صباحو ورد معطر بنوتاتي ومداماتي الطرفونات اليوم بنحكي ع قطرة او زيت انقلوت السحريه اي نعم سحريه هالقطره العجيبه الرهيبه طبعاً بنوضح استعمالها الصحيح لان معظم البنات فاهمين غلط استعمالها ومحدود جداً هذا الزيت شبيه ب فكس بلس امتاع ماك الفرق بينهم السعر الزيت ارخص من فكس بلس وع انه هذا بخاخ ميه وانقلوت قطره زيت بس استخدامتهم مقربه لبعض؛؛

ـ استخدامات قطرة الزيت من انقلوت:-

1. القطره هادي تقدري تستخدميها لاي ايلاينر او مسكره تجف وتنشف عندك قطره او اتنين يرجع جديد يلمع يعني اعادة تدوير لاي منتج جف او نشف؛؛
2. القطره السحريه هادي تقدري تقلبي بيها اي ظل او شدو يكون باودر او بيقمنت ل ايلاينر سائل يعني بدل ما تشري ايلاينر ملون القطره هادي اقتصاديه وتخليك تصنعي ايلاينر ملون بروحك؛؛
3. القطره هادي تقدري تستخدميها ك بيز او برايمر للعين قبل الشدو او الظل يعني قبل ماتحطي الظل امتاعك قطره واحده ع كف ايديك وتاخدي ب صبعك مسحه واحده وبعدها حطي الظل امتاعك شوفي للون كيف يولي خيالي وقوي وثابت ع طول؛؛
4. القطره تقدري تستخدميها للشادو البيقمنت او الشيمر يعني المنثور الي يبدا فيه لمعه قويه ب القطره تقدري اثبتيه بدل ما يطيح من جفن عينك او يخف لونه؛؛
5. القطره السحريه تقدري تستعمليها ك برايمر لوجهك قبل كريم الاساس او لو تبي تخلطيها مع كريم الاساس ح تبينها اكثر وتعطيك لمعه حلوه واثبت الكريمه والمكياج ع طول ما انتي ف حفلتك بدون مايقلب للون او يخطط معاك؛؛
6. اهم نقطه ف القطره هادي هي تبيث كحل العين او الايلاينر رهيبه ومستحيل يسيح معها يعني لو تبي تكحلي ب القلم اديري القطره ع كف ايدك وتدمجي راس القلم ب القطره وتكحلي عادي مستحيل ايسيح ولو بتكحلي بجل ايلاينر انقلوت نفس الطريقه تاخدي القطره ع كف ايديك وتدمجي ب فرشة الايلاينر كحل وارسمي وبعدها انسيه لو تزحزح من مكانه تعالو تفاهمو معاي بس الحركه هادي خلوها ف المناسبات بس لان صعب مسحها ومش كويس للعين يومياً؛؛
7. بجد اختراع انقلوت هذا رهيب عجيب وسعره رمزي تقريباً 14دينار ليبي وماتهزوش ع حجمه لان هو قطره واحده منه تكفيك وتغنيك يعني ح يعطل معاكم ؛؛

اتمني الافاده للجميع ب البوست دومتم بود اوووهبكم اموووواه