الرشاقه سر الجمال

مسائو رشاقه وجمال بنوتاتي ومداماتي الحلوات

حبيبات قلبي بوست هذا انطلب مني اكثر من عضوه هو كيف نحافظو ع اجسامنا ونحموها من السمنه ويكون جسم رشيق متناسق ح نقوللكم نظام حلو ونعلمكم خدع تحافظي بيها ع وزنك؛؛

189

  • اول شي بنقوللكم معلومه الي تبي تحافظ ع جسمها لا تستحق تمشي لدكتور ولا اخصائي تغديه ولا تشترك ف نادي وتدفع مبلغ وقدره مع هذا الي عنده استطاع يشترك ف نادي ويستمر مافي مانع بس نبي نفهم الناس الي مدايرين قصه للموضوع نحافظ ع جسمي ضروري نادي واخصائي تغديه الخ الخ هذا دوه فاضيه النت ما خلا حد جاهل ب النسبه للتمارين الرياضيه يعني الجسم والوزن المثالي مش مستحيل؛؛
  • تاني شي لو امدايرين ف بالكم اني بنكتبلكم رجيم لكل يوم ويومه معناها تحلموا حبيباتي لانها من الاساس لاوجود لحاجه اسمها رجيم هادي كلمه اخترعوها العرب لكسب المال اكثر ب النسبه للاخصائين التغديه وغيره فلهذا كلمة رجيم مافيش منها واصلا حتي لو لو فيه مستحيل نقتنع بيها ولكن فيه حاجه اسمها نظام واكل صحي للجسم؛؛
  • ثالث شي والي اهم من الاكل وف المرتبه الاوله لو تبي تحافظي ع جسمك وصحتك وشعرك وبشرتك هي انك تشربي الميه ثم الميه ثم الميه بكثره لان نص جسم الانسان 70% ماء اقل شي تشربو من 2/4لتر يومياً غصباً قهراً عنكم تعودو نفسكم ب اي طريقه كانت لو فعلاً خايفه ع صحتك وشكل جسمك وبشرتك وشعرك؛؛
  • رابع شي الي سئلوني ياجود نبو رجيم كيف انديرو سستم ف اكلنا بنقوللكم حبيبات قلبي كولي الي يعجبك ماتحرمي روحك من حاجه ولا تمشي بكلام الرجيمات العبيطه انا انسمي فيها عبيطه وغبيه والي تبعها مع احترامي ليها بنقوللها وين عقلك عزيزتي قصدي شوفت رجيم من يومين وفي واحده قالت ماشيه بيه هو رجيم تقريباً فيه يوم كامل تاكل خيار ويوم كامل حليب يعني هادي تاكل من الخيار لين تطلعلها شجرة خياره فوق راسها يا بنات ماتمشو ب الرجيمات الي يقولك تنقصي 8 كيلو ف الاسبوع هذا اسمه انتحار وموت بطئ انتي هكي ادمري ف نفسك صحياً وجسدياً وتهلكي ف بشرتك وشعرك وبعدين خلوها قاعده ف بالكم الي نقصتيه من وزنك ب الساهل يرجع ب الساهل يعني نفرض نزلتي ف الاسبوع 10كيلو بعد توقفي عليه ترجعي 30كيلو دبل هادي معلومه طبياً كل ما تنزلي ب الشويه عليك ف الوزن بطريقه صحيحه واكل صحي ورياضه تكسبي افضل صحياً وجسدياً هادي قاعده خلوها ف بالكم؛؛
  • به كيف نقصو الوزن الزايد شني انديرو انقوللكم ع سستم بسيط جداً هو تحافظي ع اكلك يكون صحي وتختاري الوقت الي يكون بطريقه صحيحه يعني اول ماتنوضو من النوم اشربو ميه افضل شي ع الريق لتنظيف سموم الجسم وافطرو عادي طرف كيكه وقهوتك او عصيرك تغدو عادي طبيعي وتعشو عادي بس وين السر انه انديرو حيل اتخلينا ننقصو ف الوزن هي عمرك ما تاكلي لين تشبعي وتعبيها وترقدي هذا غلط يعني لما بتاكلي خودي كميات قليله وديما ع الغداء كولي ف البدايه السلاطه يعني ديري صونية السلاطه بروحك تكون زايده كوليها هي الاول بعدين كملي غداك بس بكميات قليله ماتاكلي لين تشبعي وديما لما تمضغو الاكل امضغو ب المهل عليكم بشويه بشويه الحركه هادي تقلل نسبة الجوع وتشبعك بسرعه وع طول اشربي الميه قبل الغداء بساعه اقل شي زوز طواسي كبار ميه هكي تظمني انه الاكل ح ينهضم بسرعه وبعد الغداء تكوني مجهزه الشاهي الاخضر امتاعك اشربي طويسه خضراء لحرق الدهون تسهيل عملية الهضم اسرع والشاهي الاخضر ب الذات اشربوه بعد الاكل لان لما تاخدو ب استمرار بدون اكل يسبب هبوط وفقر دم هذا الكلام الي بيقتلو روحهم اهم شي يضعفو بعدين لو جوعتي ف العشيات خودي تفاحه او بسكويت مالح تتسلي بيه واشربي الميه راك تنساها به والعشاء ديما تعشو قبل النوم بساعتين وتلغو من قاموسكم حاجه اسمها عشاء دسم يكون فيه معجنات وحلوياات خلو العشاء حاجات خفيفه اصلاً حتي ترقدو مرتاحين أكثر “قلل ف العشاء تربح الهناء” وع طول خلو ف روتينكم وجبة العشاء او بعدها تاكلو زبادي طبيعي اكتيفيا كويس يهضم الاكل ويمسح الدهون والحموضه ويدخل البطن وماتنسوش شرب الميه اهم اوقات تشربي الميه اول ماتنوضي وقبل النوم ع قد ماتقدرو ماتغيبو جهد اشربو يعني حبيباتي عيشو حياتكم الطبيعيه بدون هوس الرجيمات القاتله استمرو ع اكل صحي خففو الزيوت والمعجنات والسكريات والغازات نلغوها نكثرو من اكل الفواكه والخضروات ع قد مانقدرو عمرها ما اضر ب العكس اتزيدك فايده وفيتامين نشربو الحليب ونكثرو من اكل الاجبان والحاجات الي فيها الكاليسوم ولله ح تشوفو كيف ينقص وزنكم تدرجياً بدون ما تحسو ولا تتعبو ؛؛
    وبنتكلم ع نقطه مهمه ع كريمات التخسيس والشد الخ الخ كلها كذب مجرد دعايات زايده وتسبب امراض للجلد لان تحبس الميه مابين الجلد فلهذا ماننصح بيها الي ننصح بيه هو الرياضه ثم الرياضه الجسم الصحي يبي رياضه تبي اضعفي بطنك رجليك وغيره ما فيش اي منتج ولا وصفه طبيعه ح تستني انها اتنزل وزنك بدون تعب يعني رياضه ضروريه للجسم وتلعبي اوزان لتقوية عضلات الجسم لو ماعندكش اوزان تاخدي زوز شيش مشروب لتر وتعبيهم ميه تمرني بيهم هادي اوزان منزليه او حكة الطماطم والزيت حتي هي اوزان تقدري تتمرني بيها تقوي عضلات جسمك خلو الرياضه ف روتين حياتكم اليومي حتي نص ساعه وع فكره حتي لما اضمي الحوش امتاعك فيها رياضه وحركه خاصة لما تنشفي ب ايديك هادي فيها تقويه لعضلات الايدين والرجلين والبطن ولما طبقي البطانيه حتي هذا تمرين لتقوية وشد ترهلات الذرعان كلامي ح يحبوه الامهات ويكرهوه البنات هههههه بجد فيها رياضه وحركه مفيده للجسم حتي الرقص من افضل رياضات لنحت وشد الجسم؛؛
  • بنقوللكم ع عصير مفيد للجسم وللبشره ويحرق دهون بشكل سريع هو عصير لليمون ب النعناع رهيب عجيب خلوه ف روتينكم اليومي اشربو ع قد ماتقدرو انا كان مانشرب منه يومي يطلعلي قرن يومياً امي اديرلي عصير لليمون ب النعناع ترحي ف لليمون ب قشوره مع نعناع فرش ف الخلاط يطلع يجنن انا نشرب فيه بدون سكر بس الي مايقدر يدير كاشيك سكر ولو بضيفو عليه طرفين زنجبيل اخضر ياسلام سلم الزنجبيل حارق خارق للدهون استمرو عليها شهر ومستحيل تندمو وح تشوفو نتائج داخلياً وخارجياً وبشرتكم ح تشع من النضاره؛؛
  • ديما اكلكم يكون متوازن يعني لاملح هلبا ولا سكر هلبا ولا زيت ودهون هلبا لان الملح مش كويس للجسم يسبب ارتفاع الضغط وغيره من الامراض والسكر بكثره يسبب مشااكل ماليها اول ولا اخر منها هشاشة العظام وكثرت الزيوت تسبب الكسترول ف الدم ؛؛
  • بنقوللكم ع حيلة تعلمتها من خلال خدمتي ومخالطتي لمهوسين الاجسام الرشيقه لما تجي تشري ملابس ردي بالك تاخدي اكبر من مقاسك ردي بالك انتي تبي تضعفي ولا تاخدي اكبر تمرني ف روحك ع الوزن الزايد هادي غلطه انشوف ف هلبا يديرو فيها يقولو لا تقعدلي بعدين لا حبيبتي انتي بعدين امدايره ف بالك بتولي فيل ولا كيف خودو ديما ع مقاسكم ب الزبط او اصغر من مقاسك برقم واحد فقط ف ليبيا مانعرف متوفره مقاسات الي تكون اصغر من مقاسك بحاجه بسيطه يعني انا ف حاجات نلبس فيها ميديم ناخد يعني اصغر من مقاسي ب اقل من رقم علاش الحركه هادي باش لما ترجعي تسمني وتزيدي ع وزنك المعتاد والطبيعي تزبطي روحك اتقولي اه ستوب ندير كنترول ونصكر ع الحلويات والنشويات نهائياً لين ترجعي لوزنك وع طول ف البيت البسو الحاجه المضغوظه يعني السراويل الي تكون ليقز لان القفطان يخليك تسمني اكثر وتزيدي بدون ماتحسي فلهذا ردو بالكم؛؛
  • واخيراً ح نحط للينك لصفحة الكوتش صوادق اكيد تعرفوه الصراحه رآئي فيه انه كوتش ممتاز ويعطي بضمير والحلو انه يتكلم ب لغتنا الدراجه يعني مافيش حاجه معقده انا مانعرفها شخصياً ولا اصلاً متابعه معاه السستم بس عندي صديقاتي متابعين معاه التمارين مشاءالله نزلو ف الوزن هلبا بدون مايمشو للنادي بجد انا نحيه ونهنئ ع صفحته ومن الناس الي نشجعها اكثر ع نشر صفحتهم لافادة الجميع لان غير متكلف ولا متعالي ف الاسلوب عكس بعض الصفحات الي تكسر ف الرقبه هذا للينك امتاع صفحته طريقك إلى الحياة الصحية

وبس حبيباتي بوست طويل بس كتبت اهم نصائح ونقاط تتبعوها ف اكلكم يكون صحي وتحافظو ع اجسامكم دومتم بود موزموواتي اووووووووووهبكم امووواه…..

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Floating Social Media Icons by Acurax Wordpress Designers
error: Content is protected !!