مساء الوردبنوتاتي ومداماتي المزموزات,,
اليوم بنحكي ع مشكله المسام هذا تقرير طبي من د.عمرشمس الدين لتجميل يعني كلام موثق بحقيقه علميه وطبيه؛؛
- المسامات من المشاكل الي تصيب البشره والناس ع طول ادورلها ف حلول؛؛حقيقةً انه كلنا انعانو من المسام بس الي بشرتهم دهنيه يعانو من مسام اكبر و اوضح؛؛
وحقيقه علميه مؤكده من دكاترة تجميل وجلديه انه مافيش حل نهائي وجذري للمسام لان المسام ف طبيعة بشرتنا وجينات امتاعنا؛؛ - ولكن ف بعض الحلول لتخفيف منها بس ضروري تستمرو عليها وهي:
- استخدمو غسول للبشره ب مستخلص حمض الصفصاف يعني خودو اي غسول يكون ف تركيبته مستخلص الصفصاف لان ينظف كويس البشره ويخلي المسام نظيفه ويقلل دهونكم الي توسع المسام زي غسول نيتروجينا الي لونه وردي اسمه فزيبل ديب فعلاً روعه انا مجرباته ينظف من الاعماق ومتوفر ف الصيدليات؛؛
- استعملو ماكينات التنظيف اليدويه امتاع السكراب ماشين واش الي تنظف المسام و تحول الخلايا الميته من بشرتكم الي تخلي المسام اوضح وطبعاً تستخدموها مع غسول ناعم ومره ف الاسبوع فقط؛؛
- الي بشرتها دهنيه ادير قناع الطين مره ف الاسبوع ينظف ويقلل من الدهون والحبوب؛؛
- استعملو مية الورد ف روتينكم اليوم بخو بيها وجهكم اول ماتنوضو وقبل ماترقدو وطبعاً اتكون مصقعه او حتي مكعبات ثلج ممتازه جداً تقلل من المسام وتصفي وتنور الوجه؛
- استعملو مية المعدونس بعد ما تغلوه صفوه وحطوه ف مكعبات الثلج و اول ما تنوضو مرروها ع وجهكم تعتبر تونر طبيعي ممتاز؛؛
- استعملو الشاهي الاخضر ماليشي حل ف معالجة الحبوب والمسام وهالات لان ضد التآكسد وفيه عوامل ممتازه للبشره بعد ما طيبوه صفوه وحطوه ف مكعبات ثلج ممتاز للبشره بشكل رهيب؛؛
وبس حبيباتي ان شاء لله انكون فدتكم ب بوست المسام اتمني الافادة للجميع اووهبكم امووواه
