خطوات مكياج الصباحي

صباحو ورد بنوتاتي ومداماتي الطرفونات؛؛

حيبات قلبي بوست خفيف ع خطوات مكياج النهار؛؛

225

  • اول شي مش مقتنعه بكلمة او جملة مكياج بناتي او مدام هادي جمله خاطئه وسمعتها ف ليبيا بس انقوللكم السبب لان اساساً مافيش الحاجه هادي ف عالم المكياج مافرقو مابين بنت ومدام بس حط قواعد صحيحه يمشي عليها الكل وهي طلعت الصبح تبي حطتها والعشيه او ف لليل لمناسبه تبي حطتها مايناسب تقاسيم وجهك وشني تفضلي شخصياً يعني في الي يحب الاوفر وفي الي يحب البسيط في المناسبات ومش غلط هي مسآلة اذواق ولكن الغلط هو ان انديرو اوفر بطريقة بشعه زي المهرج هي الكارثة ولا انحطو مكياج الصبح بسطول الستوك ع وجههنا اهنا الغلط والطامه الكبره وطبعاً كل ماكان المكياج سمبل كل ما بين جمال تفاصيل الوجه واكثر رقي للمرآه؛؛
  • انجو لبنوتاتي الي طلبو مني شني انديرو واحنا ماشين للجامعه ب النسبه للبنات الي تمكيج الاساسيات الي تحطها وهي واقي شمس زي اسمك هادي تحفظيه وقاعده ثابته الحمايه اولاً للبشره بعدها المكياج بنوضح حاجه ع الواقي ف الي تقولي يا جود الواقي يزيت ع وجهي وهو يبي كل ساعتين تدهني منه والا يقلب بنتيجه عكسيه به الي مكيجه كيف ادير تمسح وتعاود من جديد اكيد لا ولكن ف حل وسط يرضي كل الاطراف وهو ابتكار خبراء التجميل البي بي والسي سي والدي دي ف كريمات الاساس والباودر وطبعاً شرحنا عليهم ف المدونه شرح مفصل يعني عادي نستغنو ع الواقي الي يزيت والي يبي كل ساعتين انديروه وبيسحن كبدنا ب كريم بي بي زي مثلاً بي بي ميبلين  او غيرها من الماركات العده فيها بي بي او سي سي او دي دي الي يريحكم ف الاستعمال وقبل ما نحطو مكياج ع وجهنا ناخدو مكعب ثلج مية ورد او مية عاديه الي يريحكم ومرروها ع وجهكم ممتاز جداً ف قبض المسام ومحافظه ع بشرتنا من المكياج وتعرضها للشمس؛؛
  • انكملو باقي الخطوات للمكياج الصباحي حبيباتي مايكون اكثر من كريم خفيف جداً زي بي بي والي مايحب كريم يستعمل باودر يكون كومبكت اتنين ف واحد وتغطيه حلوة للبشره بعده بيكون مكياج العيون الي تحب ترسم عينها اتكون رسمة كات لاينر خفيفه رقيقه ع جفن العين من فوق وهي تحديد للعين فقط يعني ما تحاول ترسم عينها زي الساحره شعشابونا احرف من الصدرات وف عز القايله غباره مغبره والي ما تحب ترسم تكحل عينها من داخل ومش شرط اسود خاصةً الي عينها صغيرة يكون بلون شايني اضاءه اخضر ازرق تركوازي الالوان الي تعطي مساحه للعين وبعدها انجو للرموش بما انك درتي كريم او باودر من غير ماتفكري ضروري المسكاره لان رموشك بيكونو لونهم مجير اتقول مغطسات ف دقيق ف ضروري المسكاره حتي لو ماتبي تكحلي ولا ترسمي عادي تكفي المسكاره انجو للحواجب انا ضد القلم وتاتو سواء جل ايلاينر او ايلاينر خطاط امتاع الحواجب سيئ ف الاستعمال ويضر الحاجب انسب شي للاستعمال اليومي للحاجب اما مسكارة الحواجب او ظل الحاجب به انجو لاحمر الخدود ردي بالك اتفكري ف الوان الاحمر والفوشيه ف الصبح لان بتطلعي زي ماركو ب الزبط ديما الوان درجات البرونز اللحمي ع روز طبيعي جداً يبان ع الخد وطبعاً اخر شي الشفايف وهي معروف الوان الصبح الترابيه اللحميه الروز الي ف درجات اللحمي اما روج الصدرات القهوي والعنابي والفوشيه والاحمر فكوني منه اضبح من بعيد زي السمافرو،،
    وبس حبيبات اتمني الافاده للجميع اوووهبكم امووواه

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Social Media Widget Powered by Acurax Web Development Company
error: Content is protected !!