الرؤوس البيضاء أسبابها والوقايه منها

مسائكم مبروك وعدوكم مهلوك مزموووزاتي الحلوات
حبيباتي البوست هذا مهم جداً للعضوات الي وعدتهم كيف يتخلصو من الرؤوس او الحبوب البيضاء الي تطلع ف الوجه بدون سابق انذار وح نذكر تجربتي ف الموضوع؛؛

258

  • اول شي بنقوللكم من الآخر ما فيش ولا كريم ولا منتج يقضي ع الرؤوس البيضاء مهما كانت ماركته وهذا كلام انا شخصياً استفسرت عليه من دكتورة تجميل بشره ولا تحاولو تخسرو فلوسكم ع الفاضي عكس الرؤوس او الحبوب السوداء ليها كدا علاج موضعي فلهذا ما تسمعوا لا كلام فلانه ولا علتانه لان خسارة زايده بس ف طرق وقايه من الرؤوس البيضاء ح نشرحها ف البوست؛؛
  • وتوا بنوتاتي ومداماتي بنعرفكم ع الحبوب او الرؤوس البيضاء هي غير الرؤوس السوداء تماماً ولا ليها علاقه ممكن يتشابوه ف الشكل بس المضمون مختلف تماماً لان التخلص من الروؤس البيضاء اصعب من الرؤوس السوداء وتبي حذر شديد اه ما تستهنوش ب الموضوع هذا كلام مثبت من دكاترة جلديه طبعاً و سبب ظهورها ع الوجه او ع اي مكان تاني هي تراكم الزيوت ف مسام الجلد يعني لما ينسد المسام تقعد البكتيريا محبوسه تحت الجلد وتبدا تتكون الحبوب هادي بعد ايام رؤوس بيضاء بمعني الفرق بينها وبين الروؤس السوداء انه البيضاء انسداد كلي والسوداء انسداد جزئي ف المسام وتطلع الرؤوس البيضاء ف اماكن مختلفه من الوجه ع العيون او حولها ع الخدود ع الجبهه ع الذقن جوانب الانف ومرات تطلع ع الصدر والرقبه؛؛
  • كيف نحمو انفسنا من المشكله هادي وعدم تعرضنا للحبوب والرؤوس البيضاء؛؛
  1. اول هام شرب الميه+الميه+الميه بنعاودها الف مره وبنقول شرب الميه العلاج السحري للحبوب هادي وعن تجربه شخصيه تشربو يومياً من 2/4لتر؛؛
  2. تاني هام حبيباتي تنظيف البشره ب استمرار ما نخلو المسام تتصكر ويصيرلها انسداد يعني نغسلو وجهنا مرتين ف اليوم ويكون الغسول تحتوي تركيبته ع حامض الساليسيليك ومن الغسولات الي موجود فيها الساليسيليك او الصفصاف هو غسولات نيتروجينا وخاصةً غسول نيتروجينا الوردي ممتاز جداً وشرحت عليه ف القروب وفي عضوات استعملوه قالولي ممتاز جاب معاهم نتيجه ؛؛
  3. ثالت هام تقشير البشره الي هي صنفرة الوجه وازالة القشره الميته سواء بمقشر تجاري او طبيعي وتكون بحركه دائريه وركزو اكثر ع المناطق الي فيها رؤوس البيضاء لان التقشير يساعد ع تجديد الخلايا وعدم انسداد المسام ويكون مره واحده ف الاسبوع؛؛
  4. رابع هام ردو بالكم اتفكرو حتي التفكير ترقدو ب المكياج ولا تروحو تعبانين تبخلو لان ح تسببو كارثة لبشرتكم لا ليها اول ولا اخر مهم انظفو وجهنا من المكياج ونغسلوه قبل النوم؛؛
  5. خامس هام انديرو تنظيف بشره ب البخار مره ف الشهر لاستخراج كل الزيوت والاتربه والترسبات الموجوده ف الوجه لان البخار يفتح المسام ويساعد ع تنظيفها؛؛
  6. سادس هام لما نرطبو بشرتنا يكون بكريم خفيف او جل خالي تماماً من زيوت لان المراهم الثقيله تسبب انسداد للبشره بمعني لما ترطبو وجهكم كامل نرطبوه بكريم خفيف تمتصه البشره بسرعه ولو عندنا اي قشور جيهة الانف او الفم ناخدو مرهم ونحطوه ع الجيهات الجافه جداً والي فيها قشور اما باقي الوجه انرطبوه بكريم خالي من الزيوت وخفيف ؛؛
  • علاج رؤوس البيضاء ب الوصفات الطبيعيه وفعاله جداً؛؛
  1. ماسك العسل: ممتاز جداً لعلاج للرؤوس البيضاء ويصفي ويعطي لمعه رهيبه للوجه اغسلو وجهكم قبل ب الغسول وميه تكون دافيه تفتحو المسام مش لما تحطو العسل يتغلل داخل المسام وينظفها ادهنو بيه وجهكم ودلكو بحركه دائريه وركزو ع المناطق الي فيها رؤوس بيضاء خلوه من 15-10 دقيقه اغسلو وجهكم ب الميه الدافيه بعدها المصقعه ع طول صكرو المسام استعملوه 3مرات ف الاسبوع الي عندها حبوب هلبا اما الي بشرتها صافيه مره واحده؛؛
  2. ماسك العسل والنخاله: تاخدو شوية نخالة شعير او شوفان تاخدو 2كواشيك كبار عسل+ 1كاشيك نخاله او شوفان وتسخنوه شويه ف الميكروف وبعدها تدهنو بيه وجهكم من 15-20 دقيقه مرتين ف الاسبوع؛؛
  3. ماسك العسل وبياض البيض: هذا الماسك السحري تاخدو بياض البيضه وكاشيك عسل تخلطوه كويس وتدهنو بيه وجهك 30دقيقه مره واحده ف الاسبوع؛؛
    ـ ع فكره كل الماسكات الي ذكرتها تنفع حتي الي عندهم رؤوس السوداء ممتازه جداً؛؛
  • طريقة تنظيف الرؤوس البيضاء هي طريقه المعروفه والوحيده ب الإبره امتاع الخياطه زي الي ف صورة البوست رقم (2) ح نذكر تجربتي هنا بس ارجوكم تفهموا كويس كويس ما نبيش انضر حد فلهذا انركزو كويس؛؛
  • تجربتي ك الاتي الفتره الي فاتت طلعتلي حبتين الصراحه ماعدلتش عليهم واحده فوق عيني والتانيه ع خدي ع المهم بديت انشوف فيها حبه بيضه مشيت لدكتورتي كنت نعالج ع شعري ف سآلتها قلتلها يا دكتوره شني الحبوب هادي بعد الكشف قالتلي هادي حبوب بيضاء بسبب انسداد المسام قلتها اعطيني اي كريم يحولهم قالتلي ماتعبي روحك لان مافيش لا كريم ولا اي علاج تتخلصي منه الحبوب هاذي علاجها تنظفي بشرتك ب استمرار وتكثري شرب الميه,,وصح انا كنت مانشربش ف الميه,, وقالتلي الطريقه الوحيده لتنظيف الرؤوس البيضاء ب الابره ينفتح راس الحبه ويطلع منها الصديد او الماده الي مسببه انغلاق للمسام,,
    وفعلاً يا بنات ولله اله من يوم بديت نشرب ف الميه يومياً من 2/4لتر اختفت الحبه تماماً الي فوق عيني تماماً لان الحبوب او الرؤوس البيضاء مع استمرار تنظيف البشره وشرب الميه تختفي بروحها معاش تلقيها؛؛
  • ولكن لو دارت الحبه رآس خارجي وبانت رؤوس بيضاء ف الحاله هادي فقط نلجؤ للابره ولكن حبيباتي افضل شي ديروها عند دكتور او حد مختص لان مرات الي ايديها مش خفيفه تهلك روحها وتسبب ف ندبه او جرح الوجه فلهذا ردو بالكم
  • تجربتي مع تنظيف الرؤوس البيضاء انا درتها بروحي ولكن بطريقه صحيحه اول شي غسلت وجهي بغسول ودرت البخار لان نبي نفتح المسام وتكون البشره فيها ليونه وساهلة تنظيف اي حبه لمدة 10/15دقيقه بعدها مسحته بقطنه خديت إبرة خياطه عقمتها بجل ديتول وبعدها خديت قطنة ف ايدي لان عمرك ما تمسو الحبوب ب ايديكم تساهمو ف انتشارهم اكثر للوجه بعدها جيت للحبه امدايره ماده دخلت الإبره بشويه وفتحت الرآس الابيض وقعدت نضغظ عليها ب القطنه نطلع ف الصديد والماده وبليت القطنه بميه دافيه قعدت نضغظ عليها طلعت الماده كلها لين طلع الدم بعدها غسلت ايديا وع طول غسلت وجهي بغسول نيتروجينا الوردي وتكون الميه مصقعه مش تصكرو المسام وخديت مكعب ثلج شاهي اخضر دلكت بيه وجهي كله وحطيت الثلجه ع مكان الحبه نبي نتآكد من تصكير المسام بعدها نشفت وجهي دهنت بمرهم فوسيدين لان مضاد حيوي وحطيت ع مكان الحبه شاهي اخضر طحنته بين صوابعي وثبته ع الحبه اليوم الاول مكانها احمر التاني هدت شويه الثالث اختفت مكانها تماما ومشت الامور الحمدالله ولكن زي ماقلت الطريقه هادي اديرها لو كانت الحبه فيها رآس واضح اما الحبوب العاديات اهتمو زي ما قلتكم وكثرو ميه وقللو الزيوت ف اكلكم ح تختفي بروحها بس ما تبلبزوهاش ب ايديكم ولا تحاولو اديرو زي الصوره (رقم 1) لان ح تساعدو ع انتشرها اكثر وبدون فايده لانه هادي روؤس بيضاء مش سوداء ونحذر مره تانيه الي ماعندها قدره او ايديها مش خفيفه تمشي لدكتور لان لو جرحتي روحك بتسبب اثر ردو بالكم؛؛

وبس حبيباتي بوست طويل بس حاولت انبسط ونختصر المعلومه قدر المستطاع وتكون مفيده ليكم اتمني الافاده للجميع دومتم متآلقات دآئما اااااوهبكم اموووواه

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Animated Social Media Icons by Acurax Wordpress Development Company
error: Content is protected !!