كيفية اختيار واقي الشمس مناسب لبشرتك

مساؤ ورد وزها خاطر بنوتاتي مداماتي الحلوات
حبيباتي موضوعي اليوم يستنا فيه كل عضوات القروب وموضوع مهم جداً خاصةً ف الصيف ضروري منه هو واقي الشمس ح يكون بوست شرح مفصل ومبسط ع واقي الشمس كيف نختارو النوع المناسب لبشرتنا وح نذكر بعض الماركات الممتازه الي احتلت المراتب الاوله ف سنة2014،ك افضل واقي شمس والي موجودات ف الصوره حاولت انجمع اكثر من نوع ب الصوره لافادة الكل؛؛

255

  • اول شي خلينا نعرفو شني هو واقي الشمس ب اختصار هو كريم حمايه من الشمس يحمي بشرتنا من اشعة الشمس الضاره وملزم ع الكبار والصغار ضروري نستعملوه ف جميع فصول السنه مش الصيف بس؛؛
  • اشعة الشمس تنتج اشعه مرئيه وأشعه غير مرئيه والآشعه المرئيه فوق البنفسجيه = تنقسم لقسمين هما أشعه كيميائيه أ UVA وأشعه فيزيائيه ب UVB
  • به لما بناخدو واقي شمس ضروري تقرو عليه او تسئلوا د.صيدليه انه واقي يكون متوفر بحمايتين أ،ب ضروري لان كل خاصيه ليها مفعول واحده تعكس أشعة الشمس والتانيه تمتص أشعة الشمس الحمايه والنوعين ب اختصار:-
    ـ الحمايه الكيميائيه أ(UVA):-وتعني تحميك من الاشعه فوق البنفسجيه طويلة الموجه بمعني الاشعه الي تسببلك حروق سطحيه لجلد الخارجي للبشره بسرعه لما تقعدي ف الشمس لمده طويله بحمايه ضعيفه الحمايه هادي تمتص هادي الأشعة الشمش فوق البنفسجيه؛؛
    ـ الحمايه الفيزيائيه ب(UVB):-تعني تحميك من الاشعة فوق البنفسجيه قصيرة الموجه الي تسبب ف الكلف والنمش والتصبغات الجلديه وتوسع ف الاوعية الدمويه وتجاعيد الوجه يعني الحمايه هادي ضروري تكون متوفره ف الواقي لان زي ما تشوفو عدم توفرها تسبب هلبا مشاكل للجلد ف الحمايه هادي اثبت وتعكس أشعة الشمس فوق البنفسجيه لعدم تسبب ضرر للبشره؛؛
  •  (SPF) ح تلقو الرمز هذا ع علبة الواقي اس بي اف اختصار لكلمة صن بروديكت ڤاكتور
    (Sun Protection Factor) وتعني عامل الحمايه من الشمس يعني تحددلك قوة الواقي كم من 10 الي100%؛؛
  • توا تبي تعرفو كم لازم تاخدو قوة الواقي خليني انفهمكم ب بساطة انه من فوق50% حولوه من راسكم انكم تاخدوه لان ف منظمة الدواء الفدرالي FDA غير معترفين بنسبة قوة الواقي فوق 50% قالو كل مازادت القوه كل مازادت المواد الكيميائيه ومثبتات تسبب ضرر للبشره لان بتزيد من افراز الزيوت ع البشره تصكر المسام واطلع حبوب فلهذا فوق 50%ممنوع تشروه؛؛
  • بنحدد كل معيار او قوة معينه لاي نوع من البشره
    ـ ديما البشره البيضاء هلبا تاخد قوة 50% تكفيها لان تحمي من الشمس بنسبة 98%؛؛
    ـ اما البشره السمراء المتوسطه تاخد قوة الواقي من 30% الي 40% مناسبه ليها ح تحمي بشرتك من الشمس بنسبة 97%؛؛
    ـ اما البشره السمراء الغامقه تاخد قوه الواقي من 15% الي 20% مناسب ليها وح تحميك من الشمس بنسبة 93%؛؛
  • انواع الواقي: ضروري نقرو ع الواقي قبل ما نشروه اما نوع من الواقي:-
    – في نوعين واحد صن سكرينس (Sunscreens) والنوع هذا مفعوله خفيف وحمايته ضعيفه من الشمس
    – النوع التاني صن بلوك (Sunblocks) وهذا النوع اقوي وممتاز ويحمي بشرتك من الآشعه فوق البنفسجيه؛؛
  • لما بتاخدو واقي شمس ضروري يكون يناسب نوع بشرتكم اما دهنيه مختلطه او جافه حساسه او عاديه؛؛
  • البشره الدهنيه والمختلطه: تاخد ع طول واقي يكون اساسه مائي يعني يا يكون سائل او جل وخالي تماماً من الزيوت (اويل فري) لان البشره الدهنيه معرضه لحب الشباب ع طول تبي قوام الواقي خفيف ويمتصه البشره بسرعه بدون ما يزيد ع الوجه ولا يسبب انسداد ف المسام يطلع حبوب فلهذا يكون واقي مخصص للبشره الدهنيه؛؛
  • البشره الجافه والحساسه:ع طول تاخدو واقي يكون اساسه وقوامه كريمي وخالي من العطور والكحول مش لايسبب حساسيه او تهيج ف البشره او قشور لان البشره الجافه والحساسه تبي ترطيب اكثر من الدهنيه فلهذا الواقي يكون مخصص للبشره الجافه والحساسه؛؛
  • البشره العاديه:ويا بخت الناس ب البشره هادي لان يمشي معاها كل شي وديما تاخد واقي يكون ما بين البينين وسط لا هو جل هلبا ولا هو كريمي هلبا؛؛
  • امتي نستعملوا الواقي تدهنو بيه قبل ما تطلعو من البيت بنص ساعه تمتصه البشره كويس وتبدا بحماية الشمس وافضل طريقه قبل ما تدهني ب الواقي الصبح مرري ثلجه ع وجهك كله وهو مببلول ادهني ب الواقي امتاعك وادلكي لين وجهك يتشرب الواقي كله الحركه هادي تساعد ع عدم افراز زيوت البشره وتحميها من اي كريم او مكياج ينحط ع الوجه لان الثلج يصكر المسام ويحمي البشره؛؛
  • وتستعملوه حتي انتم ف البيت وخاصة وقت تخشو المطبخ تتعرضو للحراره كبيره ضروري تستعملوه؛؛
  • وع فكره تقدرو تستعملو الواقي فوقه بي بي كريم او بعد مكياجكم يعني الي تحط ف مكياج الصبح ي عادي ادهني الواقي امتاعك وحطي مكياجك لكن تآكدي من حماية الواقي كم تدوم ساعه لان في الي تدوم حمايته ساعتين وفي الي اربعه وفي الي سته وفي الي ثمانيه ضروري تتآكدي من مدة حماية الواقي من دكتور لان لو فات وقت حمايته وما جددي تدهني من اول وجديد ح يعكس عليك بنتيجه عكسيه ويزيت ع وجهك ويتآكسد فلهذا ركزو ف النقطه هادي؛ بس ملاحظة بعض من دكاترة الجلديه قالوا ف واقيات ادوم حمايتهم اكثر من ساعتين والبعض الاخر قالوا لا مافيش واقي تدوم حمايته اكثر من ساعتين باش نعطي الامانه في نقل المعلومه،،
  • افضل واروع ماركات ف واقيات الشمس هي: “كلارنس. كلينك. ڤيشي. ايف لاروشيه بوسي. آفين. سيباميد. سيفر. بايودريما. ليراك” اعطيتكم كدا ماركة طبيه ممتازه في واقي الشمس وعندهم ستاند لجميع البشرات؛؛
    بعد هذا كله حسيت روحي ابلة كيمياء او دكتورة تحاليل طبيه ههههه بديت نشرحلكم ف المركبات الكيميائيه مش تعرفو بس ؛؛؛

وبس مزموزاتي شرحت مفصل ع واقي الشمس بطريقه مبسطه اتمني الافاده من البوست للجميع ديرو مشاركة لصحباتكم واقاربكم لان بوست مهم دومتم بود اووووهبكم اموووواه.

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Floating Social Media Icons by Acurax Wordpress Designers
error: Content is protected !!