صباحكم ورد وزها خاطر بنوتاتي ومداماتي الطرفونات حبيبات قلبي انا خديت طريقة البروتين للشعر من الارتست مهارزق والتعليمات الي بعد ما تستعملي البروتين تلتزمي بيها؛؛
- اول شي اغسلي شعرك 3مرات بجونسون للاطفال ولو شعرك كان مدهون بزيت اغسليه حتي 10 مرات ضروري تكون فروة الشعر نظيفه جداً جداً لا عليه زيت ولا سيروم ولا كريم؛؛
- تاني شي تجففي شعرك ب الاستشوار وجفيفه كويس كويس ما يكون لا مببلول ولا حتي فيه رطوبه بسيطه يكون الشعر ناشف تماماً؛؛
- ثالت شي حطي مادة البروتين في صونيه بلاستيك بعدين شدي بالخصله ادهني شعرك بالبروتين كويس كويس بالخصله يعني شبعي كل خصلات الشعر بالبروتين كويس ما تخليش ولا طنطوشه بدون بروتين؛؛
- رابع شي خلي البروتين ع شعرك مده حوالي من ساعه الي ساعه ونص؛؛
- خامس شي بعد ما تمر الساعه ونص خودي الاستشوار وديري شعرك خصله خصله يعني جففي شعرك ب الاستشوار بالخصله كويس كويس بدون تمشيط بالفرشه باش ما طير مادة البروتين من شعرك جففي شعرك بالخصله بالكامل 100% في 100؛؛
- سادس حاجه واهم نقطه خودي الفير الي هي لاسترا مرريها بالخصله ع شعرك وكل خصلة شعرك بروحها تفرديها ب لاسترا من 25/30 مره وتكون درجة حراره عاليه اعلي درجة حراره ف لاسترا الي عندك ولو حسيتي روحك انه قصرتي ف فرد شعر ب لاسترا مرريها ع شعرك مره تانيه لو درتي لاسترا كويس لشعرك اضمني فرد 100 في الميه؛؛
- سابع شي بعد ما درتي لاسترا لشعرك خليه ربع ساعه وبعدين اغسليه كويس كويس بالبلسم فقط لاغير اليوم الاول تغسليه ب البلسم امتاع الشعر فقط بدون شامبو وبعد 4 ايام اغسلي ب الشامبو والبلسم عادي وحطي سيروم عليه والاهم 3 الايام الاوله ما تشدي شعرك بتوكه سواء كلبس او استريتشه لان التوكه تطبع ع الشعر المفرود وتاخد فورمه ،، وبعد ما تغسلي شعرك حففي من الاطراف باش يتحول التقصف وب اذن الله ح تاخدو نتيجه مرضيه جداً جداً جداً شعرك ح يكون لامع وحرير بدون تقصف ولا هيشان،،
التوقيع:- خبيرة التجميل مهارزق،،ـ
- يعني لو ما تقدري تمشي وتدفعي يد العامله للمزين استعيني ب اختك او صديقه او قريبتك اديره ليك افضل لان صعب اديريه بروحك ع كل شعرك؛؛
ـ التعليمات بعد استخدام بروتين الشعر
- اول شي ضروري تاخدي شامبو وسيروم خاص للبروتين متوفر ف الصيدليات ومحلات الزينه ف ميزران او الحراري بن عاشور جرابه يعني الشامبو والسيروم يكون خالي تماماً تماما وفي ماركه اسمها ـ Ka1 ممتاز وهذا الي تستخدم فيه الارتست مهارزق؛؛
- تاني شي ما تصبغي شعرك بعد البروتين اقل حاجه اسبوعين والافضل تصكري شهر بدون استعمال صبغه باش تضمني البروتين يقعد معاك وقت اطول وممنوع استخدام الالوان الفواتح بعد البروتين مباشرة لان الالوان الفواتح كلها تستعمل بكمية كبيره من الاوكسجين والتفتيح وهذا ح يسحب كل البروتين من شعرك لو تبي تصبغي يكون ف الالوان درجات الغوامق المتوسطه البنيات والتشكلط والاهم انه تصبغي ب لوريال كاستنق خاليه تماماً من الامونيا ممنوع مانعاً باتاً استخدام صبغه فيها امونيا فقط لوريال كاستنق لانها مش ح تآثر ع البروتين الي درتيه ف شعرك؛؛
- ثالث شي ممنوع الميه المالحه لشعرك يعني لو بتمشي للبحر خودي طاقية خاصة تكون ضد الميه وادهني شعرك كميه كبيره من السيروم ولفي شعرك كله لان الميه المالحه تسحب البروتين من شعرك؛؛
- رابع شي ممنوع استخدام حمامات الزيت والكريم مانعاً باتاً لانك مش ح تستحقيه هو البروتين اساساً معالج للشعر بس لو بتمشي للحمام البخاري عادي ما فيش اي مشكله البخار مش ح يضر البروتين في حاجه؛؛
- خامس شي لو تبي اديري ميش لشعرك يكون قبل البروتين وما ديري اللون فاتح يكون اغمق بدرجه ع المعتاد لان بعد ما ديري البروتين ح يفتح الشعر درجتين خلوها معلومه مهمه ف بالكم يعني الي عروسه وتبي تصبغ قبل عرسها تصبغ قبل البروتين ودير ف حسابها انه لون الصبغه ح يفتح درجتين بعد البروتين؛؛
وبس حبيبات قلبي ان شاءالله وضحت الرؤيه للجميع وحتي المزينات او مراكز التجميل الي معانا يفهموا التعليمات بالحرف باش يقولولها للزبونه،، وك العاده اكيد اوووهبكم امووواه
