‏الكوركتر [ المصحح في المكياج ]

مسائكم مبروك وعدوكم مهلوك بنوتاتي ومداماتي الطرفونات،،
حبيبات قلبي البوست هذا مستنينه عضواتنا الكرام ح نحاول قد مانقدر نبسطلكم المعلومه ونخششها لراسكم بقوة المكياج ماتخافوش،،

239

  • اول شي نعرف معني الكوركتر الي هو المصحح عيوب والوان البشره يوحدها المصححح او الكونسيلر=خافي الخاص ب البقع والاثار الي تحتاج الي تغطيه قويه؛؛
  • المصحح الخاص بالعين وَ البقع هو بالأساس كونسيلر=خافي بس مخصص لتصحيح لون البشره وهو يكون اول طبقه ع الوجه وتحت العين بعد كريم الترطيب مباشرة يعني يستخدم ك بيس للكونسيلر= خافي بمعني قاعده تكون تحت الخافي وبعده المصحح ينحط فوقه الكونسيلر الي يكون قريب من لون بشرتنا؛؛
  • فيه بعض الماركات تخصص المصححات اللونيه بستاند=مجموعه وَخافي العيوب بستاند=مجموعه يعني ف ماركات تلقيها امدايره الكوركتر=مصحح بروحه والكونسيلر=خافي بروحه ولكن هي نفس الشي؛؛ و من فتره كانت المصححات تقريباً يستخدموا في اللي بروفيشينال وَتلقيها بالماركات الخاصه بالمحترفين؛ أما توا تلقوها حتي ف الماركات العاديه وَالراقيه نزلوها لإستخدامات الأفراد الشخصيه وتلقوها مفرده أو بشكل باليت=علبه صغير فيه 4/5الوان،،
  • توا ح نتكلم ع كل لون شني وظيفته ولشني يستخدم؟؟
    ـ يستخدم لتغطية الكدمات ، الهالات السوداء ، الوحمات ، النمش ، الكلف ، الحروق ، التاتو،، 
  • الألوان الأساسيه هي : “أخضر، برتقالي، أصفر، موف ، زهري ، أزرق” فيه تفرعات من الالوان هادي زي المشمشي ، البيج المصفر …. الخ بس انتم ماليكمش علاقه بيها لانكم بتلخبطو ارواحكم ع الفاضي وتبي احتراف ف حطتها ح نكتفي بشرح الالوان الاساسيه؛؛؛
  • لازم نتبعو قوس الألوان الي ف صورة الستيت يعني توا شوفو معاي القوس الالوان ع شكل حلقه كل لون ب الدائره يقابله لون ثاني بمعني الالوان الدافيه تقابلها الوان البارده والعكس صحيح؛؛
  • يعني مثلا اللون الاحمر يقابله للون الاخضر معناه لو عندك اي حبه كيف طالعه او وجهك متفرفط من حاجه ومسببلك احمرار تغطيها ف الاول ب الكوركتر=مصحح الاخضر ح يطفيلك الاحمرار تماماً وبعدها حطي عليها الكونسيلر=خافي الي نفس لون درجتك ح تختفي تماماً؛؛والعكس صحيح لو عندك وحمه خضراء وتحطي عليها كوركتر احمر ح يخفيها ويطفيها وبعدها حطي عليه كونسيلر امتاعك عادي؛؛ و القاعده تمشي ع كل الألوان في القوس..
  • توا نشرح كل لون الي ف الدائره او الباليت لشني؟؟
  1. الكوركتر الأخضر: لتغطية البقع الحمراء مثل الحبوب وَالعروق الحمراء وَ غالبا يستخدم بالوجه مش تحت العين وكان استخدم تحت العين بيكون ف جزء معين مثل قرب الانف لانه تحت العين مش حلو نهائياً؛؛
  2. الكوركتر الأحمر: قلت للبقع الخضراء مثل الوحمات الكدماتً ولبعض البشرات السمراء للغايه ( السوداء ) هالاتهم تكون خضراء يعني تقدري تغطي الهالات امتاعها وَ حتى البقع المخضره الي كل الوان البشرات؛؛
  3. ـ الكوركترالبرتقالي: يستعمل للبقع الي تكون مايله ع زرقاء او الي عندهم هالات زرقاء تحت عينهم بشكل رهيب تحط منه وهو مناسب للبشره العربيه عموماً يعني بشرتنا احنا والسمراء والحنطيه واعتماداً ع لون الهالات لو زرق تستعمل كوركتر اورنج؛؛
  4. ـ الكوركترالأزرق: يغطي البقع البرتقاليه وهو مناسب للبشره البيضاء الأوروبيه يعني الحمر معناها ماتقربوه انتم لان يبي بشرة الاروب ناصعة البياض الشاحبه ولو بشرتهم فيها احمرار هو يطفيه للون الازرق؛؛
  5. ـ الكوركتر الموف: يضوي شحوب البشره إذا كانت صفراء بعني البشره الباهته هلبا هو الموف يعكس لونها ويضويها زي اصحاب البشره الاسيويه التشاينز يعني حتي هو مش ليكم انتم؛؛
  6. – الكوركترالأصفر: يغطي البقع الموف بمعني كان هالاتك موف مايلان لبنفسجي إستخدمي كوركتر أصفر وتقريباً يليق بأغلب أنواع البشره لأن تحت العين غالبا يكون فيها عروق موف ويستخدم ايضاً للهالات البنيه؛؛
  7. الكوكترالزهري: نادر الإستخدام ويناسب الهالات الشاحبه الرماديه وَ ممكن المائله للأخضرار ولكن صعب استخدامه للغايه خاصه انه ممكن يعطي نتايج عكسيه ويخلي الهالات موف بدل ما يصحهها و لكن لو تخلطوه مع برتقالي ممكن يعطي نتائج أفضل؛؛
  • يا بنوتاتي ومداماتي ب نبه ع حاجه ف استخدام الكوركتر=مصحح مش لكل الناس يستخدم يعني الي تستخدمه تكون بشرتها فيها مشاكل وتصبغات شديده وهالات شديده جدااً مسوده مزرقه الي بشرتها صافيه او هالاتها عاديه خفيفه تكتفي ب كونسيلر=خافي فقط يغنيها وخاصةً يكون فل كفر ح يخفي كل شي ارجو الحذر من استعماله راهو سوء استعماله يلبز الدنيا كلها تطلعي البرتقاله ولا الموزه ولا الخيار ولا البدنجاله ردو بالكم؛؛
  • استخدامه نعاود نبسط يستخدم اول شي بعد ماترطبو كويس تحت العين وتتشربه بشرتكم بعدها اول خطوه الكوركتر=المصحح وعن طريق الطبطبه وبعدها حطو فوقه الكونسيلر=خافي الي يكون نفس درجتكم يعكس للون معاه وب الطبطبه ب اسفنجة دمج وما تستعملوه للوجه كله لا ف مكان المحدد تغطيته فقط؛؛حاجه تانيه لما تبو تاخدو كوركتر يخفي بجد ويدير شغله خودوه ف ماركات الهاي اند يعني الغاليه لان الرخيصه مجرد الوان مش ح تخفي واحسن كوركتر مشهور هو باليت فورايفر او ماك ننصحكم بيه وحتي كوركتر ماركة كريولاين ممتاز جدا وارخص من ماك وميكب فورايفر،،

وبس اتمني الافاده للجميع اوووهبكم امووووواه

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Social Network Widget by Acurax Small Business Website Designers
error: Content is protected !!