‫ طريقتي لإزالة شعر الجسم

مساكم ورد بنوتاتي ومداماتي المزموزات،،

البوست هذا مستنينا هلبا عضوات سئلوني شني طريقه الصحيحه لازالة شعر الجسم والمشكله الي تعاني منها النساء سواء شعر الجسم او الوجه انا بنحكي طريقتي وهي الطريقه الصحيحه حتي من دكاترة الجلد بنعطي نبذه سريعه ع ازالة شعر الجسم او الوجه.

196

  • انسب واصح طريقه لازالة شعر الجسم هي الحلاقه بنقول علاش لان هي الوحيده الي ماتضر البشره ولا الجلد او الحل الجذري هو لليزر الي انا شخصياً ما نحباش ولا نفضله اما اكيد الي اغلبيتكم اديرو ف الحلوه بنقولك الحلوه شني ادير مشاكل ماليها حدود وترهل الجلد بشكل رهيب وخاصة للاماكن الحساسه والوجه ممنوع مانعاً باتاً لان مش كويسه وحتي الشمعه مش كويسه نهائياً نهائياً لا للجسم ولا للوجه لان كثرة استعمالها تسبب ازرقاق واسوداد الجسم والكلام هذا مش من راسي من دكتورة تجميل بشره ومعروفه مخاطر الشمعه غير انه حرقتها من الحرقات معاش تتحول واعتبريها علامة ع جسمك ماركة مسجله مهما ما درتي من كريمات غاليه ورخيصه وغير الحساسيه والحبوب والشعر الي يطلع تحت الجلد ومشاكل ماليها اول ولا اخر وكلكم تعانو منها اكيد فلهذا ح نشرح طريقتي ف ازالة الشعر من الجسم والوجه،،
  1.  الصوره الي فيها رقم 1هي عبارة عن جل حلاقه نسائي واحده زي الاسبراي رغوه وهي ب الالوفيرا ب الصبار للبشره الحساسه ومايجففش البشره ب العكس معروف الالوفيرا ف ترطيب اما التاني زي التبيتو هو جل ماركة امريكيه وحتي هو خاص لاماكن البكيني والحساسه بدون ماتتحسس منه البشره
    ـ اما ماكينة الحلاقه الي نحول بيها ف جسمي هي العاديه فينوس ونحب العاديه احسن من بروان مع انه عندي لكن خلاص تعوددت ع ماكينة الحلاقه العاديه بس هي نسائيه ولطيفه ع البشره وفيها نسبة ترطيب من القدام جل يساعد ع حلق الشعر بدون ما يجرحك ولا يضرك وطبعاً يا بنات جسمي نعومه فائقه وبشرتي رطبه هذا الي بتقولي الماكينه اتحرش البشره وع فكره شعرتي خفيفه خفيفه ع الاخر مع اني نستعمل ف ماكينة ولكن تغليظ الشعر مش تحولي الشعر ب الماكينه او الحلوه هذا سبب خاطئ تماماً وانما غلطت الشعر كل واحده ونمو الهرمونات الي عندها وهادي معلومه طبيه متآكده منها ؛؛
    ـ طريقة الاستعمال هي ناخد الجل رغوه هو بعدها نطرح ع المكان الي بنحول الشعر منه سواء ايدي او رجلي ونحلق الشعر ب اتجاه معاكس لنمو الشعره وطبعاً كل ما نخش اندوش لو كان ف شعر زايد نحوله ماعندي مانخسر وفكونا من البخل والي بتقولي اطلع بسرعه الماكينه بنقوللها حتي الحلوه والشمعه نفس الشي مع اني انا شخصياً نستعمل ف ماكينة مرتين ف شهر تمام وزي ماقلتلكم شعرتي خفيفه ولا غلطتي شعر جسمي ولا كثراته كله كذب وتوهمات زايده ؛؛
    ـ ع فكره مزيلات الشعر كريم ولا غيره زي فيث مضرات للجلد وللبشره يسبب اسوداد وتحسس ردو بالكم،،
  2. الي ف صوره رقم 2ماكينة بروان للوجه ومعاها قطعه تانيه للاماكن الحساسه الماكينه هادي حبيبة قلبي بجد ريحتني هلبا هلبات انا كنت من جماعه الي دير ف الفتله لوجها ولكن بعدها عينك ماتشوف الا النور هذاكا الحبوب وحساسيه ونقعد نعاني ثلج ومية ورد وكريمات وحالتي محلحله لان بشرتي حساسه درجه اولي وفوق هذا كله الالم الرهيب ف الماكينه هادي انظف بيها ف وجهي كله بدون اي اذي ولا الم بشره صافيه نقيه تمام التمام وفوق هذا كله مانفكرش من بيديرلي وجهي او لو عندي مناسبه نخمم ف الفتله مية مليون مره بجد تستحق التجربه،،
    ـ طريقة استعمالها نمشي بيها ع وجهي ب الشويه عكس نمو الشعر وهي راسها صغنطوط يحول حتي الشعر الرقيق هذاكا الي كلكم حاقدين عليه تحت العين وحتي ب الفتله ولا حلوه ولا شمعه يتحول وتقعد مطبرفطه طول الاسبوع بجد تهبل ماكينتي العجيبه،،
    ـ لو ماتبوش تستعملو الماكينه لوجهكم انسب شي لازالة شعر الوجه هو الفتله فقط فقط لا شمعه ولا حلوه ممنوع للوجه وبعد ماتنظفو وجهكم يكون ثلج مية الورد ف الفريز ومررو ع وجهكم حتي زوز ثلجات لين يهدا الوجه وثلجه تمتص حراره وتخفف الالتهاب بعدها تدهنو وجهكم ب فوسيدين او ديرموفيث ولكن رودو بالكم تدهنو بيها بعد الفتله فقط لان فيها كرتيزون والكرتيزون معروف كثرت استعماله يضر البشره ايوا اهو نبهتكم وحاجه تانيه بعد تنظيف الوجه ماتفكروش حتي تفكير تحطي حاجه ع وجهك مكياج او اي كريمه او اي شي اغسلي وجهك بمية مصقعه واستعملي الخطوات الي قلت عليها،،
    ـ ماكينة براون متوفره عند محل الحراري لبيع مستلزمات المزينات ف بن عاشور جرابه اوميزران ب 35 دينار؛؛
    ـ وماكينة فيونس والجل متوفر ف الصيدليات ف حالة مالقتوش الجل استخدمو بدله شامبو جونسون للاطفال،،

 وبس سلامتكم وعافيتكم وطبعاً حبيباتي انا شرحت ع طريقتي وعلاش وكيف والامر مخير ليكم كل حد ع شني متعود ولكن الانسب انكم تمشو بخطوات صحيه صحيحه مش ماضروش انفسكم اوووهبكم اموواه….

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Animated Social Media Icons by Acurax Responsive Web Designing Company
error: Content is protected !!