عضواتي الجميلات الانيقات مسائكم ورد وفل؛؛
حبيباتي البوست هذا ح يكون شرح مفصل ومبسط ع عنايتي او روتيني اليومي والاسبوعي والشهري لترطيب الوجه والجسم وح تستفيدو منه ب اتباع الخطوات الصحيحه والي تفيديكم ف العنايه ب بشرتكم اكيد؛؛
- انجو ف روتيني للترطيب او اهتمامي ب بشرتي:-
طبعاً انا روتيني هو الترطيب المستمر لو تنطبق الدنيا مستحيل مانرطب بشرتي وايديا ورجليا هادي مستحيل وحتي انكون تعبانه نخلي ف كريماتي جنب سرير فوق راسي وانرطب بشويه؛؛ولكن الي اهم من الترطيب هو شرب الميه يا بنات غصبو روحكم انا كنت مانشربش بشرتي شاحبه مع انها صافيه بس فيها ذبول وصفراء ميته مافيها حيويه بس من لما بديت نشرب ف الميه يوميا من2/4لتر الحمدالله فرق السماء ع الارض ولله الوجه جري فيه الدم بدا مشرق وحيوي وفيه نظاره رهيبه وحتي اقاربي واصحابي لاحظو الشي هذا انتم جربو حتي شهر وتوا اتشوفو الفرق بروحكم وبعدها معاد تقدرو تستغنو ع الميه لان ح تكون سبب رئيسي ف جمال بشرتك؛؛ - انا انسانه ملوله لآبعد حد مانحبش نستمر ع حاجه واحد كل شهر نغير ف روتين ترطيبي ب الكامل علاش وشني السر انه البشره حتي هي الي ماتعرفوشي إتمل اه إتمل من استمرارك ع منتج واحد طول العمر او السنه وماتعطيكم النتائج الي تبوها انتم لو تلاحظو بروحكم او الي مجربين مستمرين ع كريم ترطيب معين ليه وقت طويل انه ف البدايه كانت ياسلام عليها تعطي ف نتائج حلوه بس مع الوقت تحسي فيها عاديه ومش نفس مفعولها الآول علاش لسبب انها البشره تعودت ع المنتج وعطاتك كل الفوائد الي موجوده ف المنتج معاد عندها ماتعطيك من فوائد بنفس المنتج وع فكره معلومتي من دكتور تجميل وكدا خبيرة تجميل طبعاً يعني كلام مش من راسي وعن تجربتي الشخصيه؛؛
- به كيف انقسمو وقتنا وكيف نهتمو ونرطبو ب كل المنتجات الي عندنا بنقوللكم كيف طبعاً كل منتج اعطوه وقته وحقه يعني عمركم ماتحكمو ع كريم او غسول الا بعد ماتكمليه ب الكامل بعدين قرري انه ناسبك وجاب معاك نتيجه وترجعي تشريه تاني او لا م ناسبك ودوه فاضيه وانه مستحيل ترجعي تشريه تاني النقطه هادي مهمه يا بنات ركزو فيها ماتحكمو ع اي كريم بدون ما تكملوه ب الكامل؛؛
- توا اكيد بتسئلو كيف ياجود تبينا انكملو المنتج وانتي قلتي غيرو ف روتين ترطيبكم كل شهر لآفضل النتائج ومرات الكريم مايكمل ف شهر لان ف كريمات عبوتها هلبا وحجمها كبير بنقوللكم كيف مثلاً ابسط الاشياء انا انرطب حاليا ب كريم بيبانتين مرات اندير اسبوع ب اسبوع هي وكريم بدي شوب مرات اندير شهر بشهر للمنتجات القويه شوي يعني انا ترطيبي الاساسي الي مستحيل نستغني عليه هو كريم بيبانتين نرجع نشريه مره واتنين وعشره عادي لان هذا ترطيبي الاساسي بس انغير عليه مثلاً اندير كريمات تانيه انجربها ونكملها ونرجع ل بيبانثين وهكذا نستمر؛؛
- به كيف نبدو ب كريمات الترطيب اول شي ف كريمات مرطبه نهاريه وتعني انها فيها حمايه من الشمس مسموح نطلعو بيها ف الشمس والنهار وفي كريمات ترطيب ليليه وهادي من اسمها اتكون ف لليل فقط ممنوع مانعاً باتاً نطلعو بيها للشمس لان بتعكس علينا بنتيجه سيئه ع بشرتنا؛؛
- كيف نبدو الترطيب اول مانوض الصبح نمسح وجهي ب تونر مية ورد وشاهي اخضر مغلياته وحاطاته ف بخاخ بعد مانمسح وجهي من الكريمه الي امدايرتها ف لليل؛؛ “لان عمركم ما تغسلو وجهكم و هو عليه كريم يبدا يتمليس وماينظفش وحالتكم حاله ف ضروري تمسحو وجهكم ب قطنه بعدين تغسلوه” بعدين نغسل وجهي ب الغسول المعتاد امتاعي وطبعاً حتي هو نغير ف روتيني حالياً نستخدم ف اتنين غسول نيتروجينا الوردي رهيب ينعش البشره مناسب للبشره الدهنيه والمختلطه ولكن انا بشرتي عاديه وناسبني جداً وغسول التاني لوريال للبشره الجافه والحساسه ف لليل “بتقولو علاش غسول للبشره الدهنيه وعلاش غسول للبشره الجافه بنقوللكم انوازن او نعادل ف بشرتي مابين ترطيبها وعدم تزيتها” لان بشرتي عاديه ف نستعمل جميع الغسولات بكل ثقه ونعادل عادي مافي مشكله؛؛بعد مانغسل بشرتي ما نمسحش ب الفوطه ابداً لان تنشف وتمتص سوائل البشره يعني نحط كريم مرطب ع البشره مببلوله وندلك وجهي بحركه دائريه لين تمتصها بشرتي الكريم ونتيجه تعطيك بشره نظره وحيويه خاليه من الزيوت؛؛ طبعاً بعد كريم المرطب النهاري الي بتحط مكياج تحط الي ماتبي عادي انا مانديرش ف مكياج ف النهار مستحيل انحط ف قلوس خفيف وكان كثر احمر خدود كريمي مش يبدا الوجه حيوي فقط يعني موضوع المكياج مخير ليكم؛؛
- الي يستعملو ف كريمات الارهاق او الهالات لتحت العين يكون استعمالها مرتين ف اليوم مره صبح مره ف لليل يعني تدهنو كريم الترطيب امتاعكم ع كامل وجهكم وتخلو العيون اخر حاجه وادهنوها بكريم امتاعكم؛؛
- بعد مانروح للبيت نمسح وجهي بمية الورد والشاهي الاخضر نخليها شويه ع وجهي مانغسلش ع طول اخر شي نغسل وجهي قبل النوم بغسول لوريال ونحط كريمة الترطيب امتاعي و وجهي مببلول تمتصه البشره افضل انرطب شفايفي ونرطب ايديا و رجليا نلبس شخشير ضروري شتاء وصيف؛؛هذا ب النسبه لعنايتي اليوميه؛؛
- عنايتي الاسبوعيه الي هو السكراب تقشير امر مهم يا بنات وانا ديما انقوللكم ضروري تقشرو بشرتكم سواء وجهكم او جسمكم مش ضروري تاخدو مقشرات غاليه حتي مقشر طبيعي ونزلت كدا مقشر طبيعي مفيد يعني نقشر شفايفي 3مرات ف الاسبوع ونقشر وجهي وجسمي مره ف الاسبوع خلوها نهاية الاسبوع خميس او جمعه افضلكم وطبعاً حبيباتي بعد التقشير ضروري ترطيب حتي بحاجات بسيطه لان التقشير من غير ترطيب ماصار شي قصدي هكي ب تجففو بشرتكم اكثر فلهذا ضروري الترطيب بعد كل تقشير؛؛
- عنايتي الشهريه كيف هو البخار للوجه اندير ف البخار مره واحده ف الشهر ونحط ف قناعي وبعدها نغسل ف وجهي ب المصقع ضروري وانرطب بشرتي؛؛
حبيباتي بنقول ع نقطه هي استعمال جميع الزيوت للوجه او للجسم تكون ف لليل فقط فقط ممنوع ف النهار الزيت يتفاعل مع الحراره والشمس تنحرق بشرتك حرق؛؛ - هذا سستم حياتي و روتيني مع بشرتي مانبيش نسمع كلمة ماعنديش وقت لان ما نحبهاش لا من مدام او بنوته بصدق هادي نفسك وليها حق عليك عادي تقدري تخصصي يوم ف الاسبوع ويوم ف الشهر ويومياً ترطبي بشرتك حتي ف سريرك يا بنات الي تبي بشره نظره وناعمه ماتجيك ب الساهل مش تهملي بشرتك وتستنيها بتعطيك افضل النتائج لا حبيبتي بتهمليها بتهملك المعامله ب المثل:
ـ اهتمام = نعومه وصفاء وبشره نظره
ـ اهمال = خشونه واسوداد وبشره شاحبه
يعني اهتمو ب نفسكم والاهتمام غير مقتصر ع مدام او بنت لا الاهتمام يشمل كل الفئات الاجتماعيه آنسه مدام غنيه فقيره متوسطه حبيباتي ب ابسط الاشياء تطلعو ملكات عصركم واجمل الاشياء خودو الحياة ب بساطه وعيشو كل يوم ويومه؛؛
بوست طويل شويه تعبت ف ترتيبه بس مش خساره فيكم اتمني الافاده للجميع حبيبات قلبي انحبكم كلكم اموواه
