مساؤ ورد بنوتاتي ومداماتي المزموزات؛؛

حبيبات قلبي بوست مفصل ع خافي العيوب وطريقة استخدامه؛؛ 

• الكونسيلر = الكنسيلر نفس المعني اختلاف ف النطق هو عباره عن خافي عيوب للبشره واكثر شي يستخدم تحت العين لإخفاء هالات العين او لو تبي تخفي حبه او الاسوداد الي ف جنب الانف او الي الاسوداد حول الشفايف طبعاً بنشرح بطريقه مبسطه جداً وهي طريقتي؛؛
• لما تبي تاخدي خافي عيوب يخفي الهالات او الحبوب تاخديه اغمق من بشرتك بدرجه يجي درجة للون بيج ع مشماشي خاصة الي عندهم هالات واضحه تحت العين مثلا في ماركة قولدن روز نستعمل فيه خافي الي يجي زي الروج رقم 2رهيب ف اخفاء الهالات وثقيل لان نوعه ستك هذا ف حالة تبي تخفي الهالات تاخديه اغمق من بشرتك ب درجة واحده ؛؛
• اما ف حالة تبي تستخدمي الكونسيلر=خافي ك هايلايت=اضاءه تحت العين يعني اضاء اكثر للوجه تاخديه افتح من بشرتك بدرجتين ينور تحت العين ولكن الناس الي عندها هالات هلبا ضروري تستخدم كوركتر=مصحح تحت الهالات لونه اورنج وبعدها تقدر تستخدم كونسيلر فاتح تحت العين يعطي اضاءه للعين وللوجه،،

1. ـ طريقة استخدام الصحيحيه للكونسيلر: عنده طريقتين
   تستخدمي الكونسيلر ع شكل مثلت او حرف V  زي الي ف الصوره وطبعاً الطريقه هادي تنور الوجه هلبا لان توصل للخد وطريقة توزيعه زي الي ف الصوره تكون ب فرشه يتوزع ماتحطيش ب النقطه لان هذا غلط وبعدها اما طبطبي خفيف بصبعك لين يندمج او تدمجي ب اسفنجة مكياج دمج تكون مبلوله ومعصوره كويس من الميه وتضغظي عليها ب الفوطه وبعدها طبطبي ع الخافي تحت العين بشويه يعطيك تغطيه فل كفر=تغطية عاليه،،
2. الطريقه التانيه تحطي الكونسيلر زي علامة صح √√√ تحت العين وتوزعيه ب فرشه وطبطبي اما بصبعك او ب اسفنجة دمج ميكب،،

• بنقول معلومه انك تحطي الكونسيلر من تحت العين فقط فقط تحت الهالات ماتحطوش فوق العين هذا استخدامه الصح لان فوق العين بيزيد يصغرها ومرات تبدا في زي التجاعيد البايخه خاصة الي يديرو ف ظل اما الي عندها اسوداد فوق العين مع انه مش ح يبان لما تغطي من تحت العين ب الكونسيلر وتحطي بودرتك ب ظل بيج يكون مطفي تماماً من اي لمعه او تستخدمي برايمر فوق العين يفتح الجفن ويصحح اللون؛؛
• حاجه تانيه انك لما ديري كونسيلر تحت العين حاولي قدر الامكان تبتعدي ع خط الرموش السفليه لان الحركه هادي تصغر العين وبعد ماتكملي كونسيلر خودي بفرشة الي مايله شوي زي امتاع الحواجب وظللي خط الرموش السفليه بلون دجة لحميه ع بني فاتح تمويهي العين وتعطيها إحاء العين الواسعه والكبيره لان لما تقربو الكونسيلر من جفن العين السفلي بتبان العين صغيره زي العمشه ولا كيف فيها حاجه غلط اهم شي وصلت الفكر،،
• حاجه ثالته الناس الي عندها تجاعيد تحت العين وجفاف ف البشره ضروري من كريم ترطيب تحت العين قبل المكياج وتاخدي شويه شويه من كريم الترطيب امتاعك تحطي ع كف يدك وتحطي معاه الكونسيلر امتاعك وتخلطيه وتحطي تحت عينك مش ح يتكل بتاتاً الخافي ابداً ح يمشي معاك بسهوله ويعطيك فنش حلو،،
  ـ احسن ماركات ف الكونسيلر ع حسب تجربتي هما : ميبلين. كريولاين. ماك. قولدن روز. ميكب فورايفر. فلورمار. نارس. نيكس. برجوا)
  ـ احسن كريمات ترطيب تحت العين ع حسب تجربتي هما : كلارنس. كلنيك. نوكس. لانكوم فيشي. غارنيه. استي لودر.كريولاين.بودي شوب)
  

وبس حبيباتي دومتم بود واتمني الافاده للجميع اوووهبكم اممووووواه