‫ اسباب وحلول ‏نمو شعر تحت الجلد

صباحو آمل وتفاؤل حبيباتي الجميلات أوهبكم كلكم

بوست اليوم يستنو فيه مني هلبا عضوات وهو ح نحكي فيه ع مشكله يعانو منها معظم النساء وهي مشكلة نمو شعر الجسم تحت الجلد ح نشرح علاش وكيف نقدرو نتخلصو منه ارجو قرائة البوست بتركيز لان متعوب عليه بصدق؛؛

316

الاسباب :-

  1. اول شي علاش تنمو الشعره تحت الجلد انقوللكم ب اختصار هو من اسباب نمو الشعر تحت الجلد عدم تدفق الدم بمعني بطء الدوره الدمويه عند بعض الناس يعني مايتغدآ الجسم تغديه سليمه وصحيه ف بتعكس ع نمو الشعره بتخليها ضعيفه وماتقدر تطلع برا الجلد لان بيكون سطح البشره شبه ميت وسميك شويه ونمو الشعره ضعيف مايكتملش نموها للآخر؛؛
  2. والسبب التاني تراكم خلايا الميته للجلد والزيوت ومواد التنظيف وترسب المستحضرات زي كريمات الترطيب بدون تقشير البشره بشكل دوري ف هنا يتصكر المسام امتاع الجلد ويسد نمو بصيلات الشعر وتسبب ف مشاكل للبشره منها حبوب والتهابات وحساسيه مرات تقعد توجع بشكل كبير؛؛
  3. السبب الثالث علاش يقعد شكل الرجل رؤس سوداء يعني الرجل تكون منقطه وشكلها مستفز جدا هو لما تحولو الشعر ماتتحولش كامله من جذورها علاش لضعف بصيلة الشعر نموها ما كملش وطلع ع سطح البشره هذا علاش لما تجو تحولو شعرها نصها الفوقي يتحول والنص البصيله او جذر الشعره يقعد تحت الجلد ويقعد المسام مفتوح بسبب البصيله و بعد يومين تموت بصيلة الشعره ويتحول لونها اسود وتقعد حالتكم حاله غير طبعاً لشكلها سيئ جداً ومش حلو تبدا الرجل منقطه وتتحشمي تلبسي حتي ف حوشك قصير؛؛

الحل :-

به انجو للحلول كيف نقدرو نتفادو هالمشاكل هادي

  • اول شي الدوش ب الميه السخونه يضعف نمو بصيلة الشعر سواء كان شعر الجسم او الرآس يعني خففو من الدوش ب الميه السخونه واخر الدوش ضروري تاخدو صدمه للجسم ب الميه المصقعه لتصكير المسام؛؛
  • حاولو تتحركو حتي ف البيت يجري الدم شويه لتدفق الدم لبصيلة الشعر؛؛
  1. قشري جسمك مره ف الاسبوع وقبل ازالة شعر الجسم قشري جسمك ع الخفيف سواء طبيعي او تجاري واسهل طريقه للسكراب او المقشر خودي ملح حطيه ع كف ايديك وصبي عليه شامبو الجسم امتاعك وقشري بيه جسمك ح يولي الجسم ناعم ويحول كل الزيوت والترسبات من كريمات الترطيب او غيره؛؛
  2. لما بتجي تحولي الشعر سواء ب الحلوه او غيره خودي فوطه تكون منقعه ب الميه الدافيه وشويه خل اعصريها كويس وغطي بيها رجلك لمدة 5دقايق تفتحلك المسام وماتخليش الشعره تنكصر تحت الجلد مش لما تحولي الشعر تطلع بجذورها؛؛
  3. بعد ماتكملي حلوتك او تحولي الشعرلمنع التهابات البشره ديري تونر بروحك خودي الشاهي الاخضر اغليه وخودي ميته حطيها ف شيشة بخاخ وخليها ف الثلاجة وبخي بيها جسمك كله ب اذن الله مش ح يصيرلك لا التهابات ولا تحسس لجسمك ؛؛ وما تغسليش جسمك بعد الحلوه مباشرة غلط ريحيه من بعد الحلوه حتي 10دقايق؛؛
  4. حولو الشعره ف اتجاه نمو الشعر مش ماينكسر ويقعد جزء فوق وجزء تحت الجلد؛؛
  5. .رطبي بشرتك باستمرار ب لوشن للجسمك وافضلكم لوشن بيبانتين يناسب جميع البشرات لان خالي من العطر والكحول؛؛

التحذيرات:-

  • لما تحولو الشعر ردو بالكم تلبسو ضيق ليقز او سروال سلم حتي ف البيت خلال نزع الشعر يعني اليوم الي ديرو فيه حلوه او غيره ماتلبسوش ضيق خلوه لتاني يوم والبسو ع راحتكم وما تبلبزوز ب ايديكم حبوب الشعر ولا تعصريه نعرفكم ايديكم ما يهنوكم بس خليها ف بالك اي تبلبيز ب إيدك بيخلي اثر ف جسمك؛؛
  • البوست هذا خلوه يعرفوه قدر ممكن من البنوتات والمدامات ديرو مشاركات وتاق لصحباتكم وقريباتكم؛؛

وبس حبيبات قلبي اتمني بوست مفيد للجميع دومتم مزموزات دائما اوووهبكم اموواه…

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Customized Social Media Icons from Acurax Digital Marketing Agency
error: Content is protected !!