‫جل ديفرين لمعالجة حب الشباب

مسائكم ورد بنوتاتي ومداماتي الحلوات
حبيبات قلبي البوست هذا مهم جداً جداً لكل من سئل ع علاج مناسب لحب الشباب الرؤوس السوداء و البيضاء التجاعيد بس نبي مشاركات من دكتورات الجلديه الي معاي ضروري ف البوست هذا تساعدوني ف تعليقات البنات لان بوست طبي وبيكون فيه اسئله يبي تخصص طب،،

259

  1. اول هام تحذير ع الحامل والي تبي تحمل قريب ممنوع عليها تاخده مانعاً تاماً يعني الي تبي تتعالج ضروري يكون تحت استشارة دكتور واقل شي 6شهور توقف ع العلاج باش تحمل بدون تشاوهات للجنين يعني الموضوع مافيه لعب الحامل والي تبي تحمل ما تاخده بتاتاً؛؛
    ـ وطبعاً الجل يستخدم فقط للوجه ما تجيني واحده ف التعليقات تكتب عادي نستعمله لظهري او ايديا او غيره هو يستخدم للوجه فقط فقط سلم بنياتي افهموا الكلام كويس؛؛
  2. تاني هام انا خديته تحت استشارة دكتورتي ونستعمل فيه بطريقه معينه لان بشرتي صااااافيه مافيهاش عيوب ولا تصبغات ولا حبوب بس اخديته لاسباب معينه وهي الوقايه من حبوب الاسترتس او الدوره او مرات يطلعلي حب رقيق تحت الجلد تحسس من الجو وتغير الميه لاني كل مره ف مكان ونوعية بشرتي تتغير مع مناخ الجو وتتآثر بسرعه فهذا الجل ك حمايه لبشرتي نستخدم فيه بطريقه معينه وماشي تمام التمام بشرتي بيبي سكن الحمدالله وهادي وراثه جينياً؛؛
  •  طريقتي لاستخدام الجل وب استشارة دكتورتي هو مرتين ف الاسبوع فقط فقط وشهر بشهر يعني الشهر هذا درته مرتين ف الاسبوع الشهر الجاي ما نديراش باش بشرتي ما تتعودش عليه لان من العلاجات الي تدمن عليها البشره وبعدين هو مقشر يعني مش كريم ترطيب ولان بشرتي صاااافيه تماماً ف نستعمل فيه ك حمايه وطبعاً يستعمل ف لليل ظلام دامس حتي الضي العادي ممنوع مانعاً باتاً ويبي ترطيب كثيف لان هو مقشر وً لما تطلعي ف النهار اما تحطي واقي او كريمة حمايه نهاريه ضروريه والا ما تعبي نفسك تستخدميه اعطيتكم نبذه كيف نستخدم فيه وعلاش ولشني توا بنعطيكم نبذه ع الجل هذا مافيه وما عليه؛؛
  • جل الديفرين او كريم او محلول هو طبعاً من مشتقات فيتامين(أ) معروفه كريمات مشتقات فيتامين(أ) زي “الرتن” هما كلهم كريمات طبيه علاجيه لحب الشباب بس “الرتن” اقوي من الديفرين واعراضه الجانبيه اكثر من الديفرين وما تاخديش ‘الرتن” بدون استشارة دكتور ممنوع مانعاً باتاً عكس الديفرين امس سئلت دكتورتي قلتها لو حد يبي ياخد الديفرين بدون وصفة دكتور من الصيدليه عادي قالتلي عادي مافيش مشكله بس يعرف يستعمله صح ويتبع بالتعليمات وتعرف نوع بشرتها شني يعني الديفرين اخف من “الرتن” لان قوي جداً ضروري دكتور يكون واصفه ليك يعني جل الديفرين هو عباره عن ادابلين ومن الجيل التاني لمركبات الريتينويد زي ماقلت الي تستخدم ف علاج حب الشباب ومشاكله وطبعاً ف الديفرين في تركزين!!
    ـ ديفرين بتركيز 0.1% وهذا الي واخده منه اخف واحد
    ـ ديفرين بتركيز 0.3% وهذا اقوي شي ف جل الديفرين،،
  • به بالنسبه لفوائد جل الديفرين او مميزاته هي:
    الجل هذا او الكريم مصنف من الكريمات المضاده للبثور البيضاء ولحبوب الشباب يعالجها ويزيلها ويمنع التصبغات بعدها وفاعليته قويه وهو اقل اثار جانبيه من كريمات المعالجه للحبوب زي الرتن يعني اخف منه ف الاعراض الجانبيه وسريع ف النتيجه وامن ع البشره تماماً وطبعاً يحفز إنتاج الكولاجين لان يقوم بتجديد البشره ويقاوم التجاعيد الصغيره ويستعملوه الي بشرتهم حساسه خاصةً ف الشتاء عادي والي عندهم حب شباب او بثور بنسبه خفيفه او متوسطه سواء كانت ملتهبه او لا طبعاً هذا كلام دكاترة،،
  • عيوبه او الاثار الجانبيه لجل الديفرين:
    طبعاً كآي علاج لحب الشباب الموضعيه يسبب بعض الاحيان حرقان ف الجلد او وخز واحمرار البشره وجفاف الجلد وهادي اعراض الطبيعيه لكل علاجات حب الشباب؛؛
    ـ ومن عيوبه انه يقشر البشره ويخليها رقيقه لان بيجددها وبيحول الطبقه الميته والي مصكره المسام والي فيها حبوب فلهذا الناس الي تمكيج بشكل يومي مش ح يناسبهاً بتاتاً لان ماينفعش تعالجي بشرتك من الحبوب وف نفس الوقت بتحطي مكياج اختاري اما هذا او هذا وعن نفسي انا لو كانت بشرتي تعبانه طز ف المكياج ونختار علاجها هو انا بشرتي صافيه ومانحطش ف المكياج الا لو كانت عندي آفنت فقط غير هكي ما يلزمني ولان الجل يرقق البشره بالتقشير ف لو تبو تعالجو بشرتكم الافضل تختارو فصل الشتاء تكون الشمس والحراره اخف يعني ك حمايه لبشرتك وطبعاً مممممممنوع مية مره تطلعي بدون واقي او كريم ترطيب نهاري بشرتك ح يصيرلها تصبغات ومشاكل انتي ف غني عنها؛؛
  • انواع الديفرين:
    في 3 انواع هما الجل والكريم والمحلول الفرق بينهم انه الجل ياخدوه الي بشرتهم دهنيه او مختلطه وعن نفسي بشرتي عاديه بس ديما نستعمل ف منتجات خاليه من الزيوت لان مرات منطقة زون الي هي الجبهه والانف تزيت ف الصيف ف اخترت الجل،
    ـ اما الكريم ياخدوه الي بشرتهم عاديه او جافه حساسه افضلهم،
    ـ والمحلول ماننصحش بيه لان من اقوي التركيبات يصنعوه ف مختبر ك تركيبه بيكون مركز جداً؛؛
  • أكثر كريم ترطيب أمن مع الديفرين هو بيبانتين كريم الي انا نستعمل فيها بس لان بيسبب جفاف يعني ح ترطبي بكريم قوامه ثقيل مرهم او كريم؛؛
  • طريقة استعماله يستعمل فقط ع اماكن الحبوب انا هكي نستعمل فيه ع جبهتي وانفي فقط؛؛
    هذا بوست مفصل ع الديفرين اتمني مشاركات من دكتورات الجلديه الي معانا وان شاء انكون فدتكم بمعلومه

دومتم طيبين صحيحين وطبعاً اووووهبكم امووووووووواه

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Social Media Icons Powered by Acurax Web Design Company
error: Content is protected !!