مساءالخيرات بنوتاتي ومداماتي المزموزات؛؛
حبيبات قلبي بوست لشرح مفصل ع استخدام الهايلايت=الاضاءه للوجه
الهايلايتر أوالهايلايت بمعني الاضاءه للوجه وانا شارحتها مع الكونتور ولكن حبيت نشرح عليها ب نقطه منفصله لان في هلبا بنات مايعرفوش يستخدموها بطريقه الصحيحه ف الاماكن الصحيحه يعني ح نوضحلكم وانسهلكم الفكره ف استخدامها؛؛
- انا صورتلكم بعض من الاضاءات الي عندي لان عشقي الهايلايت واحمر الخدود والارواج مكياجي الاساسي ونعتمد عليه ف كل شي نحب نشري كل الانواع ونجرب؛؛
- انقوللكم شني معني الاضاءه وشني وظيفتها ف المكياج هي تنحط ع عظمة الحاجب وع عظمة الخد وع جسر الانف وع جبهة منطقة تي زون تنور الوجه وتعطيه اضاءه مشرقه للوجه زي الفنانات وجوهم فيها اضاءه او لمعة بلاستيكه حلوه يعني الاضاءه معناها انك تبيني بيها الاماكن الي تبي تبرزيها ف وجهك لانها هي زي تسليط الضوء ع اماكن الوجه؛؛و انا ح نقسمها قسمين اضاءه مطفيه واضاءه بلمعه بمعني هايلايت بشمر وهايلايت مات وانقولولكم علاش قسمتها؟؟
- أولاً/الهايلايت المات اي الاضاءه المطفيه:-
طبعاً الاضاءه المطفيه تكون زي الي ف صوره الي فوق عليها فرشة الكونسيلر هادي عجلة كريولاين السداسيه فيها كدا درجه للكونسيلر =خافي طبعاً درجات الالوان مرقمه من 1،6 يعني فيها من الفاتح الي اغمق الوان البشره الي ف صوره رقم واحد افتح درجه ف عجلة كريولاين لان بشرتي بيضاء خديته ع لون بشرتي والي يتمشا مع لون هالات امتاعي وطبعاً تغطيه امتاعه فل فل كفر ومستحيل يقلب للون او يخطط ابداً ابداً بجد روعه هذا علاش انحبها ماركة كريولاين متميزه ف تغطيتها وثابتها العالي؛؛ - حبوباتي الاضاءه المطفيه لمن تستخدم للناس الي بشرتهم فيها عيوب ومسامات واسعه يكتفو ب الاضاءه الي تكون مطفيه زي للون الي جاي ع اصفر بناني ومعروف للون الاصفر بناني او موزي هههه تشبيهات غريبه بس لونه زي الموزه ف المكياج للإضاءه وينور الوجه هلبا هلبا علاش قلت الاضاءه المطفيه للناس الي عندها مشاكل ف البشره ومسام كبيره و واضحه لان الاضاءه الشيمر او بلمعه ح تبين كل العيوب ف البشره وتوضح اكثر المسام ف اضاءه المطفيه مناسبه جداً لآصحاب البشره الي فيها عيوب؛؛
طريقة استعمالها انك بعد ماتحطي الكونسيلر=خافي الي زي للون البيج الغامق تدمجيه كويس ب اسفنجة المكياج للدمج طبطبه تب تب حطي للون الباناني للإضاءه فوق الخافي ع شكل مثلت مقلوب تحت العين?علاش قلت مثلت باش توصل الاضاءه للخد وتنور الوجه وتقدري اتحطيها تحت عظمة الحاجب ح يعطيك لون واضاءه خياليه وتقدرو اتحطوه ع جسر الانف و بجد ضروري تجربو ماركة كريولاين رهيب عجيب تغطيه خياليه فعلاً وبعدها اثبتوه ب الباودر ويفضل تكون لوس باودر يعني البودره المنثوره الحره تمسك اكثر وماتخليش يخطط الخافي والإضاءة؛؛ - تانيا/الهايلايت الشيمر اي الاضاءه ب لمعه:-
- الاضاءه هادي تكون بلمعه زي الصوره الي تحت انا عندي كدا نوع وندير فيها بكدا طريقه وزي الي ف صوره لوس باودر شيمر وهايلايت لكود يعني سائلا الي ف شيشه وهايلايت ستك الي هو زي القلم وفي نوع زي الباودر والاضاءه الي بلمعه يستخدموها الناس الي بشرتهم صافيه تماماً خاليه من المسام والتصبغات والحبوب لان اضاءه بلمعه لو اديرها الي بشرتها مش صافيه ح تبيني وتبرزي عيوبك اكثر لان زي ماقلت الاضاءه انك تبرزي وتسلطي الضوء ع الاماكن الي تبي تبينها ف وجهك؛؛
- طريقة استعمالها في كدا طريقه توا الاضاءه الي تجي سائله زي الي ف الصوره تقدري تستعمليها حتي مع كريم الاساس لو تبي وجهك كله فيه لمعه تحطي كريم الاساس ع كف ايديك وتحطي نقطه من لمعه السائله وتدمجيهم مع بعض وتحطيها ع وجهك وتدمجي كويس بطريقة تب تب ب اسفنجه الدمج ح يعطيكم فنش حلو لمعه قلوموري للوجه هذا للناس الي تحب ديوي لوك يعني الوجه الي تكون فيه لمعه؛؛اما الطريقه التانيه وهي المعتاده لإضاءه بعد ماتكملي كل مكياجك تحطي منها ع عظمة الخد وع جسر الانف ع الذقن ع مدمع العين ح يعطيك هلثي فيس يعني لمعه الصحيه او المشرقه للوجه بس انتبهو لو كانت للمعه سائله تحطوها قبل احمر الخدود وتدمجوها كويس تب تب ع عظمة الخد اما لو كانت اللمعه باودر تحطوها بعد احمر الخدود بفرشة فان برش الي هي فرشة المروحه او حتي بطرف صبعكم الوسطي عن طريق تب تب بحركه خفيفه ع عظمة الخد؛؛
- ع فكره تقدرو تستعملو الاضاءه بدون كونتور مش شرط كونتور انا نستخدم ف الاضاء بدون كونتور وهو ما يسمي بتكنيك الستروبنق لوك،،
- شني الوان الاضاءه المناسبه ديما الي بشرتهم بيضاء ياخدو الوان الاضاءه الشيمر ع الصدفي او للؤلوئ او الاوف وايت زي للون الي ف صوره تحت يعكس ع لون بشرتكم حلو ويتمشا مع جميع موديلات المكياج،اما الي بشرتها سمراء ديما تاخد درجات البرونز و الذهبي،،
- نقطه اخيره تقدرو تصنعو لمعه بروحكم بمكياجكم مش ضروري تشرو لمعه مستقله يعني عادي لو عندك ظل بيقمنت الي هو الغبره يكون فيه لمعه تقدرو اديرو منه وف ظلال نوعهم مخملي يعني تحسي ملمسه كريمي تقدرو اديرو بيه اضاءه شيمر يعني ماتعقدوش ارواحكم؛؛
- افضل ماركات للهايلايتر او الاضاءه هي هلبا وكدا نوع وكدا صنف ح نذكر بعض منها الي مجربتها،، ماك. بينفت. ذابالم. انقلوت .قولدن روز. مس روز. كركتر. كريولاين. فورايفر. وكدا ماركه حلوه وزي ماقلتلك ماتعقدوش روحكم حتي لو كان عندك ظل بلون اوف وايت او لؤلؤلي او صدفي تقدري اديريه بيه هلايتر؛؛
وبس حبيباتي اتمني الافاده للجميع اوووهبكم امووواه
ـ فيديوات تعليميه للهايلايت بالمعه ومطفي
