مساؤ فل وطقس جميل برنسيسات
عزيزات قلبي البوست هذا ح يكون مفيد ليكم لان لاحظت ف بنات ماتعرف تقسم او تنظم وقتها ف اهتمامها ب بشرتها من ناحية الاقنعه انا فيما سبق نزلت روتيني اليومي والاسبوعي وكيف تنظمي وقتك ف ترطيب بشرتك اما البوست هذا خاص ب الاقنعه كيف تنظمو مابين قناع وقناع؛؛
حبيباتي الموضوع ساهل وبسيط مش مستحق كل هذا التلخبيط يعني تقدري تقسمي وقتك ونظام اهتمامك ب بشرتك بكل راحه وبساطه؛؛
- يعني انا لما نزل كدا حاجه لاني ادمن القروب مل زمه نعطيكم كدا قناع كدا طريقة اهتمام وتنويع مابين البوستات ولكن انتي ك عضوه تاخدي مني الطريقه او الاقنعه الي تفيد بشرتك وتستمري عليها مش ملزمه تنفذي كل الي نزل فيه باش ماتلخبطي روحك وراسك يدوخ؛؛
- بنقوللكم معلومه وحطوها ف بالكم الناس الي بشرتها صافيه ومافيها اي عيوب تكتفي فقط فقط ادير قناع مره واحده ف الاسبوع سادها لان مش مستحقه تكثر ع بشرتها مرات اضرها من كثرت الاقنعه الزايده ع وجهها فلهذا ناخدو قاعده لو بشرتنا مافيها مشاكل نلتزمو مره واحده ف الاسبوع ب قناع معين يكفينا؛؛
- اما البنات الي بشرتهم تعبانه وفيها مشاكل تصبغات وحبوب وغيره من مشاكل ف البشره تاخد قناع معين وتكتفي من مرتين الي ثلاثه مرات ف الاسبوع ويكون يوم بعد يوم يعني ما ديرو ثلاته ايام ف جرت بعض لا يوم بعد يوم باش ترتاح البشره وتعطي مفعول الماسكات اكثر؛؛
- به نبي انفهمكم حاجه انه مش كل الوصفات او الماسكات ينفع انديروها 3ايام ف الاسبوع او يومين يعني ف نوعية من الاقنعه تكون مره واحده ف الاسبوع حتي الي بشرتهم تعبانه وانا ديما نكتب مع كل ماسك انزله كم مره اديروه فلهذا ضروري نعرفو نوعية الاقنعه الي تناسب بشرتنا وتكون مكونتها تنفع اكثر من مره ف الاسبوع انديروها او لا هذا مهم باش ما تتعب بشرتك؛؛
- ونبي انفهمكم انه حتي ف الاقنعه فيها تجديد وتغير روتين زيها زي ترطيب يعني ما ينفع انشدوها ع قناع واحد طول عمرنا او لمده طويله لان حتي بشرتك بتمل من قناع واحد ومعاش تعطيك النتيجه المطلوبه او نفس النتيجه من اول ما استعملتيه لان مع تعود الماسك ع بشرتك لفتره طويله خلاص اعطاها كل فايده امتاعه ما تستني منه القناع يعطيك اكثر من فايدته ف اول استعمالك ليه فلهذا تجديد روتين مطلوب وهادي حاجه صحيه وينصحو بيها دكاترة وخبراء تجميل بشره نغيرو روتينا كل شهر مثلا الشهر هذا انا استعملت ماسك الحليب ومية الورد مره ف الاسبوع يعني بنديره 4مرات ف الشهر كويس وانشوف نتيجه حلوه منه بعدها الشهر الجاي نغير ع قناع تاني زي قناع الرز المرحي ومية الورد وهكذا نستمرو والقناع الي يمشي مع بشرتك اكثر ويعطيك مفعول حلو بعد مانغيرو روتين شويه نعاودو نرجعوله من جديد وهكذا باش الوصفات تعطيك مفعول اكثر وبشرتك تستجيب للعلاج اسرع وافضل بهلبا والكلام ينطبق حتي ع ماسكات الجسم نفس الروتين؛؛
- ب النسبه للتقشير او صنفرة الجسم والوجه هادي حاجه ثابته مره واحده فقط ف الاسبوع وخلوها نهاية الاسبوع خميس او جمعه افضل باش تعب وزيوت والدهون المتراكمه طول الاسبوع تحوليها تعرفو يا بنات لو تبو بشره صافيه وموحد لونها استمرو ب انتظام ع تقشير وجهكم وجسمكم خلوها قاعده انه مره ف الاسبوع نقشر جسمي و وجهي ولله يا بنات عن نفسي انا بدون اي مبالغه ولا اي مزايده والي تعرفني ح تآكد ع كلامي انا لون وجهي وفك ذقني ورقبتي لون واحد ماعنديش ولا فرق لون ولا تصبغات ولا لقطة وجهي اسمر من رقبتي ولا رقبتي اسمر من وجهي لما تشوفو وجهي مع رقبتي ماتقدرو تفرقو من اللون الموحد وجسمي كله نفس الشي الحمدالله هذا لان محافظه ع صنفرة جسمي و وجهي ب انتظام مره ف الاسبوع وشرب الميه وترطيب المستمر يعني بشرتكم تهتمو بيها تعطيكم نتيجه حلوه وجمال صفاء ونقاء ولون موحد اما يا بنتي بتهمليها ما تحلمي من الاساس لا ب بشره نظره ولا لون موحد خودي مخدتك وارقدي احلمي افضلك يعني الاهتمام يكون ف روتينكم المعتاد ما تتذكري فجآه تهتمي بنفسك ع خاطر عرسك بعد شهر او شهرين لا حبيبتي الاقنعه والعلاجات ماهو مارد سحري باش بيوحد لون بشرتك وبيصفي وجهك وشعرك بيطول ف وقت قياسي لا يا بنتي مفهومك خاطئ حتي (جني) امتاع علاء الدين مايقدر يلبي طلبك فلهذا الاهتمام نخلوه لنفسنا احنا لشخصنا ولذاتنا لا ع خاطر راجل ولا ع خاطر حد يعني لما توقفي تشوفي نفسك ف المرايا تفرحي وتبتسمي تكوني راضيه ع نفسك شكلاً وموضوعاً وثقتك تزيد اكثر واكثر وتعزيزي قوة شخصيتك فلهذا كل البنوتات وحتي المدامات اهتمو ماتقولوش ماعندنا وقت لا حبيبتي لو بتخصصي وقت حتي نص ساعه ف يوم كامل لنفسك يكون رضا لنفسك انا مانحبش البنات او المدامات تبدا مهمله ف نفسها يركبني مية عفريت ولله مرات لساني ما يهنيني حتي ف العيله تلقيني امدايرتلهم خطبة الجمعه وغصباً عنهم يديرو خاصةً الي عايشين معاي ف البيت كان درت حاجه ديما نعزم عليهم ب الواحده فلهذا نهتمو ب انفسنا ونشجعوا بعض خاصةً البنوتات يشجعوا امهاتهم واخواتهم تلقوا روحكم مهتمين ومتعودين واصلاً يوم ما تهمتي او ماترطبي تلقي ضميرك يآنب فيك تنوضي غصباً عنك اديري هي مسآلة تعود تمشوا بسستم معين ف حياتكم يكون منظم ونعرفوا ب الزبط الي نبوه لانفسنا صدقوني ح تعيشوا ف راحه وانسجام تام؛؛
- حاجه اخيره ف نوع من البشرات تكون عندها حساسيه من مكونات طبيعيه معينه يعني ف بنات تتحسس من قناع يكون فيه عسل او ليمون او خميره او دحي او اي مكون تاني ممكن يسبب تحسس لبشرتهم كيف انديرو لو تحسسنا من قناع معين عادي ما ترعشو ارواحكم لو لاحظتوا بعد القناع وجهك بدا احمر وبقع خفيفه حمراء او حراره تحسي بوخز بسيط تاخدي ثلجه مرريها ع بشرتك تهدي الوضع وتدهني بمرهم فوسيدين(الاسد)ف لليل طبعاً ح يهدي التحسس والتهيج ويفضل اي قناع يكون فيه المكونات الي ذكرتها ديرو تست لبشرتكم تحت الذقن خلوه ساعه لو وجهك ماصارله شي اوكي ديري القناع اما لو بشرتك صارلها تحسس نستغنو ع عليه ومانستعملوه لتفادي تحسس وتهيج البشره؛؛
وبس حبيباتي حاولت انلخص قدر الامكان بكلام مفيد وتعرفو كيف تنظمو وقتكم وما تلخبطوا ارواحكم اتمني بوست مفيد للجميع دومتم بخير حبيبات قلبي اوووووهبكم اموووووواه
