معرض الصور
4 صور
4 صور
مسائكم ورد وزها خاطر ع جميلات القروب
البوست هذا مستنينه مني عضوات القروب الي ما ينقوش ويشقرو ف حواجبهم انا تآخرت ولكن عارفين نتآخر ونجيب ف المفيد من مصدر موثوق خديت الطريقه هادي من ميكب ارتست خليجيه بروفشنال ابتهاج العيدروس ف تشقير الحواجب وطفي لون التشقير،،
- اول شي هي معتمده ك اساسي ف تشقير الحاجب الي شعر الزائد تحت الحاجب ع صبغة الحاجب كله ترسمه وتحدده ب الصبغه نفس طريقة رسم الحاجب الي شرحت عليها غير هادي ترسم وتحدد ب صبغة الشعر العاديه للحاجب بنفس درجة الشعر ولكن ولكن الي ماتبي تصبغي حاجبها عادي جداً تقدر تستغني عليها النقطه هادي وتستعين بدل الصبغه برسم وتحديد الحاجب ب القلم او التاتو عادي هادي النقطه مخيره ليكم بس حبيت نوضح الي ف صوره الحاجب كيف كان وكيف اصبح ب التفصيل؛؛
- ولو بتاخدو برآئي الشخصي وانا نختلف معاها الميكب ارتست من ناحية صبغة الحواجب انا ضدها تماماً تماماً لان صبغة الشعر لما بتستعمليها ع الحواجب ح تسبب تحسس ودير شيب ف الحاجب لان مكون الاساسي للصبغه هي الامونيا وطبعاً معروفه خطورة الامونيا ع الشعر تتفاعل مع الدم والبشره تسبب هيجان بس هي حكت ع مخاطر الصبغه وتعطي ف نصايح ولكن ف الي تبي هكي اديرلها كيف ماتبي هي يعني ف نظري تبتعدو تماماً ع صبغ الحاجب وتكتفو ب التشقير لان التشقير خالي تماماً من الامونيا لوجود الكلور فيه والكلور والامونيا مايتلاقوش ولو تلاقو مع بعض تصبح ماده سامه خطره غير هكي التشقير يسحب ف للون الشعر غير الصبغه فيها ملونات صبغيه تصبغ ف الدم والبشره؛؛؛
- كيف نشقرو الحاجب ونطفو للون تشقير الحاجب ويبان كآنه مافيش شعر زي الصوره الي قدامكم حواجبها مرتبات بدون ما حولت ولا شعره هو تشقير وصبغه للحاجب انا بنشرح بطريقه مبسطه وطبعاً ليكم عدة خيارات؛؛
- انجو لتشقير الحاجب ركزو ف الكلام اول شي خودو مشقر للحواجب يكون ممتاز وخفيف ع البشره لان هذا حاجب ع العين مش لعب اخطر منطقه وبسرعه ما تتحسس واحسن ماركة تشقير حواجب هي (بوتس سموث كير ماركة فرنسيه، او جولين) ح نحط صورهم تحت بعدين كم مدة التشقير تقعد ما تتعداش 30دقيقه ك حد اقصي واقعدي راقبي ف لون كيف يفتح واحسن شي لما يولي ابيض مش اصفر ولا برتقالي باش تقدري تتطفيه بعدين به كيف تشقرو الحاجب بدون ماتلبزو رسمة الحاجب اول شي تحددو خط الحاجب ب القلم باش تعرفو كيف تشقرو الشعر الزايد بدون ماتخشي ف حاجبك الاساسي وتولي سلاطه حددي حاجبك كآنك بترسميه ب القلم وبعده ابدي الشغل خودي فرشه صغيرونه تكون طويله زي امتاع تاتو الحواجب او شدو الحاجب وابدي حطي التشقير من تحت ومن فوق ع حدود رسمة الحاجب واقعدي راقبي لون الحاجب توصلي للون التفتيح الي تبيه ع طول امسحي ب اسفنجه او قطنة مبلوله ب الميه وابدي ب الحاجب الواحد ماديريش الزوز مع بعض باش ما تلخبطيش روحك وزي ماقلت مدة التشقير من 10/30دقيقه ك حد اقصي؛؛
- انجو لسر طفي الشعر المشقر يعني مرات يطلع للون التشقير مش حلو اورنج او اصفر ويبدا فرق لون مابين الحاجب والتشقير ف تطفي للون هذا يبان نفس لون البشره ب الزبط الطريقه تجيبي صبغة الشعر العاديه لوريال اوفيفا او ويلا بس تكون توبيتو يعني المزود الي تنعصر لان هادي الي بتطفي بيه تشقير شعر الحاجب ويبان زي الصوره كآنه منقيه يبدا نفس لون الجلد الالوان الي تكون ف الصبغه الي بتطفي بيها تشقير كلها فاتحه هي (اشقر فاتح متوسط لآشقر طبيعي.او بني غزالي.او بني فاتح لمتوسط)ابتعدو ع الالوان الغامقه زي الاسود والاحمر والرمادي مش ح تنفع ف طفي لون شعر الحاجب المشقر،،،
- طريقه تاخدي صونيه تعصري فيها الصبغه وتخففيها بشوية مية وتحطي معاها شوية اوكسجين قوته 4%او6% مش اكثر تخلطيها وذوبي الصبغه مزبوط بعدها تاخدي عود الاوذان وبحركه خفيفه جداً خلي ايديك خفيفه ع الاخر ف حطت الصبغه ع شعر مشقر يا دوب تمس الصبغه شعر الحاجب تحطيه وتمسحيه ع طول ب قطنه مببلوله ح نحطلكم الفيديو تحت كيف طفت شعر الحاجب المشقر ؛؛
- مدة استعمال المشقر نصيحه مني ليكم خلوها ف المناسبات اكثر شي ارحمو حاجبكم وجلدتكم لان تتحسس من التشقير المستمر والمبالغ فيه يعني اقل شي من 3 شهور لشهرين هذا اقل شي وترجعي تشقري تاني وبعدين لما تستخدمي المشقر وتطفيه ع طول حطي مرهم فوسيدين الاسد الي فيها خط برتقالي خاليه من الكرتزون او مرهم بيبانتين فيها خط وردي او مرهم ميبو او كريم سودو للاطفال لو تحسست البشره ع طول يهديها وماتخافوش منها الكريمات هادي لان امنه ع البشره وخاليه من الكرتزون تماماً..
اتمني الافادة للجميع دومتم بود حبيباتي اووووهبكم اموووووووووه.
ـ فيديوات تعليميه،،
