مساؤ ورد بنوتاتي ومداماتي الحلوات،،
اليوم ح نشرح ع البرايمر او البيس وانحاول انبسط المعلومه باش تفهموها اكثر؛؛

• خلونا نعرفو شني هو البيس او البرايمر هو قاعده للمكياج الاساسيه بمعني الاساس اول شي ينحط ع البشره قبل ماتبدو ف المكياج به علاش وكيف وليش وظيفة البيس او البرايمر هي:-
  – ايخلي مكياجك ايدوم لفترة اطول على الوجة؛وايهيأ البشرة لوضع المكياج؛؛
  – يخلي كريم الاساس يبدا شكلة طبيعي؛يغذي البشرة ويخفف احمرار البشرة؛؛
  – وينفع هلبا للي بشرتهم دهنيه لانه ايقلل افرازات زيوت البشره وايقلل من زيوت اللي تطلع في الذقن والجبهه لان يمتص الدهون ويمنع اللمعان؛؛
  – والي عندها مسامات كبيرة يصغرها؛ويمنع كريم الاساس من انه ايسد المسامات وغيره؛؛
  – لان البرايمر يحتوي على الشمع والسيليكون والبوليمرز يخليه يتجانس مع البشره اكثر ويعطيها ملمس مخملي هذا علاش يقعد المكياج ايدوم اكثر ويثبته؛؛
  – واكثر شي مفيد للناس اللي في وجوهم اثر حب محفور لانه يعبي مستوى الجلد ويقدر يخفي الندبات يعني لو حطيتي كريم اساس من غير البرايمر ايخلي الندب يبان
• انواع البرايمر:-

1. برايمر للوجه كامل
2. برايمر للعيون
3. برايمر للرموش
   
4. برايمر للشفايف؛؛
   يعني لكل جزء ف الوجه ليه برايمر خاص بيه ك اساس للمكياج الي بينحط بس انا ح نخصص كل نوع برايمر ف بوست بروحه افضل واسهل للكل؛؛

• طبعاً ف برايمر يكون شفاف وفي الي يكون ب لون والصوره اتوضح كل لون لشني يستعمل؛؛
• البرايمر الي يناسب البشره الدهنيه يكون خالي تماماً من الزيوت لتقليل نسبة الدهون الي بتفرزها البشره ويقلل من المسامات واصلاً البيس او البرايمر مناسب جداً للبشره الدهنيه؛؛
• اما البشره الجافه تكتفي بكريم الترطيب قبل كريم الاساس ولكن لو عندها مسام كبيره ع الخدود واضحه تقدر تاخد برايمر واتحطه ب طبطبه ع المسامات الي واضحه فقط؛؛
  احسن كريمات ترطيب كلارنس. كلينك. لوريال. بوندس. بودي شوب. لاروشيه. سيفر. جونسون. نيفيا. سيباميد. فيشي.بايوديرما وكذا ماركه حلوه
• طريقة استعماله: هي تاخدي البرايمر كميه صغنطوطه ماتكثروش منه لان كثرته يجفف البشره وتحطيه ع كف ايديك تدلكيه ب ايديك باش ياخد حرارة الجسم وتحطيه ب صبعك عن طريق الطبطه تب تب وتخلوه 5/10دقايق يمتصه البشره وبعدها حطو كريم الاساس وباقي المكياج عادي؛؛
• استخدام البرايمر خلوه للمناسبات فقط لان يقلل من افرازات البشره ويغلق المسام استعماله يومياً يطلعلك حبوب لبشرتك فلهذا يكون ف المناسبات فقط؛؛
• افضل ماركات للبرايمر او البيس: بينفت. اربن دكاي. فورايفر. سماش بوكس. ماك. بودي شوب. كريولاين. انقلوت. كولستار. قوش. ميبلين. برجوا؛؛ وكذا ماركه حلوة و ذكرت الماركات من الرخيص للغالي ويناسب الجميع؛؛
• الصوره الي ف البوست برايمر ماركة فورايفر تقريباً الماركه الوحيده الي دارت برايمر ب لون وطبعاً مممممتاز جداً؛؛
• محلات البيع تلقوه ف محلات الكبيره اكيد زي مورينا. اريج. دنا دبينهامز. انقلوت. كريولاين. والي يعرف محل يزيد يقوله ف الكومنت.
  

وبس حبيباتي اتمني الافاده للجميع اوووهبكم اموووواه