‫ اختيار ‏لون الاساس المناسب لبشرتك

معرض الصور
2 صور
‫ اختيار ‏لون الاساس المناسب لبشرتك
235

‫ اختيار ‏لون الاساس المناسب لبشرتك
234

مسائكم فل بنوتاتي ومداماتي الجميلات؛؛

حبيبات قلبي بوست اليوم ح نتكلم كيف تختارو للون الاساس والباودر بشكل صحيح بشرح مفصل وبسيط جداً؛؛

236

  1. اول شي خلينا نتفقو ع انه انا مستحيل نقدر نعطيكم رقم او درجة لون معينه تاخدوها لان انتم ادري بلون بشرتكم والي يناسبها بس ح نعطيكم اساسيات لاختيار الدرجة وللون الصحيح للبشره؛؛
  2. تاني شي ماتتخيلو ابداً ابداً ولا حتي تحاولو انكم تبيضو روحكم ب اي كريم اساس او باودر هادي حاجه مستحيله اساساً وفكونا من جو اتقول مغطسينك ف دقيق او جير  يعني حولوها فكره من راسكم انكم بتاخدو لون اساس او باودر افتح من لون بشرتكم لغرض تفتيحها وتبيضها وهي بالعكس ح يبان اللون مرغمد ويقلب ع رصاصي ومزرق ردو بالكم هادي اهم نقطه؛؛
  3. ثالث شي لما بنجو نختارو كريم الاساس او الباودر لبشرتنا ضروري ضروري نعرفو الاندرتون ويعني لون الداخلي والاساسي للبشره والي مستحيل يتغير عكس تون سكن الي هو للون الخارجي للبشره الي مرات يتغير حسب مناخ الجو ف الصيف يسمر اكثر من الشتاء هادي مهمه جداً جداً كان تبو لون اساس مثالي لبشرتكم؛؛
  • ح نسهلكم وانبسط المعلومه ع قد مانقدر لحكاية الاندرتون او اللون الاساسي والداخلي الي تحت الجلد للبشره الاندرتون او الالون الداخليه للبشره تنقسم الي ثلاته:-
  1. دافئ:يعني الناس الي تتعرض للشمس وبسرعه تآثر فيها وتسمر بدون ما تنحرق هادي نوع بشرتها دافيه وديما يناسبها الوان الاكسسوار الذهبي اكثر من الفضي ولما تشوفو عروق الايد جيهة النبض تلقو لونهم اخضر وانسب شي شوفوهم ف ضوء الشمس اوضح وتعرفو تحددو اكثر؛؛
  2. البارد:هو عكس الدافئ يعني الناس لما تتعرض للشمس تنحرق وما تتآثرش بالشمس الي منهم انا لما نمشي للبحر ع قد ما نقعمز ف الشمس ننحرق ولكن مانوليش سمراء للاسف الشديد وديما يناسبكم الاكسسوار الي لونه فضي اكثر من الذهبي ولون عروق ايديكم جيهة النبض ازرق؛؛
  3. المحايد:وهو من اسمه محايد او الزيتوني اي ما بين البينين وسط وافضل اندرتون او لون داخلي للبشره لان يناسبه كل الوان الاكسسوار ويكون لون عروق ايديكم جيهة النبض ازرق واخضر؛؛
  • توا بعد ما اختصرت كيف تحددو لون الاساسي او الداخلي للبشره الي بيسهل علينا نختارو لون كريم الاساس الخارجي للبشره بطريقه سهله جداً جداً وهي:-
  1. البشره الدافيه لما بتجي تشري كريم اساس يكون عليها او اساس لونها قولدن بيج او ساندي بيج يعني درجات للون الذهبي والبيج تقدري تميزيه اللون بعينك دافي؛؛
  2. البشره البارده لما بتجي تشري الاساس يكون اساس لونها ايفري بينك يعني يكون لونها مايله للوردي الروز اي كريم اساس يكون مايل للوردي يناسبكم جداً وطبعاً تقدري تميز اللون بعينك وبعد تجربته؛؛
  3. البشره المحايده لما بتجو تشرو الاساس تقدرو تدمجو لونين اساسه وردي وبيج يطلع ممتاز جداً ع بشرتكم وطبعاً الدمج ف كريم الاساس بجميع الاحوال ممتاز ف لون للاساس روووعه ع البشره؛؛
  • بنقوللكم توا كيف الطريقه الصحيحه انكم تختارو لون مناسب لبشرتكم؛؛
    ـ ضروري نعرفو نوع بشرتنا والي يناسبها من الاساس اذا كانت بشرتنا دهنيه ومختلطه نختارو الاساس يكون ستك او كومبكات وخالي من الزيوت تماماً يعني يكون جامد ومضغوظ لتخفيف من زيوت البشره وما يزيت ع بشرتكم ولا يخليها مدهنه؛؛
    ـ اما اذا كانت بشرتنا جافه وحساسه يكون نوع الاساس خالي تماماً من العطر ويكون سائل او كريمي لترطيبها اكثر وبدون ما يخليها تتقشر او يسببلها ف جفاف؛؛
    ـ البشره العاديه اغلبية الاحيان يناسبها جميع انواع الاساس ولكن ف بعض الماركات تلقي مكتوب عليها لجميع انواع البشره او للبشره العاديه؛؛
  • به نبو نعرفو كيف نختبرو للون الاساس المناسب للون البشره:
    لما تبو تجربو كريم الاساس جربوها ع فك الوجه زي الصوره يعني الفك الفاصل ما بين الوجه والرقبه علاش لان ضروري تاخدو كريم اساس يناسب لون رقبتكم و اوذانكم فكوني من لقطة ميكي ماوس الي يديرو فيها المزينات للعرايس او تلقيها متكتله طبقات طبقات ردو بالكم تاخدو كريم اساس افتح من لونكم لان بيقلب ع رصاصي ضروري تراعو لون رقبتكم ف كريم الاساس ولما تجو تحطو الاساس ع فك الوجه استنو شويه لو امتصت البشره الكريم معناها ميه ميه يناسب بشرتكم ولكن لو بشرتكم ما امتصت الكريم هذا ردو بالكم اتفكرو اديروه لان ح يبقع الوجه ويخليه متكتل ف مناطق دون مناطق من الوجه يعني ضروري تنتبهو للحكايه هادي؛؛
  • النقطه المهمه ف الاساس هي الدمج الصحيح لما بتوزعو كريم الاساس ع وجهكم اما ب الفرش او ب ايديكم الي يناسبكم طبعاً حطو الاساس ع كف الايد من داخل وسخنوها ب صوابكم يعني حركو الكريم ع كف الايد تاخد حرارة الجسم علاش انديرو هكي باش لما تحطوها ع وجهكم تبدا ساهله ف الدمج وبدون ما تتكتل ولما توزوعها تكون ع برا لتحت مش لفوق غلط يعني لما تفردوها وتدمجو الاساس من الخدود نزلوها لتحت للفك والرقبه ما تنسوهاش مهمه لتناسق ف للون لان لو بديري الوجه فقط يبدا زي الماسك او رسوم المقنع الاخضر كان زبطوه ردو بالكم؛؛
  • ونبي انبهه ع نقطه انه لون كريم الاساس يكون نفس لون البشره ب الزبط والي بشرتها بيضاء هلبا تاخد اغمق من لونها بدرجه واحده فقط فقط باش ما يبان الوجه شاحب او اصفر اتقول مومياء والسمراء ارجوكم ماتفكرو تاخدو كريم اساس افتح من لون بشرتكم رجاء خاص لان حبيباتي ح يقلب للون ع رصاصي ومش حلو خودو نفس لون درجة بشرتكم ب الزبط ولو تبو اضاءه للوجه اتحطو هايلايت افتح من بشرتكم بدرجه واحده تحت العين يعطيها اضاءه حلوه للوجه؛؛
  • ب النسبه للباودر ينطبق عليها نفس كلام ع الاساس بس لو خدينا كريم اساس نفس لون بشرتنا ب الزبط او اغمق من بشرتنا بدرجه هنا بس ناخدو الباودر افتح من الاساس بدرجه واحده فقط فقط تعطيها اضاءه اكثر؛؛
  • ف حالة ما لقيناش درجة مناسبه لبشرتنا من كريم الاساس مافيش مشكله ناخدو درجتين من كريم الاساس واحده اغمق من بشرتنا بدرجه واحده والتانيه افتح من بشرتنا بدرجه واحده وندمجوها مع بعض تعطينا لون رووووووعه ننصح بدمج الاساس هلبا يعطيكم لون لبشرتكم طبيعي وتغطيه احلا؛؛
  • طبعاً استعمال كريم الاساس يفضل يكون للمناسبات فقط لان بشكل يومي يتعب البشره ويهلكها ويسكر المسام ويطلعلها حبوب يعني للاستعمال اليومي انسب شي البي بي كريم هي كريم مرطب بلون خفيف اول ما تحطيها ياخد لون البشره وتقدري تحطي منها طبقات لتغطيه اكثر ومناسبه للاستعمال اليومي بدون ما تهلك البشره ولا تسكر مسامها؛؛
  • حاجه اخيره ما تفكرو تستعملو كريم الاساس بدون باودر ردو بالكم لان اي كريم بتحطو بدون تثبيته ب الباودر ح يزيت ويسيح خاصةً للبشره الدهنيه ضروري اثبتو ب الباودر؛؛بس لو تبو تستعملو الباودر بدون كريم اساس عادي ما في مشكله عكس كريم الاساس؛؛

وبس حبيباتي بوست طويل تعبت ف ترتيبه وكتابته بس شرح مفصل ومبسط ع اخر لاختيار لون الاساس والباودر المناسب لبشرتكم اتمني الافاده للجميع دومتم بود مزمووووزاتي الحلوات اوووهبكم نفره نفره…

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Floating Social Media Icons by Acurax Wordpress Designers
error: Content is protected !!