‫خطوات مكياج المناسبات [1]

مسائكم ورد بنوتاتي ومداماتي،،
حبيبات قلبي هذا الستيت اكيد منتظرينه مني هلبا عضوات وهو خطوات المكياج الصحيحيه او بترتيب شني الي تحطيه الاول والتاني ارجو منكم تركيز ف البوست لان ح نتعب ف الشرح بتفصيل الممل وحاجه تانيه انا ح نشرح كل الخطوات وطبعاً ع رغبتكم تقدرو تاخدو بيها كلها او تنقصو امر اختياري لان كل واحده وذوقها انا ح نشرح خطوات الصحيحه ب الترتيب للمناسبه لان فيما سبق شرحت ع خطوات مكياج الصبح هيا كلكم اذانكم صاغيه ليا،،

224

  • اولاً ـ وجهك يكون نظيف :
    يعني بشره نظره ومشرقه وحاولي قبل مناسبتك اديري ماسك مغدي ومفيد لبشرتك ويكون وجهك خالي من كل الشعر الي فيه تماماً ارجوكم مرات انشوف ف مناسبات حالة العدو يعني شعر وجهه قريب ترسم لحيه وتلقيها حاطه فل ميكب وهو الكارثة لانه اي كريم حتي لو كان كريم ترطيب فقط راهو يا حبوبات يبين شعر الوجه دبل يبان مفنص مش حلو ضروري تكوني محوله شعر وجهك قبل مناسبتك اقل شي ب3ايام والي حساسه بشرتها ب اسبوع ع حسب طبعاً،،
  • تانياً ـ الترطيب او البيس والبرايمر:
    بنفسر معني الكلام ارجو التركيز الترطيب=بشره جافه بمعني الي بشرتهم جافه ضروري كريم ترطيب لان بدون كريم ترطيب ح يبانو قشور ف الوجه بعد ماتحطو كريم الاساس والبودره وطبعاً غير الترطيب المستمر ف لليل وشرب الميه؛؛  البيس او البرايمر=بشره الدهنيه او المختلطه يعني ضروري لثبات المكياج لبشرتهم دهنيه قبل بيس او برايمر يسكر المسام ويقلل الزيوت ف البشره ويثبت المكياج طول فترة المناسبه،،
  • ثالثاً ـ كوركتراو الكونسيلر:
    الكوركتر شرحت عليه  وقلت انه هو المصحح بمعني تصحيح عيوب البشره خاصة الي عندهم هالات سوداء هلبا تحت العين والي عندهم اثر والي عندهم حبوب الكوركتر هذا وظيفته انه يصحح اي عيب لون ف البشره اتحطيه قبل الكونسيلر=خافي بحركة طبطه وبعدها حطي عليه الكونسيلر الي هو خافي العيوب ع فكره الي بشرتها صافيه وخاليه من العيوب ما تستحق الكوركتر الي هو مصحح تكتفي ب كونسيلر يكون نوعه ثقيل زي كريولان السداسي او ماك برونق وير او ميكب فورايفر فل كفر،،
  • رابعاً ـ كريم الاساس:
    بس النقطه هادي بنقسمها وبنعطيكم طريقتين والطريقتين صح ويستخدمو فيها خبراء تجميل عالمين بس كل واحده تختار الي ريحها وماشيه عليها وهما:
  1. انك بعد ماذكرت خطوات السابقه وديري كريم الاساس عادي وتبدي ف مكياج عيونك،،
  2. او انك ما تستخدمي ولا شي من الخطوات السابقه وتبدي بعيونك الاول بمعني انك تبدي بترطيب العيون تحطي االمصحح امتاعك وبعده الخافي او بيس العيون وتبدي ف مكياج عيونك بدون ماتمسي باقي الوجه بعد ماتكملي من مكياج عيونك امسحي تحت عيونك المكياج الزايد الي طاح ع خدودك بمزيل مكياج وتكون جنبك فوطه مبلوله تمشي بيها ع وجهك وتنشفيه وتبدي ف حطت المكياج لباقي الوجه كريم الاساس والباودر واحمر الخدود والروج زي ماقلت امر مخير وامشو ع المعتادين عليه،،
  • خامساً ـ الباودر: طبعاً بعد ماتحطو الفونديشن الي هو كريم الاساس ضروري ثبتوه ب الباودر هذا شي اساسي ارجوكم ماديرو الغلطه الي يديرو فيها معظم البنات يحطو كريم اساس بدون باودر راهو اكبر غلط حتي لو ماكنتي اتحبي الباودر بس هادي قاعده ثابته بما انك درتي كريم ضروري اثبتيها ب الباودر ويطلع الفنش احلا حتي لو كان ب لوس باودر يعني الباودر الحره اخف حاجه؛؛بس لو كنتي بتحطي باودر بدون كريم اساس عادي جداً مش اساسي تحطي البودره تحتها كريم اساس خاصة الي بشرتها صافيه حرام ادير كريم اساس تكتفي بالكونسيلر =خافي العيوب فقط،،
  • سادساً ـ مكياج العيون:
    بنقسمه كدا قسم باش نرضو جميع الاذواق ؛؛
  1. بعد مانفذو الخطوات السابقه بيجينا مكياج العيون و طبعاً اذواق وعدة طرق في ناس ترسم ف حاجبها وبعدها تحط الظل وفي ناس تحط الظل وبعدها ترسم حاجبها الامر مخير؛؛ولكن ف رآئي انا ترسمي حاجبك باش تحددي مساحة العين وتنظفي تحت الحاجب ب الكونسيلر=خافي وبناءاً ع رسمة الحاجب تعرفي كيف تبدي ف ظلالك وتلعبي بدمج الالوان ع جفن العين وماتتعبيش بعدها ف تنظيف تحت الحاجب او تقعدي ترسمي ف الظل من اول وجديد؛؛
  2. بعد ماحطيتي الظل امتاعك ايجي وقت رسم العين والاسهل انك تحددي ب القلم الجفن الي فوق العين وبعدها مشي عليه ب الايلاينر وبما انك امدايره ظل ع عينك ضروري الرسم ب الايلاينر مافيهاش نقاش ولا تقولو مانحبوشي ماتحبشي ماديريش ظل ولكن احسن من تطلع عينك مرغمده لان الظل قوي يبي ايلاينر ضروري يبرزه مافيهاش فتوي ابداً؛؛
  3. بعد مانرسمو العين يجي وقت التكحيل ف ناس ماتكحلش وف ناس تكحل ولكن انا بنقول لاي وحده بدير ظل فوق عينها ضروري من التكحيل داخل العين و الالوان ع حسب العين والظل لو العين صغيره ممنوع عليها تكحل ب الاسود وتكحل ب الالوان الشايني تكون فيها اضاءه والوان فاتحه لو العين كبيره كحلي ب الاسود عادي وتقدري تموهي من تحت العين ب ظل الي يعجبك الامر راجع ع حطت الظل شني يعني مخير ليكم؛؛و الناس الي ماتبي تكحل داخل العين تكتفي برسمه فوق العين فقط بدون ظل ف حاله هادي عادي ماتكحل داخل العين؛؛
  4. بعد مانكملو الظل والرسم والتكحيل انجو للرموش يبو مسكاره في ناس تركب ف رموش وامر مخير ليكم لكن الي يركبو ف رموش ارجوكم ماتاخدو رموش المظله الي عينك ماتقدري تفتحيها منهم راهو مش ب الشبعه الحكايه كل ماكانت حاجه بسيطه كل ما احلا؛؛ وبعدين في طريقتين ف تركيب الرموش في الي يحط ف طبقة مسكاره خفيفه ع رموشه الحقيقيات وتركب وتحط مسكارتها وفي الي تستعمل عكازة او كسارة الرموش وتركب وتحط مسكارتها طبعاً كل واحده كيف متعوده؛؛وب النسبه لعكازة الرموش تستعمليها ف الحالتين سواء تبي تركبي او ماتبي تركبي رموش يعني الي ماتبي تركب رموش تاخد عكازة او كسارة الرموش دوب ماتسخنها ب الاستشوار تجربها ع ايديها وتساوي بيها رموشها تحط مسكارتها تطلع برفيكت،،
  • سابعاً ـ الكونتور والهايلايت:
    ع فكره الكونتور والهايلايت هادي نقطه مخيره وليست اساسيه بتاتاً بنقسمه لقسمين:
  1. كونتور وهايلايت كريمي وهذا انا انقول الي ماعندها خبره ف المكياج ماتجي جيهته بتاتاً لان بتلعبي ف روحك بتطلعي شوش باني ياباني الكريمي للناس المحترفه والي ايدها خفيفه ف حطته ك لاين=خط ويبي دمج بشكل صحيح فلهذا الناس المحترفه تعرف كيف تحطه وكيف تحط لاينات=خطوط لتقسيم وجهها وانا شارحه عليه ف ستيت سابق ب التفصيل الممل،،
  2. كونتور وهايلايت باودر هذا ساهل ف حطته ب النسبه للكونتور تاخدي باودر او ظل يكون برونز ولكن مات= مطفي تماماً وتحاولي تموهي او تنحتي الي تبيه ف وجهك سواء الخدود الذقن تصغير الجبهه تصغير الانف؛؛الهايلايت فكرته انك تاخد باودر افتح من بشرتك من3/5درجات وتبرزي الحاجات الي تبيها ف وجهك من تفاحة الخد او الانف تحت الانف والهايلايت عكس الكونتور عادي يجي بلمعه ك اضاءه للوجه  تعطيك لمعه رهيبه وتبين الخدود اكثر وتنور الوجه؛؛ولكن ولكن الناس الي عندها مسام واسعه تبتعد عن الاضاءه الي تكون بلمعه تماماً لان ح تبينها اكثر وتبرز العيوب اكثر وزي ماقلت ف بوست مفصل ع كونتور مرفق ب الفيديوات،،
  • ثامناً ـ احمر الخدود والاضاءه:
    ح نعاود نشرح الاضاءه الي تكون ع عظمة الخد تعطي اضاءه حلوه للوجه لان ف ناس تستخدم ف هايلايت بدون كونتور عادي جداً تنحط ع تشكن بونز عظمة الخذ وشوي تمرير ب الفرشه ع ارنبت الانف وتحت الانف فوق الشفايف تبرز اكثر الشفايف تعطيهم رفعه اكثر هادي الأضاءه الي تكون بلمعه؛؛ب النسبه لاحمر الخدود ارجوكم تبتعدو ع الوان الموف والفوشيا الفاتح اتقول ماركو خليكم ديما ع الوان الطبيعيه زهري خوخي مشمي برونز ع خوخي الالوان الطبيعيه احلا وارقي بهلبا ع فكره ف هلبا يجي احمر خدود واضاءه ف نفس الوقت،،
  • تاسعاً ـ قلم شفايف الي هو لب لاينر ولب ستك الروج والقلوس الملمع:
    هنا تبدا مسآلة اذواق ف ناس تحب روجها مات مطفي تماماً ف ناس تحب شفايفها بلمعه بس بنعطي معلومه ضروري من قلم الشفايف سواء بتحطي روج او قلوس لان القلم يحدد لاين او خط مزبوبط للشفايف وثبات اكثر ارسمي شفايفك وبعدها عبيهم وحطي روج امتاعك او القلوس الامر مخير ليكم؛؛

وبس ااااااخ دهشت اتمني الافاده للحميع دومتم متألقات اوووهبكم امووواه..

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Social Network Widget by Acurax Small Business Website Designers
error: Content is protected !!