صباحكم ورد وزها خاطر بنوتاتي مداماتي الحلوات
حبيبات قلبي البوست ح يعجبكم اكيد بما انه ف فصل الصيف نسبة الرطوبه والعرق عاليه والشعر مستحيل يثبت فيه استشوار ويتشفشف وحالته حليله خاصةً الي عندهم مناسبات توا يعانوا ويمشوا يصرفو ف فلوسهم ع المزينات مع انه ب امكانكم اديرو كل شي ف الحوش ولا جميل حد ☺
- اول حاجه تبي شعرك ثابت ويلمع وصحي وستريت بدون ما يتشفشف هو تعرفي كيف تتعاملي معاه صح وتاخدي منتج مضمون ليه بنحكيلكم ع لاسترا هادي ولاسترا تعني فير لفرد الشعر لاسترا هادي ماركة ريمنجتون فظيعه فظيعه بصدق من اول ما جربتها ابداااااااااع قوتها 410 وما تستحقش استشوار قبلها لان قوتها مشاءالله تنزله ميه ستريت والاحلا انه تعطيه لمعه كآنه الشعر مببلول وتخفي التقصف هادوكا الطنتوشات الباردات انا عندي لاسترا ماركة براون و بيبي ليس مجربتهم حلوات بس لاسترا ريمنجتون توا التوب فيهم واقواهم بكل امانه روووعه ننصحكم تجربوها ونعرف كدا مزينه معاي ف القروب ننصحكم تشرو منها تشتغلوا بيها ع الاقل تستغلوا بحاجه كويسه ومفيده للناس بس نقصو ف اسعاركم المبالغه؛؛
- به خطوات الاستعمال بسيطه ومافيها لا علم ولا ذره انا بنقول طريقة استعمالي والصحيحه للشعر بدون ماتسبب ضرر بعد ما نطلع من الدوش ويكون شعري مببلول ناخد شويه ع طرف صوابعي من بديل الزيت لوريال الي ف الصوره وندهن الاطراف الي تحت لمنع التقصف وينعم الشعر ويفك كل التشابك و نفك فيه ب ايدي ما نمشطش شعري بالمشط هو مببلول لان الشعره بتكون ضعيفه لما تكون رطبه ومببلوله فلهذا نفك وندهن ف الاطراف ب إيديا ونخليه مفتوح يضربه الهواء طبيعي مستحيل نجفف شعري ب الاستشوار هو مببلول لان لما بتعرضيه للحراره الشعر مببلول بيتقصف اكثر فلهذا نخليه يجف ع راحته بعد ما يجف تماماً نبخ شويه من زيت الارغان الي موجود ف الصوره هذا يخلي الشعر ناعم ويعطيه لمعه حلوه ويقلل من الطنطوشات نبخه ع الاطراف من تحت ومن قدام القصه وندلك الشعر بعدين نقسم الشعر 4اقسام ونبدا بالاسترا من تحت لفوق يعني شعري مانقعدش فيه ب الكثير 10 دقايق نكمله كله وبعدين نبخ بختين ب الاسبراي المثبت الفرشه امتاعي ونمشط شعري باش يقعد ثابت لأخر رمق ويطلع بيرفكت استريت وفيه لمعه حلوه بدون الطنطوشات ومستحيل إتآثر فيه الرطوبه بتاتاً ولا يشفشف لا يهيج يقعد ثابت ف مكانه و في كدا ماركة فيها اسبراي مثبت وسيروم للشعر منها،،
لوريال. ماي فير. ويلا. ارغان. ايلفين. زيرو. وكدا ماركه حلوه يعني ما تتقيدو ب الماركات اهم شي تكون نوعيه كويسه؛؛ - و ما ننصحش ب استعمال لاسترا يومياً لانها تهلك الشعر خلوها ف المناسبات افضل يعني اي حاجه تزيد ع حدها تنقلب ضدها،،
ـ وهذا فيديو لميكب ارتست هدي قطان تستعمل ف لاسترا لشعرها بنفس الطريقه شوفوه ح تستفيدو منه اكثر
ـ وهذا في
ديو يعلمكم كيف ديرو الشعر ويفي او كيرلي بالاسترا حلو اتفرجو عليه ح تستفيدو
وبس حبيباتي اتمني بوست مفيد للجميع دومتم بخير وصحه اووووهبكم امووووووواه
