حبيباتي العضوات عزيزات ع قلبي موضوعي اليوم هو اسباب الكلف وشني علاجه طبعاً هذا تقرير طبي صرف يعني مش من راسي لان حاجه زي هادي مانقدر نفتي فيها ضروري تكون معلومه طبيه من دكتور مختص وهو د.عمر شمس الدين؛؛/ ماتنسوش اديرو شير لكل صحباتكم واقاربكم لان بوست مهم جداً ومفيد من صغار الي كبار السن..
- الكلف هو عباره عن بقع بنيه تظهر ع الوجه زي الصوره اماكن الخدود والجبهه اكثر شي به اسباب الكلف وشني علاجه او الوقايه منه هي::-
- اسبابه:
- الحمل
- التعرض للشمس بفترات طويل بدون وضع كريم حمايه من الشمس.
- البشره السمراء او الحنطيه.
- التاريخ العائلي بمعني الوراثه او لو عندك حد ف العيله جاه الكلف.
- استخدام الشمع او السير لازالة شعر الوجه
- موانع الحمل الهرمونيه ب انواعها وهي
“حبوب-لصقات-كبسولات توضع تحت الجلد-للولب الهرموني” لو كنتي تعاني من الكلف تمتنعي عليهم تماماً مش يسهل عليك علاجه و الوقايه من الكلف لان اثبت دراسات اوربيه طبيه اغلب النساء الي يجيهم الكلف بعد عمر30 هو سببه اما وراثه او عندهم ف تاريخ العيله او اخد موانع الحمل او تعرض للشمس بدون حمايه؛؛؛؛؛؛
- نصائح الكلف:
لان منع حدوثه اسهل بهلبا من علاجه وخاصةً الي عندهم تاريخ عائلي؛؛؛
- ممنوع انك اديري تان=تسمير بمعني انك تحاولي تاخدي للون البرونز عن طريق الشمس وخاصةً الي عندهم تاريخ عائلي مانعاً باتاً.
- ابتعدي ع وسائل منع الحمل بكل انواعها وخاصةً الي عندهم تاريخ عائلي اي عامل وراثي مانعاً باتاً
- لو كنتي حامل قللي قللي التعرض للشمس ب اقصي درجات ممكنه.
- ضروري وحتماً وبات انك تستخدمي كريمات الوقايه والحمايه من الشمس هذا تحفظيه زي اسمك وانا شخصياً ننصح ب واقي شمس سيباميد ماركة طبيه مطورين الواقي يدوم ل8ساعات بدون تكرار عملية الدهن وموجود ف كل الصيدليات فكوني من السبل الزايده ايوا.
- تبتعدو ع ازالة شعر الوجه ب الشمعه او السير او الحلوه انسب شي لازالة شعر الوجه هي الفتل
- ابتعدو ع كل مستحضرات الي تسبب للسع او وخز ف جسمك يعني الي تسببلك زي الحساسيه تبتعدو عليها لان تساهم بشكل كبير ف الكلف.
- قللي الاكل الي فيه الهرمون الاستروجي لان يساهل ف الكلف يعني الاكل الي يكون فيه حليب او حمص او فول صويا او سمسم او شعير اي اكل يحتوي ع هرمون الاستروجي قللو منها؛؛؛؛
- علاج الكلف::-
اكثر عرضه للكلف هي البشره السمراء او الحنطاويه بسرعه ما يآثر فيها تصبغات وحب الشباب والاكزيميا ومشاكل الجلديه اكثر من البشره البيضاء او الفاتحه؛؛
طبعاً علاج الكلف يآخد وقت طويل عريض ومش بسهوله يتعالج ويختفي ياخد مدة سنوات هذا علاش اعطيتكم النصائح اولاً للحمايه منه يعني ماتلعبوش ب وجهكم ولا تغامرو بيه والوقايه خيراً من العلاج؛؛؛
- ع طول حطو كريم واقي للشمس وخاصةً ع الاماكن المتصبغه والغامقه هي اكثر عرضه بتآثر من الشمس.
- ماتحكوش ولا طبطبو اي حبة تطلعكم ما تبلبزوهاش نعرف ايديكم ماتهنيكم بس قامو رغبة الحك لان بعد ماتختفي الحبه ح يقعد اثرها اسود.
- استخدمو مستحضرات تكون فيها نسبة تفتيح غير مضره للبشره زي فيتامين سي او حمض الكوجيك او الاربتون يعني كريم يكون فيه تركيبات هادي وطبعاً بتسآلو دكتور الصيدلي قبل ما تاخدو اي حاجه والتركيبات هادي غير مضره وتقدرو تاخدوها بدون دكتور.
- رطبو بشرتكم ب استمرار خاصة الاماكن الغامقه لان اتجيب فعاليه كبيره ف تفتيح للون.
- استشيرو دكتوركم ضروي قبل ماتاخدو الكريمات هادي من راسكم اقرو كويس انا ما نبيش نهلك حد ولكن الكريمات هادي هي للتفتيح بس ضروري استشارة دكتور رجاء خاص بدون دكتور مش ح نتحمل اي مسؤليه؛؛هي؛؛
- كريم السكينورين skinoren آمن ع البشره ومشاكله اقل من كريم الدوكوين Eldoquin هذا يحسس البشره من الشمس وكريم التري لوما Triluma هذا ممتاز بخلطه ثلاثيه المشهوره يتكون من الدوكوين والرتن وآي والكورتيزون بس هذا استخدامه لفتره محدوده فقط فقط لتقليل احتمال تسبب بردة فعل عكسيه للجلد لان مكوناته خطيره فيها كورتيزون والرتن وغيره هذا مكوناته لو استخدمتيه ع هواك ضاعت بشرتك معاد فيها مايلم بس ارجوكم ارجوكم الكريمات الي سميتها هادي ضروري اتراجعو دكتور قبل ماتاخدوها رجاء خاص لان حتي الدكتور نفسه قال استشيرو دكتور قبل ماتاخدوها رجاء خاص مانبيش نتحمل مسؤلية ولا نسبب ضرر لحد لان كريمات هادي مافيش معاها لعب ماتصكروش روسكم واتقولو ايح ماعنده مابيصير لا بيصير وبيصير وبيصير فلهذا لقد اعذر من انذر؛؛؛؛
- الحل الاخير وهذا الحل الي بشرتها مهلوكه او معدومه تماماً يعني الي مانفع معاها لا علاجات ولاغيره تكون ع اخرها ماينفعش معاها ولا علاج اي حاله مستعصيه جداً جداً وميئوس منها وهذا اخر الحلول هو
(التقشير الكيميائي-الليزر)وطبعاً انا ك نصيحه مني شخصياً ماديروشي ف اي مكان لان مش لعب وفوق هذا كله يبي عنايه فائقه وحذر شديد يعني قبل ما تقررو الحل الاخير ادرسوه كويس ب ايجابياته وعيوبه وتتبعو كل خطوة عنايه بحذافيرها هو الصراحه مايبيش جونا احنا السخون ولكن لو قررتو يفضل يكون ف الشتاء يعني صقع يجمد ويالله الحال يلايم.. - اخيراً اي واحده تبي تاخد البوست تكتب المصدر لان تعبي واسلوبي وكتابتي ب للهجه لليبيه العامه وتسهيل للمعلومه لكل بنات بلادي وبس دومتم بود؛؛؛
واه ماتنسوش دعوة خير لان بوست تعبني ف كتابته وترتيبه بصدق و ك العاده اوووهبكم امووواه
