مسائكم عسل يقطر بنوتاتي ومداماتي الحلوات
عضواتي الجميلات هذا بوست تبع البوست السابق للهالات بنقول بعض العلاجات المنزليه للهالات وانتفاخ العيون؛

1. الخيار: تاخدي خياره تقصيها شريحتين وتحطيها ف الفريز لين تتجمد وبعدها اطلعيها وتحطيها ع عيونك من 10 الي 15دقيقه تشوفي الانتعاش استمري عليها تخفف هالات الارهاق هلبا والتجاعيد وتحول الانتفاخ امتاع العيون.
2. الملعقه: الكاشيك ب الفلاقي تاخدي زوز كواشيك تغسليهم كويس وتحطيهم ف الفريز تخليهم يصقعو بعدها تحطيهم ع عيونك من الجفن التحتي وضغظ بشويه من 10/15دقيقه طبعاً هادي المفضله عندي انا نستخدم فيها خاصة لما نوض الصبح عيوني منفوخات تقول حد عاطيني بونيه ع عيني ف الكواشيك يهدو ويفشو كل الانتفاخ وتمشي الامور تمام طبعاً هي طريقه يابانيه مشهوره.
3. البطاطه: نفس طريقة الخيار تاخدي بطاطه وتقصيها شارئح وتحطيهم ف الفريز يتجمدو وطلعيها تحطيها ع عيونك من 10/15دقيقه تخفف الهالات البطاطه معروفه تمتص كل السموم حتي لما تحوليها تشوفيها سوده بجد ممتازه البطاطه للهالات والانتفاخ.
4. زيت للوز الحلو: قبل النوم تاخدي قطرتين وتدهني بيهم تحت العين بحركه عكسيه من الياليمين لليسار يعني اشارة صح مقلوبه  وفي الصبح اغسليه.
5. اوراق النعناع: اطحني ورق النعناع هو طازه وحطيه تحت عينك من 10/15دقيقه وامسحيه بقطنه نظيفه بشويه؛؛ بس طريقتي انا واخده نعناع ميبساته وطحناته زي البودره ومخلطاته ف حكة الفازلين وندهن بيه ف ليل قبل النوم تحت عيوني رهيبه بجد يا بنات تشد العين وتحسيها ولت فرش منعشه وتخفف الهالات والانتفاخ.
6. اكياس الشاهي: حطي اكياس الشاهي المستعمله ف الفريز يجمدو وحطيهم ع عيونك من 10/15دقيقه ممتازه حتي هي تحول الانتفاخ والاستمرار عليها تخفف الهالات.
7. اكياس الخضار: لو تحطو ف الخضره ف اكياس زي البازيليه والحمص وغيره تقدري اطلعيهم من الفريز تلفيهم ب فوطه وتحطيهم ع عيونك من 10/15 دقيقه.
8. مية الورد: اما تاخدي ب القطنه مية ورد تكون مصقعه وتحطيها ع عيونك من 10/15دقيقه او اديري مكعبات ثلج مية الورد وتمرريها حول العيون وطبعاً ممتاز حتي للوجه كله مية الورد.

ـ وطبعاً ضروري تكثرو من شرب الميه وتخففو من السهور قدر المستطاع؛
وبس حبيباتي دومتم بود يامزموزات اتمني الافاده للجميع اوهبكم اموووواه