صباحو قشطه ب العسل اميراتي الحلوات عندكم علم انني اوهبكم نفرةً نفرةً
حبيباتي جبتلكم طريقة تانيه لتنظيف البشره وتنقيتها من كل الترسبات وسهله جداً وغير مكلفه ابداً طبعاً الي ف الصوره هما اسفنجات تنظيف للبشره هكي يجو مجموعه مع بعض ورخاص مش ح يتعدو 10دينار ليبي و الغسول الي ف الصوره من لوريال للبشره الجافه والحساسه كريمي يهبل الغسول هذا يرطب هلبا البشره وخالي من العطر والكحول يناسب البشره الحساسه؛؛
- طريقتي ف تنظيف البشره الحاليه معتمدتها لان انا نغير كل مره بروتين معين ف التنظيف هو نغسل وجهي عادي ب الميه وانبل الاسفنجه نعصرها ونحط عليها الغسول ونبدا ندلك ف وجهي بحركه دائريه من فوق لتحت يعني نغسل ف وجهي ب الاسفنجه تهبل تهبل وتنظف كل الزيوت وخاصة الزيوان الي ع الانف وطبعاً ب استمرار تنظيف البشره مش ح تتراكم الترسبات ع الوجه الي تسبب ف حبوب ولو وجهك فيه حبوب ح يخف مع التنظيف المستمر لان تنظفي ف بشرتك مزبوط وتحول كل القشور المتراكمه ع الوجه خاصةً الي وجهها فيه قشور ح تلاحظ الفرق من اول استعمال بجد ننصحكم بيها تلقوها ف كل محلات المكياج او امشو لمحل الحراري بن عاشور يبيع ف كل مستلزمات المزينات وماتبعه؛؛
- تستخدم الاسفنجه مره واحده ف اليوم للبشره العاديه والجافه والحساسه اختارو صبح او ليل؛؛
- تستخدم الاسفنجه مرتين ف اليوم للبشره الدهنيه والمختلطه مره ف الصبح مره ف لليل؛؛
- والاسفنجه تقدرو تسعملوها لما تبو تحولو قناع امدايرينه لوجهكم اتحوله بكل سهوله وبعده اغسلو وجهكم؛؛
- وانا نستخدم فيها حتي ف سكراب الشفايف انحط الفازلين والسكر وندلك شفايفي تحول كل القشور الي ف الشفايف؛؛
الي بيسئلوني نبو غسول مناسب لبشرتنا ح نقول نقاط تساعدكم ع اختيار غسول مناسب لكل نوع بشره؛؛
- البشره الجافه: ديما خودي الغسول الكريمي الي تكون فيه نسبة ترطيب عاليه يكون اساسه زيتي ف الملمس باش ينظف بشرتك بدون ما يجففها ويسحب الرطوبه منها وابتعدو ع غسولات الي تكون فيها رغوه هلبا او حتي صابون يزيد يجفف البشره ماركة لوريال فيها غسول حلو للبشره الجافه زي الي ف الصوره؛؛
- البشره الدهنيه والمختلطه:خودي الغسول الي تكون فيه رغوه او جل مش ينظف الدهون والاوساخ بدون مايكون قاصي ع بشرتك ابتعدي ع الصابون لان يجففها ويخليها تفرز الزيوت اكثر ننصحكم بغسولات نيتروجينا كلها خاصة ب البشره الدهنيه والمختلطه والغسول الوردي قريب فروووت رهيب عجيب يساعد ف التخلص من الحب لان بمركب الصفصاف والسيلك؛؛
- البشره الحساسه:خودي الغسول الكريمي الي يكون خالي من العطر والكحول تماماً يعني تكون فيه نسبة جلسرين وزيت للوز يرطبها ومايسبب ف تهيجها وف غسول ل لوريال للبشره الحساسه حلو زي الي ف الصوره؛؛
- افضل ماركات للغسولات هي:كلينك. كلارنس. نوكس. بايوديرما. نيتروجينا. لوريال. جونسون. كلين اند كلير. بودي شوب. فيشي وفي كدا ماركة حلوه
وبس سلامتكم وعافيتكم دومتم بخير وسلامه اموووااااااااااه
