صبغ الشعر في البيت وبطريقه محترفة

مساؤ فل اخر الليل بنوتاتي ومداماتي الحلوات

فلذات كبدي البوست هذا منتظرينه مني كدا عضوه طلباته مني وهي كيف نصبغو شعرنا ف البيت بطريقه صحيحه ومحترفه بإذن الله نحاول نشرح بالتفصيل وبطريقه مبسطه تستوعبوها اكثر؛؛

254

  1. اول شي خلينا نتفقو قبل ما نقررو صبغ شعرنا ضروري نعرفو الي يناسبنا يعني ما تجي واحده تقولي نبي ندير شعري زي لون شعر فلانه وعلتانه حبيباتي المنطق هذا غلط مش كل لون يعجبك ع واحده تمشي اديريه لان التقليد ف كل شي مش حلو ديري ستايلك الخاص بيك والي يناسب شكلك ولون بشرتك بالاخص لون الشعر بنعطيكم معلومه انه اول شي يعطي انطباع ع شخصيتك حتي لو كانت فعلاً مش نفس الشخصيه بس معروفه لون الشعر يعطي انطباع ع شخصية الشخص للغير يعني الي بشرتهم دافيه تحس يطلع عليها الذهب اكثر من الفضه تختار الالوان الشعر الدافيه من درجات الشروق الي هي بني محمر تشكلط محمر عسلي محمر الاشقر المحمر يعني الالوان الغزاليه الي تكون فيها لمعة الاحمرار والذهبي،اما الي بشرتهم بارده يعني تحسي الفضه او ذهب الابيض يطلع عليك اكثر من الذهبي تختاري الوان الشعر البارده هي البني او الاشقر الي تكون لمعته بلاتيني او تحسيها تميل للون الفضي؛؛ وطبعاً سيد الالوان هو الاسود لاغبار عليه بس ما ننصح واحده تصبغ اسود ولا احمر هي من الالوان الي تطمس لون الشعر وما يتحولش بسهوله صعب جداً جداً جداً التخلص منه وخلال سحبك للون اعتبري شعرك تريش وادمر تماماً؛؛
  2. تاني شي لما تقررو تصبغو شعركم ما تحاولو ابداً تطلعو من درجات لون شعركم الطبيعي اكبر كارثه لشعرك انه يكون لونه اسود او درجات الغوامق وتختاري فجآه تغيريه للون الاشقر فاتح جداً هادي كارثة ف حق شعرك ويدمر كلياً واي واحده تقولك غير هكي كذاااابه وتبي تهلك شعرك زايد ناقص عندها يعني لما تقررو تصبغو شعركم اختارو لون من عائلة لون شعرك الاصلي وانسب وافضل شي تختاري لون افتح من شعرك بدرجتين ولو تبي تفتحي اقعدي زيدي كل مره تصبغي فيها افتح بدرجتين ع اللون الي قبله صبغتيه وهكذا بس انك تفتحي مره واحده اعتبري روحك وليتي صلعه؛؛
  3. ثالث شي سحب اللون والتفتيح هو صودا كاويه للشعر ويدمر الشعر يغترشها تماماً واي مخلوقه اتقولك غير هكي كذاااابه اي واحده تنصحك بسحب او تفتيح تخيلي ف راسك شكلك وانتي صلعه او انتي مريشه توا تحولي الفكره من بالك؛؛
  4. رابع شي الالوان الفواتح الي من درجات الاشقر عيوبها اكثر من مميزتها هو يبين الشعر متقصف وباهت وميت لا حياة فيه ناشف غير هكي يبي 24/24 ساعه تكوني زي الصداره مكيجه كان هذا تشوفي روحك مريضه وشاحبه هلبا؛؛
  5. خامس شي الي ف شعرهم الشيب ينسو االوان الفواتح من مخيلتهم لان بدل ما تحاولو تغطوه انتم بتزيدو تبرزوه اكثر واكثر فلهذا الي عندها شيب خليك ع درجات التشكلط والبني والبندقي افضلك؛؛
  6. سادس شي لما تبي تصبغي شعرك يكون شعرك مسخ مش نظيف يعني قبل ما تصبغي ايكون شعرك حتي 4/5 ايام مش مغسول ردي بالك تصبغي ع شعر نظيف لان بتحرقك الصبغه وبضري جذور شعرك ف زيوت شعرك تحميك من الصبغه؛؛
  7. سابع شي لو شعرك طويل اضاعفي الكميه تاخدي زوز باكوات صبغه لو شعرتك قصيره او متوسطه خفيفه باكو واحد يكفيك يعني ضاعفي الكميه ع طول وكثافة شعرك؛؛
  8. ثامن شي انه الصبغه الوقت الانسب والصحي لشعرك تصبغي كل 6شهور يعني مرتين ف السنه وهذا انا شخصياً ماشيه بيه من مره لمرتين ف السنه نصبغ شعري وك حد اقصي ك حد اقصي كل 4شهور هذا ك حد اقصي غير هكي في ضرر ع شعرك وع فكره كثرت صبغ الشعر تسبب الشيب وهاذي معروفه علمياً وطبياً؛؛
  • انجو لطريقة صبغ الشعر ف البيت طبعاً ضروري تكون عندك لاوازم او ادوات الصبغه باش تسهل عليك العمليه هو توكات شعر زي الي ف صوره ممتازات يشدو الشعر مزبوط ورخاص+ صونية صبغه+ فرشة الي بتصبغي بيها+ قوانطي+ فازلين+ فوطه قديمه معاش تبيها خليها خاصه بالصبغه+ قفطان او تشيرت قديم خليه للصبغه باش كان تلبزت عادي ما توجعكش 
  • طبعا بتخلطي صبغتك تجهزيها وبعدها تقسمي شعرك الي 4اجزاء يسهل عليك الصبغه و تدهني بالفازلين ع كامل جبهتك من قدام و أوذانك و رقبتك باش كان تلبزتي تمتسح وما تصبغش ف جلدك بعدين تبدي تصبغي من تحت لفوق يعني تصبغي الجزء الي تحت هو الاول لان لو تبدي من الجذور قبل ما يجيك لون موحد ويبدو الجذور افتح من تحت لان الجذور فيهم حراره زايده هذا علاش ياخد اللون بسرعه من الجذور لان الصبغه بسرعه تتفاعل مع الحراره فلهذا تصبغي من تحت وتركبي بشوي تكملي صبغتك لما توصلي للجزء القدامي امتاع القصه خليه ما تصبغيه الا اخر 10دقايق بعد ما تشوفي خدا اللون ع كامل الشعر تصبغي الجذور من قدام وتقعدي تراقبي للون او ما تحسي فتح وخدا اللون ع طول تخشي تغسلي ويفضل تغسلي مره واحده فقط بالشامبو بعد الصبغه وتحطي بلسم الصبغه ع الاطراف 10دقايق واغسلي شعرك بميه دافيه او مصقعه خير وخير تحافظ ع للون اكثر؛؛
  • افضل انواع الصبغه حاولت نحطلكم صوره لكدا نوع صبغه ممتازه ومتوفر ف ليبيا و التوب هي لوريال بجميع انوعها من افضل صبغات العالم الي ماضر الشعر هي لوريال فيها كدا نوع ممتاز وكل نوع ومميزاته عندكم “لوريال اكسلنس” هادي صبغتي المفضله ويقعد لونها لمدة 3 شهور ماتنزلش بسرعه، عندكم “لوريال اكسلنس فوم او موس” هادي صبغه رغوه زي الشامبو حتي لو نزلت ع حوايجك ما تلبزك وهي سريعه يعني الي تبي تجدد لونها ع الماشي واقل ضرر تاخد الفوم، اخر نوع هو “لوريال كاستنق” الي خاليه تماما من الامونيا هاذي افضل نوع الي شعرها مهلوك وخفيف ومتقصف لان ما ضرش الشعر والي عندهم شيب تنفع بيهم مثلاً تاخدي باكو تخلطي نص الصبغه تصبغي جذور الي طالع فيهم الشيب وتخلي باقي الصبغه للاستعمال الي بعده افضل شي ليكم واقل ضرر لان يطلع الشيب بسرعه يطلع ف الصبغه هادي اقل ضرر عن غيرها لان بغداء الملكات وخاليه من الامونيا،اما النوع التاني هي كولستون شركة ويلا معروفه عالمياً ف منتجات الشعر بصفه عامه وكولستون يطلع لونها مزبوط وتعطل ف الشعر انا شخصياً ما نفضلهاش بس ماما ماشيه معاها تمام التمام؛؛
  • الحامل تنسي حاجه اسمها صبغه خلال فترة الحمل حتي لو كانت الصبغه خاليه من الامونيا عادي يعني كان صبرتي وقعدتي من غير صبغه مش ح يصير فيك شي لان البيبي اهم من مية مليون صبغة شعر؛؛
  • لما تصبغو شعركم خودو شامبو خاص بالشعر المصبوغ وفي ماركات اشكال والوان للشعر المصبوغ انا شخصياً نستخدم ف الفيف لوريال لونه احمر زي الي ف الصوره لان شامبو الخاص بشعر المصبوغ يحافظ اكثر ع اللون ويقلل التقصف ولما تغسلو شعرك تكون الميه مصقعه او فاتره لو تبو تحافظو ع للون لمده اطول؛؛

وبس حبيباتي حاولت نكتب بوست مفصل بصبغ الشعر ف البيت اتمني بوست مفيد للجميع دومتم بود اوووهبكم امووووواااااااااه

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Floating Social Media Icons by Acurax Wordpress Designers
error: Content is protected !!