حبيباتي بنقوللكم تجربتي مع ماركة انقلوت وبنعلمكم كيف تشرو منها بطريقه سهله وحلوه؛؛
- ماركة انقلوت بعد تجربتي معاها لعدة منتجات نقدر نحكم عليها انها ماركة ممتازه ف معظم منتجاتها واصبحت ف قائمة الماركات المفضله عندي وسعرها حلو مناسب تعتبر من اسعار الماركات الدرق ستور يعني من الماركات الرخيصه واحلا ما في الماركه هادي او الي تتميز عن باقية الماركات الاخري انها تكتب مع كل منتج يصنعوه مكوناتها بالكامل وهذا دليل كبير ع امانة ومصداقية منتجات ماركة انقلوت يعني هي من الماركات القليله الي تكتب ف مكونات ومواد كل منتج يتم تصنعيه بكل امانه والحاجه هادي انا شخصياً تعجبني هلبا لان من نوعي نحب نقرآ ع الماركة قبل ما نستعملها بشرتي وعيوني هي اساس جمالي مستحيل نجازف بيهم هذا قانون ومبدآ ثابت عندي لان انا نعرف كويس كويس انه علاجات البشره تكلف الالاف ومرات بدون اي نتيجه تذكر فلهذا سر الجمال هي اشراقة وصفاء البشره مش لونها خلوها معلومه عندكم ع طول ما تجازفو ب بشرتكم ب اي منتج كان،،
- الميزه التانيه ف الماركه والي نحبها ونفضلها شخصياً لانها تنفعني نسافر هلبا ومن مكان لمكان ع طول نرفع ف كارطون ع قولت ماما هههه عندهم لقطه حلوه وقليله تلقوها ف ماركات تانيه هي “فري دوم سستم” يعني تقدري تختاري المجموعه الي تريحك وتركبي الباليتات الي ع كيفك الباليت يعني علبة او باكو مكياج بمعني تقدري تاخدي باليت وتركبي الوان الظلال ع كيفيك وحسب اختيارك او تقدري اديري باليت ضلال و ارواج وتقدري ادير باليت احمر خدود و اضاءه او كونتور بصدق اللقطه هادي توفر عليكم التخزين ولو تسافرو توفر عليكم الكميه بدل ما ترفعي 3؛/4 باكوات مكياج ترفعي زوز معاك فيهم كل الي تستحقيه ولقطه هادي تلقوها ف ماركة “ميكب فورايفر.ماك.قيق كوزماتك.” وكدا ماركه ممتازه بس غير متوفرات ف ليبيا؛؛
- ثالث ميزه هي التعليب امتاعها من الماركات الي مشتغلين عليها يعني باكوتها شكلهم انيق ومريح وفيهم لقطة المغناطيس تعجبني هلبا و تعتبر من الماركات الي حلوه ف تعليبها وانيقه،، وطبعاً عندهم ميزة “التستر” يعني التجربه تقدري تجربي للون عليك تشوفيه كيف يطلع قبل ما تشريه وفي حالة بتجربو ع وجهكم ارفعو معاكم فرشتكم الخاصه الي بتجربو بيها او اطلبوا من البنات الي يشتغلوا ف المحل يعقمو الفرش او الروج التستر بالتونك قبل ما تجربوه ع بشرتكم انتبهوا للنقطه هادي؛؛
- رابع شي الي الان كل الي شريته رضيت عليه وعجبتني نتيجته معاد حاجه واحده هي الكونسيلر وكريم الاساس سيئ نتمنا يطوروه اكثر ف المستقبل لان يخطط ويقلب رمادي بعد ساعات الباقي كله بيرفكت بيز العيون او الهايلايت سواء كان بلمعه او مطفي او الاقلام روووعه جل ايلاينر الوانه كلها تحفه وثابت احمر الخدود الارواج الظلال كله روووعه وح نزلكم بوست مخصص بالتفصيل اكثر ع كل حاجه؛؛
- خامس نقطه والاهم نعلمكم كيف تشرو حاجتكم وترضو عليها انا من الناس الي ما نحبش ناخد ع كلام صاحب المحل يعني لما نقرر نطلع نشري حاجات نبدا امدايره نقاط معينه ف راسي نخزنها ف الملاحظة عندي ونمشي للمحل نقوله نبي كدا وكداً كيف اندير نخش ع موقع الماركه او الويب سايت امتاعها زي انقلوت ونبدا نخش بالحاجه نشوف ف درجات الالوان والانواع والموديلات ونقرر شني بناخد نخزن عندي الصور والاسماء ونشوف الاسعار نجمعها مع بعض بيش ندير حسابي ونعرف كم نبي ميزانتي والحاجات الي نبيها ونتوكل للمحل طول نخش بدون ما نتعب الي يشتغلوا وندوخهم معاي انا شوفتهم بنات انقلوت بصدق ربي يعاونهم وأحلا مافيهم الابتسامه برافو عليهم انهم يتعاملوا بوجه بشوش وهذا اساس التجاره الناجحه والقبول عند الناس؛؛
ـ وح نحطلكم الويب سايت او موقع ماركة انقلوت شارحين ع كل المنتجات بالدرجات والالوان بكل شي ولله ح تستفيدو منه هلبا لما بتطلعوا تشرو خشو عليه وتفرجو قررو شني بتاخدو وانطلقوا للمحل ع طول
واخيراً ان شاءالله تكون ترجمتي صحيحه لبعض المصطلحات و مش قصة نتفلسف عليكم بالانقلش لكن ولله ف حاجات مانعرفش ترجمتها بالعربي لان متعوده انقولها بالانقلش سامحوني ولكن هادي نقطه تفيدكم تفهموا المعني يعني ماتقولوش جود دير ف الحركات عليكم انتم غواليا وك العاده اووووهبكم هلبا هلبات امووواه
