صباحكم عسل حبيبات قلبي برنسيساتي الجميلات؛؛
حبيباتي اليوم بنحكيلكم كيف نحمو ونهتمو ب بشرتنا خلال حرارة وشمس الصيف بنقوللكم ع منتجات بسيطه وغير مكلفه متوفره ف كل الصيدليات وبسعر مناسب وضروري يكون متوفر عندكم ف الصيف خاصةً البشره الحساسه والي تتهيج من حرارة الشمس هما حاجتين بخاخ الميه المعدنيه وجل الصبار ح نتكلم ع كل حاجه بشرح مفصل اقروه كويس ح يفيدكم البوست هلبا؛؛
- اول شي بنحكي ع بخاخ الميه المعدنيه والي هي ماركة آفين الطبيه فرنسيه ها الماركه روعه ف كل منتجاتها واسعارها مناسبه جداً تاريخ الماركه هادي عريق جداً هي مستخرجه من ينابيع آفين و المياه هادي انعرفت من ع 1743 في قدرتها ع معالجة الإضطرابات الجلدية تركيبتها الفريده ومميزاتها المهدئة و المضادة للتهيج يعني ماركة طبيه طبيعيه صرف من ينابيع آفين آمنه جداً ع البشره انا مستحيل نستغني ع بخاخ الميه ف الصيف لان نوع بشرتي بسرعه تولي طماطمه وتتفرفط من الحراره البخاخ هذا يهدي البشره ولو في حروق من الشمس يهديها تماماً لانها مياه حرارية معدنيه تحتوي ع معادن مفيده للبشره تحارب الشيخوخه؛؛تفيد البشره الحساسه والجافه الي تتعرض للجفاف لان الميه متكونه من الصوديم والكالسيوم الي هو يخفف من حساسيه البشره ويرطبها؛؛
- وتفيد حتي البشره الدهنيه والمختلطه خاصةً الي يستخدمو ف منظفات الي تجفف البشره الميه هادي تهدي تهيج البشره واماكن التهاب الحب لان تركيبتها فيها المغنيزيوم والسيلسيوم تعالج الحبوب ويجدد خلايا وانسجة البشره الضعيفه والرقيقه؛؛
- وفوائدها لا تحصي ولا تعد تشد البشره تعطيها اشراقه ونضاره تصكر المسام وتقلل من الحبوب وتخفف من انتفاخ العيون تبخي شويه ع قطنه وتحطيها ع عيونك تمتص الحراره وتساعد ف تخفيف الهالات مع الاستمرار عليها؛؛
- تستعمل لكل انواع البشره ولكل اماكن الجافه والمتهيجه للجسم يعني لو جاتك الحكه امتاع الصيف من الجو سخون تحت الصدر او بين الفخاد تقدري تبخي عليها ح تهدآ البشره تماماً حتي تستعمل للحرار الي يجي للبيبي من البامبرز الحفاظات تقدري تبخيه عليه آمنه جداً و حتي لراجلك او خوك بعد الحلاقه لو تهيجة بشرة وجهه يقدر يبخ منها تهدي المكان من تهيج البشره يعني ننصح بيها بجد؛؛
- طبعاً ع طول اتكون ف ثلاجه مش لما تبخي منها تنعشلك بشرتك وتعطيك حيويه تقدري تستعمليها ك مثبت مكياج قبل وبعد المكياج تبخي وجهك بمسافة ذراع من بعيد تخليها 3دقايق يتشربها بشرتك وديري بعده مكياج ولا كريمة ترطيب امتاعك وتستعمل عادي طوال اليوم كل ماتحسي بشرتك فيها حراره وتحرق فيك ح تهديها تماماً وع فكره مش ح يفوت سعره 10دينار ليبي متوفره ف كل صيدليات عموماً منتجات آفين كلها ننصح بيها من واقي لكريمات ترطيب لمزيل مكياج ماركة طبيه ومستخلصه من مياه معدنيه طبيعيه وع فكره فيه عدة ماركات تحتوي ع مياه معدنيه منها لاروشيه بوسي نفس البخاخ الي موجود ف الصوره جنب جل الصبار وفيه ماركة فيشي وكدا ماركة تانيه فيها بخاخ الميه المعدنيه؛؛
- انجو لجل الصبار الي هو الآولفيرا طبعاً فوائده لاتعد ولا تحصي مناسب لجميع انواع البشره متوفر ف كدا ماركه من ضمن فوائده يرطب البشره بدون مايغلق المسام يعالج تقصف الشعر تحطيه ع اطراف الشعر بعد الدوش ممتاز يهدي البشره بعد حلاقه للرجال والنساء الي يستعملو ف ماكينة الجليت ممتاز تستعمليه كمرطب لجسمك ب الكامل يستعمل حول العينين لتخفيف من الهالات والتجاعيد ممتاز تستعملوه حول الاظافر لترطيبها يعني جل الصبار مفيد ومهدئ ممتاز لتهيج البشره بسبب تقلب مناخ الجو يستعمل لحروق الشمس وعن تجربه بعد ما تبشمط من شمس شرم هو الي عالجي ظهري و وجهي من حروق ورجعلي لون بشرتي الاساسي ونستعمل فيه مرات لمسح المكياج ممتاز وحتي لو بتستعمليه ك مرطب قبل المكياج رهيب وحلو يشد البشره ويعطيها نقاء حلو وحتي هو سعره مناسب ومتوفر ف الصيدليات؛؛
- طبعاً ضروري حتي هو تحطوه ف الثلاجه لان استعماله هو مصقع ينعش ويقلل من مسام البشره ويخفف زيوت البشره الدهنيه تقدرو تستعملوه ك مرطب ف لليل قبل النوم ممتاز وتمتصه البشره بسرعه يعني فوائده واستعمالاته لاتعد ولا تحصي ننصحكم تشرو منه ح يفيدكم ف الصيف وحرارة الجو؛؛
وبس حبيباتي اتمني فدتكم ب معلومه مختصره ومفيده دومتم متآلقين دائماً اوووهبكم اموواه
