‏وصفه لتساقط للشعر وتطويله

مسائكم ورد بنوتاتي مداماتي ليلتكم ضاويه ومسعوده وصيامكم مقبول جميعاً اللهم امييين
حبيبات قلبي هادي وصفة لكثافة الشعر ومنع تساقطه ممتازه انا نستعمل فيها وقلت انزلها ليكم تستفيدو بيها؛؛

256

  • الوصفه ساهله جداً مكوناتها بسيطه هي عباره عن عشبة السدره + اكليل + خل تفاح؛؛
  • الطريقه:
    اول حاجه ضروري ترحي السدره واكليل يكونو مرحيات اما ترحيهم بروحك او تاخديهم جاهزات من العطريه مطحونات ديرو الي يريحكم؛؛
  • بعدين تاخدو حفاظه تحطو فيها الاكليل المطحون وعشبة السدره الحق انا انسانه فاشله ف المقادير بس نعرف بعيني يعني حفاظه حجمها اقل من الوسط بشويه عبيتها كلها يعني ديرو المقدار الي يناسب طول شعركم وبعدين صبيت خل التفاخ لين تغطت المكونات لفوق وطبعاً حطيته ف الثلاجه يومين يتنقعو المكونات ف خل التفاح بعد يوم طلعتهم وخديت ماكينة ست البيت وصبيت الحفاظه كلها ف الخلاط وريحتها مع بعض بعدين جبت صفاي وصفيتها كويس وحطيتها ف شيشه فاضيه عندي زي ما انتم شايفين وطبعاً بنحتفط بيها ف الثلاجه لان بخل التفاح؛؛
  • كيف تستعمل تدهني شعرك بيها كله والافضل يكون راسك تحت تدهني بالعكس لتحريك الدوره الدمويه مع مساج خفيف لفروة الشعر بيش تغلل الخلطه ف فروة الشعر اكثر بعدين تلفي شعرك تبي تلفيع بكيسة نايلون به ماتبيش انتي حره انا شخصياً ما نتحملش الكيسه مغطيه شعري ف مانديريش فيها وتقعدي بيها ساعتين قبل الدوش وتغسلي عادي الماسك هذا يستعمل مرتين ف الاسبوع؛؛
  • هل مناسبه لجميع الشعر الخلطه هادي مناسبه للشعر الدهني علاش لان خل التفاح يناسب الشعر الدهني وما يجففاش عكس الشعر الجاف يجفف اكثر به الي شعرها جاف ادير نفس الطريقه بس بدل الخل ادير زيت زيتون او زيت جوز الهند الي متوفر عندك وطبعاً ماما شعرها جاف امدايرتها با زيت الزيتون وماشيه تمام التمام؛؛
  • عشبة السدره هادي عشبه فوائدها لا تعد ولا تحصي ويقولو شجره مباركه بس هي مممممتازه لعلاج تساقط الشعر وطوله وتكثفه اكثر بجد رهيبه تنظف فروة الرآس كويس وحتي لو عندك قشره تعالجها وتقضي عليها وطبعاً خل التفاح معروف لعلاج القشره رهيب ويمنع تساقط الشعر خاصةً الي شعرهم دهني زي حالتي ممتاز ليهم ومايخليش الشعر يزيت بسرعه؛؛
  • بنقول ملاحظه مرات عشبة السدره تجفف شعرك حاجه بسيطه عادي ما تخافيش استعملي بلسم ع اطراف الشعر تنحل المشكله انا نستعمل ف كريمة فاتيكا بالحنه ع اطراف الشعر قبل الدوش رهيبه تنعم وتعالج التقصف حلوه بجد يعني ندير الماسك ع فروة الشعر وباقي الاطراف انحط عليهم كريمة فاتيكا بيش ما يجفش شعرك وتكون فيه لمعه حلوه؛؛
  • وطبعاً كل شي يبي استمرار وصبر خاصة الحاجات الطبيعيه تبي تستمري عليها بيش تعطيك نتيجه حلوه بس الوصفه لو درتيها مرتين ف الاسبوع ح تشوفي نتيجه حلوه لشعرك ويخف التساقط بشكل كبير خلال شهر واحد بس استمرو عليها لان مش سحر بديرها مره وتبي شعرك يكركر وراك زي باربي ايوا فكوني من تخيلالتكم الواسعه امتاع الدعايات لا حبيباتي استمرو ع الوصفات بيش تشوفي نتيجه ترضيك.

وبس عزيزات قلبي اتمني الافاده للجميع دومتم جميلات ومتآلقات اوووهبكم اموووواه

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Customized Social Media Icons from Acurax Digital Marketing Agency
error: Content is protected !!