عضواتي الجميلات البوست هذا ح يفيد الناس الي نفس ستايلي يعني انا ح نشرح خطواتي للمكياج ف الثقيل ف حفله او مناسبه والي نفس ستايلي ح تستفيد منه البوست هذا ولكن انا ف بوست سابق شارحه خطوات المكياج ب التفصيل؛؛

• بنقول معلومه ع بشرتي انا بشرتي عاديه ل مرات مختلطه خاليه من العيوب ماعنديش حبوب ولا مسامات ولا اثر يعني بيبي سكن الحمدالله انا طبيعة مكياجي انحبه ديوي لوك يعني الوجه يكون فيه لمعه صحيه ونحب للوك الطبيعي الغير مصطنع ولا انغير ف ملامح وجهي انا من الناس الي نحب ملامح وجهي ما تتغيرش ب المكياج يعني مانحبش انشوف ف المرايا نلقا انسانه تانيه تركبني الرعشه واصلا هدف المكياج الصحيح مش تغير الملامح كلياً لا هدفه انك تطلعي بشكل احلا وانزك ولكن بدون تغير ملامح بشكل رهيب يعني ف ناس اتشوفيهم ب المكياج بشكل ومن غيره كآنها انسانه تانيه لين يصيرلك الستك وانا هذا ضده تماماً انا انحب شكلي وراضيه ع نفسي الحمدالله فلهذا نحب للوك الطبيعي جداً،،
• وانا من الناس الي تحب التغطيه الخفيفه لان بشرتي مافيهاش عيوب ولا تصبغات واي بنوته او مدام هكي تردي بالها تختار تغطيه ثقيله ادمر بشرتها ديما خلوكم ع لايت كفر؛؛
• خطواتي بسيطه جداً جداً و اكثر شي ف مشتريات مكياجي الارواج واحمر الخدود نحبهم لانهم اعتمادي الاساسي للمكياج؛؛

1. اول شي تكون بشرتي نظيفه ومغسوله ب غسول مناسب ليها انحب قبل مانحط مكياجي نغسل وجهي ب غسول اويل فري يعني خالي من زيوت بدون مايجففها زي غسول فيشي الاخضر او نتروجينا كريم او كلين هادو غسولات كويسه للبشره الدهنيه ف انا نسخدم فيها قبل ما نبدا المكياج لان مرات عندي منطقةt زون الي هي الانف والجبهه تزيت شوي،،
2. خطوتي التانيه هي الترطيب لازم منه لاني بشرتي عاديه انا نستخدم ف كريم ترطيب مانحطش ف برايمر او بيز يناسب اكثر البشره الدهنيه ترطيبي هو كل مره من ماركة يعني نحب كريم ترطيب بودي شوب يعطي لمعه هلثي فيس لمعته ع روز اتشوفي البشره تولي بينك ع روز هادي وتعجبني هلبا انخليها شوي ع وجهي تاخد وقتها ف ترطيب وتمتصها البشره وبعدها ناخد بخاخ من ماك فكس بلس انحبه يعطي للوجه دوي لوك لمعه وانتعاش هو او بخاخ فيتامين سي من بودي شوب نفس الوظيفه نخلي بشرتي تمتص ف فكس بلس وبعدها نبدا ب الخطوه الثالثه؛؛
3. خطوتي الثالثه هي الكونسيلر بنوضح نقطه انا مانحبش نستخدم الكوركتر تحت الكونسيلر لان هالاتي عاديات مش مزعجات وزي ماقلت انحب التغطيه الخفيفه والطبيعيه يعني نحب ظل الهالات يبدا خفيف نستعمل ف كونسيلر ميبلين او عجلة كريولاين او ماك برو لونق ع حسب الجو واحد منهم بس نستخدم مش كلهم بعد ما نحط الكونسيلر تحت العين فقط وشويه جيهة الانف والشفايف يعطي اضاءه حلوه ندمجه كويسه ب الطبطه ب اسفنجة بيوتي بلندر خلاص كملت من الكونسيلر نجو لخطوه الرابعه؛؛
4. خطوتي الرابعه هي الباودر نستخدم ف اخف نوع باودر هو لوس باودر او البودره المنثوره خفيفه ع الاخر لان بشرتي مش مستحقه تغطيه عاليه ف نحط ف الباودر ع كامل وجهي ونثبت الكونسيلر ونخلي كميه تحت عيني بدون دمج لين انكمل عيوني بعد مانحط الباودر وندمجها ب الفرشه مش ب الاسفنجه لان نبي تغطيه خفيفه نجو للخطوه الخامسه؛؛
5. خطوتي الخامسه هي العيون انا نرسم ع طول ب الايلاينر لان تقدرو تقولو محترفه ف حطته بدون ما ايدي ترعش ثابته ونرسم ب الايلاينر ع طول نستخدم ف ايلاينر حاليا ماركة اتش اند ام مدمنه عليه رهيب ثابت واسود وفرشته حلوه وانا انحب رسمة الكات لاينر ونعرض فيها نوعاً ما لان مش مدايره ظلال ناخد ف راحتي ف الرسم؛؛
6. خطوتي السادسه بعد مانرسم وهاذي الخطوه مش اساسيه عندي هي تكحيل العين مرات انكحل مرات لا ولو كحلت نكحل بلون بيج او لون يكون فيه اضاءه داخل العين بس مره بعد وين نكحل؛؛بعدها انحب انظلل ب لون البيج ع بني خفيف تحت رمش السفلي تمويه تعطي العين حجم اكبر وتقلل من انتفاخات العين حلوه للقطه هادي؛؛بعدها اندير ف هاي لايتر ف مدمع العين يكون ع بيج او لؤلوي نحب الدرجات هادي،،
7. خطوتي السابعه هي نمشط حواجبي وبعدها نثبتهم ونعطيهم لون بمسكارة الحواجب ونستخدم ف ماركة كركتر مسكارة الحواجب رهيبه ولونها يجنن ميديم براون؛؛بعدها نظف تحت حاجبي بقلم كونسيلر الي نستخدم فيه ماركة قولدن روج درجة البيج حلوه وتعطي اضاءه لعظمة الحاجب؛؛
8. خطوتي الثامنه هي الرموش انا ما نحبش التركيب ابداً ورموشي الحمدالله ناخد ف عكافة الرموش ندير بيها رموش وبعدها نحط طبقه خفيفه من المسكره وندير عكافة الرموش مره تانيه تعطيني فوليم اكثر ولكن الحركه هادي تبي ايد خفيفه لان الي اول مره تستعملها ح تتكتل معها ونحط طبقه تانيه من مسكرة يطلعو بيرفكت انا مسكرتي حبيبة قلبي هي برجوا ماكس وكل مسكرات برجوا انحبهم واستعملتهم خاصة الاخيره الكحله الي فيها دبل برش طول وتكثف اسمها تويزر،،
9. خطوتي التاسعه احمر الخدود حبيب القلب ديما اندير ف درجات الترابيه مايله ع خوخي مشمشي يعني لون تورد الخد الطبيعي مانحبش درجات المشعشعه امتاع ماركو؛؛
10. خطوتي العاشره هي الهايلايتر انا ما نحبش الكونتور لان مش مقتنعه بيه بس انحب الهايلايتر لان يعطي اضاءه للوجه ولمسه حلوه انا مرات اندير ف اضاءه ماك سوفت اند جنتل او ايلف او قولدن روز ع حسب نديرها ع عظمة الخد وجسر الانف وفوق الشفايف شويه تعطي اضاءه حلوه للوجه وفنش ديوي لوك زي ما نبي انا كآنه الوجه مببلول؛؛
11. خطوتي 11هي الروج طبعاً ف الحفلات انحب الارواج الالوان الفاقعه الاحمر نبيذي او الفوشيا او البينك الفاتح ويطلع ع لون بشرتي نرسم ف الاول بقلم نفس لون الروج او افتح بدرجه ونعبي الشفايف وبعدها انحط الروج انا ارواجي اغلبيتها تكون مات مطفي مانحبش القلوسي يكون فيها لمعه؛؛

• وبس هذا هو يعني ب الكثير ساعه الا ربع نكون جاهزه ب التمام والكمال او اقل لان في خطوات نزيد نقص فيها وطبعاً للوك هذا مش ح يناسب الاغلبيه منكم ولكن ح يناسب الي نفس ستايلي انا حبيت انفيديهم بخطواتي لانه انا مانحبش الظل ولا كريم الاساس ومستحيل انحطهم ف وجهه زي ماقلت الي بشرتها صافيه حرام تخربها ب كريم الاساس و بتغطية فل كفر حبيت انشاركم خطواتي دومتم بود جميلات القروب اوووهبكم اموووواه،،
• ملاحظه صورتي الي ف البوست تعبر اكثر ع مكياجي الي شرحت عليه انا شخصيا مايكونش اثقل من هكي،،