‫وصفه لتنعيم الشعر ومعالجة التقصف والهيشان

مساؤ ورد بنوتاتي ومداماتي الحلوات،،
حبيبات قلبي عندنا وصفه ساهله ماهله ومتوفره ف كل بيت فايدة الوصفتين علاج لتقصف وهيشان وتنعيم ولمعه للشعر ب الذات الي شعرهم مدقدق من الصبايغ والميش والسحب حلكم ف البوست هذا وطبعاً الوصفتين عن تجربتي شخصياً؛؛

243

  • الوصفه الاولى ومن اشهر واقوي الوصفات لتنعيم ولمعان وعلاج للتقصف مشهورين بيها الهنود وباكستان هلبا هي (الزبده العربيه) متوفره ف محلات الالبان والاجبان لو مالقيتوها اشرو اي زبده معلبه بس تكون بدون ملح طبعاً الوصفه هادي عالجت شعر امي نبع الحنان الي شعرها مترشق من الصبايغ والميش ونوع شعرتها خشنه شوي ستر ربي الي شعرها كثيف من يومه كان هذا توا الام صلعه ههههه من كثرت الصبايغ والميش وغيره بس الزبده الحمد الله رجعت شعرتها صحيه ومعاش فيها التقصف البشع من الصبايغ واصلاً من اول يوم اديروها اتشوفو الفرق لما تجففو شعركم كيف ناااااعم وملمسه رطب استمرو عليها وادعولي ولله زي السحر و افضل من كل المنتجات والشامبوات وغيره تقدرو تستعملوها حتي للبنوتات الصغار الي شعرتهم كثيفه وخشنه ممتازه ليهم،،
    طريقة الاستعمال ادوبيها وتدهني بيها شعرك بعدها غطيه ب كيسه او طاقية نايلو خليها ساعتين واغسلي شعرك استعملوها مرتين ف الاسبوع خلال شهر واحد ح تشوفو نتيجه رهيبه عجيبه ب اذن الله وتستعمل لجميع انواع الشعر سواء مصبوغ او غير مصبوغ مافي فرق؛؛
  • الوصفه التانيه هي قهوة النسكافيه اي نوع اهم شي تكون نسكافيه مش عربيه ممتازه لتقصف وتعطي لمعه خرافيه للشعر بجد رهيبه تاخدو كاشيك كبير نسكافيه وتخلطوها بميه دافيه بعد ما ادوب تدهنو بيها شعركم ساعتين قبل الدوش وتقدرو تستعملوها مرتين ف الاسبوع..
    ـ ملاحظه: مرات الزبده قويه ماتقدرو تغسلوا شعركم بسهوله فلهدا خودو بيكربونات الصوديوم امتاع الحلويات وحطو منه شويه ع كف ايديكم وخلطوها ب الشامبو واغسلوا شعركم ح تحول اي ريحه او ترسبات من شعركم،،

وبس حبيباتي اتمني الافاده للجميع دومتم بود مزموزاتي اوووهبك

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Floating Social Media Icons by Acurax Wordpress Designers
error: Content is protected !!