مساؤ ورد بنوتاتي ومداماتي الحبوبات وجمعتكم مباركه،،

بنعطي شوية معلومات ع طريقة رسم الحاجب الصحيحه وتابعو صور البوست بس ركزو ف الستيت والكلام خيرلكم ايوا ح تتعلمو ح تتعلمو فكوني من كلامكم مانعرفوش لان مانحبش الكلام هذا الاستمرار والممارسه تخليك بروفشنال ف حطت مكياجك،،
أول شي ف كدا نوع لرسم الحاجب هو القلم او تاتو الحواجب او شدو =ظل الحواجب او مسكارة الحواجب طبعاً اامن شي ع الحواجب هي شدو =ظل الحواجب او مسكارة الحواجب ولكن حاولو قدر الامكان ماترسمو حواجبكم يومياً لان اي شي ليه مضاره مهما كان مواد تجميل كل ما تستخدميها بشكل يومي ومفرط بتآثر ع بشرتك بشكل كبير؛؛
به كيف ترسمو الحاجب بشكل صحيح مش بشكل كارثي ركزو ف الكلام تربحو اول شي تحددي لاين=خط حاجبك ب القلم وبعدها تعبيه بظل الحواجب وديما خودوها قاعده من قدام الحاجب يكون اخف بدرجه للون من باقية الحاجب باش يبان طبيعي اكثر وماتربعوش الحاجب من قدام هلبا ولا ترققوه خليكم ع رسمة حاجبكم الطبيعي لان شكل الحواجب اي غلط فيها ح يآثر ع شكل وجهك كله الحواجب هي اساس الوجه؛؛
توا كيف نرسمو الحواجب متساوي نفس العرض والطول ومن فوق ومن تحت زي صورة الستيت حددي حاجبك بخط رقيق ب الكونسيلر الي هو خافي العيوب من تحت الحاجب ومن فوقه الحركه هادي حلوه تعطي فنش للحاجب نظيف بعد ماتكملي رسم الحاجب نظفي الكونسيلر ب فرشة خافي العيوب او حتي بصبعك بطبطه وح يجوك حواجبك مرتبات زي بعض،،
بنقولكم ع فكرة للناس الي شعرها فاتح وتبي تفتح لون حواجبها ب المكياج بطريقه سهله جداً تاخدي شويه من الكونسيلر=خافي اوكريمة الاساس ع طرف صبعك تحطيه بطبطه ع حاجبك وبعدها ينشف شوي حطي المسكارة او تاتو الحواجب ح يطلعلك لون الحاجب تشكلط فاتح وطبعاً يكون الي بترسمو بيه المسكارة و ظل حواجب لونه فاتح ف درجة البراون او التشكلط؛؛
الي حواجبها خفاف تحاول تحدد لاين=خط الحاجب وبعدها تعبيه ب ظل الحواجب وتمشي عليهم ب مسكارة الحواجب نفس الي ف الصور وع طول اتكون مقدمة الحاجب اخف لون من ذيل الحاجب يبان طبيعي اكثر؛؛
الي شعرها اسود دير تاتو او مسكارة لحواجبها يكون درجة دارك براون يعني الدرجه البني الغامق الي بعد الاسود مباشرة ماديرش لون اسود تطلع زي شعشبونه ترد بالها لان الاسود ف الحواجب يعطي مظهر قاسي جداً للوجه ويطلعك زي الساحره الشريره؛؛
الي حواجبها غلاظ ومحددات تكتفي بمسكارة الحواجب فقط كمظهر طبيعي ويعطي فنش حلو مع المكياج؛؛
طبعاً للناس الي ماتنقيش ف حواجبها دير لصقة اخفاء الحواجب افضل ماركة هي كريولاين ؛؛
افضل ماركة لشدو الحواجب هي نيكس.ماك.كريولاين. انقلوت.ميكب فورايفر.انستازيا.بودي شوب؛؛
ب النسبه لتاتو الحواجب وهذا ثقيل ومانحبذاش للحاجب لان ينتف شعر الحاجب هو ميكب فورايفر.فورايفر52. كاجل.مكياجي،،
ب النسبه للجل تاتو الحواجب يكون قوامه اخف ع الحاجب جاي مابين الباودر والتاتو الكريمي هو ميكب فورايفر.
بودي شوب رهيب.ماك.كريولاين.نيكس.انستازيا.انقلوت،،
ب النسبه لمسكارة الحاجب هي ماك.ميكب فورايفر.انستازيا.ايلف. وكركتر رهيبه رهيبه وسعرها مش غالي ورخيصه ب15 خديتها من محل اليمامه باب غشير وفيها الوان ودرجات حلوه،،