تلمع وصحيه هو بخاخ الانتعاش ومتحكم لزيوت البشره من أنقلوت رهيب رهيب نفس نظام فكس بلس من ماك غير هذا سعره ارخص من ماك حوالي 20-15 دينار بس رهيب يا بنات ننصحكم بيه هو كيف جايبنه توا للمحل فيه نوعين للبشره الدهنيه والمختلطه لونه اخضر وللبشره الحساسه والعاديه والجافه لونه وردي انا واخده الاخضر بخيت منه رشتين فوق المرطب وخديت ورقه نمروح بيها ع وجهي باش جف اعطاني بشره نظره ومنتعشه رهيب ننصحكم بيه؛؛
  3. بعدين جيت للعيون رطبت بمرطب ڤيشي اكواليا للعيون خليته 5دقايق وبنبدا ف مكياج عيوني حطيت بيز من انقلوت رهيب يا بنات يثبت الظل وما يخليه مخطط ويوضح الوان الظل نفس بيز ماك اوكر بالزبط غير ارخص سعره تقريباً 14 دينار ننصحكم بيه حتي الي ما تحط ف ظل زي حالتي ينفعها يوحد لون الجفن وما يخليش بعد فتره يخطط الجفن طبعاً تحطوه بطريقة الطبطبه وبسرعه لانه يجف فلهذا يبي ايد خفيفه؛؛ 
  4. درت لون الظل ع كسرة العين لون مشماشي خفيف يقولوله اللون المتحول باش يعطي احاء اكبر للعين ولا مرات اندير بفرشة احمر انمشيها ع كسرت العين زي ما قلتلكم الظل مش مهم عندي،،
  5.  رسمة عيني بجل ايلاينر انقلوت77 وطبعاً فووووق الروعه سواده فاحم وثاااابت جداً بعدين كحلت عيني بقلم انقلوت كحل رقمه 1 وثبته اكثر بظل اسود باش ما يسيح ولا ينزل واساساً هو ضد الميه ننصحكم بيه هلبا وحطيت مسكرة من بورجوا بدون تركيب رموش لان ما نحبهمش والحق الرموش مظلومات لان ف الصوره مش واضحات ع الطبيعه احلا بهلبا ؛؛
  6. درت كوركتر مصحح للهالات لونه اورنج من كريولاين وبعدين حطيت فوقه كونسيلر كريولاين السداسي رقمي انا 1 وطبطبت ب اسفنجة بيوتي بلندر وبعدين ثبته ب باودر الاضاءه من انقلوت لونها اصفر باش تنور المنطقه الي تحت العين لان عندي هالات بسبب السهور واعصاب المعده والنتيجه زي ما تشوفو مختفيات الهالات تماماً؛؛
  7. بعدين طبطبت وجهي كامل ب باودر من ماركة اتش اند ام مش موجوده ف ليبيا وهي شفافه مافيهاش لون للثبيت فقط لان انا ما نستعملش ف باودر بلون قوي ولا نحط ف كريمة اساس بتاتاً الحمدالله بشرتي ما تحتاج؛؛
  8. اهم نقطه هي كيف درت للمعه هادي ف وجهي خديت لمعه كريم من كركتر حطيت منها ع عظمة الخد نزلتها شويه ع تفاحة الخد لان ماعنديش لا مسام ولا حب نقدر نزلها شوي وتعطي احاء خدود مليانه اكثر وحطيتها بطريقة الطبطبه ب اسفنجة بيوتي بلندر بعدين نبي انثبتها اكثر ونبين الاضاءه اقوي درت من لمعة انقلوت الخرافيه اسمها سباركل للوجه وللعيون وللجسم حطيت منها ع عظمة الخد وتحت الحاجب ودمعة العين وارنبة الانف رهيبييييه سعرها 40 دينار ننصحكم بيها وبقوه رقم الي خديته 1؛؛
    ـ الي بشرتها فيها مسام وتصبغات ضروري تحط اساس يكون كفره قوي ننصحكم ب كريولاين ستك الاساس فيه خطير وثابت ويناسب جميع البشرات ويغطي كل التصبغات وللمعه تحطوها فقط فوق عظمة الخد ما تنزلو ع تفاحة الخدود لو عندكم مسام ح تبينها اكثر؛؛ 
  9. حطيت قلوس من فورايفر52 رهييييب وثابت وللعلم هذا من لما حطيته ما عاودت عليه ابداً مع انه كليت وشربت وشوفو اللون ثابت؛؛ 
  10. اخر خطوه بخيت من فكس كريولاين مثبت للمكياج بختين من بعيد باش نضمن كل شي يقعد ثابت ف جو السخون والرطوبه؛؛
  •  ح نحطلكم صورة المنتجات الي استخدمتها ف التعليقات؛؛ 
  • حبيباتي ح نحط لينكات فيديوات لتعليمكم اكثر ع ستروبنق لوك او اكتبوا ف اليوتيوب (STROBING Tutorial)
  • ح يطلعلكم كدا فيديو للميكب ارتست يعلمكم ويشرحلكم اكثر:
    ـ فيديو لميكب ارتست نيكي

  • فيديو لميكب ارتست مايا احمد

  • صفحة وكيل كريولاين اي استفسار ع المكان الاسعار تخش ع الصفحه؛؛
     https://m.facebook.com/profile.php?id=1569833186639350 
  • صفحة وكيل انقلوت اي استفسار ع الاسعار والمكان تخش ع الصفحه؛؛
     https://m.facebook.com/profile.php?id=190585604355884 
  • صفحة وكيل ڤيشي اي استفسار ع الاسعار والاماكن الي تباع فيه خشو ع الصفحه؛؛
     https://m.facebook.com/profile.php?id=335508049813722
  • بوست طويل شويه ولكن بعض عضواتي طلبوا شني امدايره لوجهي وحبيت انفيدهم ما نبخل عليكم بشي اتمني الافاده للجميع دومتم بود وك العاده اووووهبكم اموواه

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Social Media Icons Powered by Acurax Web Design Company
error: Content is protected !!