مسائكم فل مفلفل حبيباتي وفلذات كبدي ههههه درت عليكم كبيده زي مايقولوا

اليوم موضوعي ع العنايه الكامله ب الاقدام اكرمكم الله يعني ح نقوللكم طريقه مبسطه جداً جداً كيف اديرو البديكير والمنيكر ف البيت ولا جميل المزينات,,

• اول شي خلوني انبهكم ع نقطه مهمه جداً جداً جداً يا بنوتاتي ومداماتي لما تمشي لآي مزين بديري بديكير للرجليك حبيباتي ترفعو عدتكم بروحكم لان عدت البديكر خاصةً اكبر مسببه للامراض الهبوتايتس بعيداً عنا فلهذا ردو بالكم وافضلكم اديروه ف البيت بروحكم مافيش حاجه صعبه؛؛
  
• شني تحتاجو للبديكير والمنيكير ساهل جداً هما:-

1. فوطه صغيره للقدمين؛؛
2. اناء (ب العاميه كروانه او سطل يكون واسع فهمتو قصدي) وفي جاهزات امتاع مساج الرجلين جاكوزي خاص ب الرجلين زي ماركة امجوي فيها وعندي منها لكن للامانه استعملته مره واحد وقاعد ملوح يسمع فيكم الحق اندير ف فكرة الكروانه اسرع وابسط ولكن لو تبو منه موجود ف محلات ميزران الي يبعو ف معدات المزينات متوفر؛؛
   
3. حجر التدليك للرجلين وفرشة تنظيف الاظافر زي الي ف الصوره بس ننصحكم انكم تاخدو الحجر الناعم الي يكون خفاف مش القاصي لان يجرح الرجل ويخليها شقوق فلهذا خودو الخفاف زي حطاته ف الصوره افضلكم ف تنظيف وانعم ع الرجل؛؛
   اما فرشة تنظيف الاظافر لو مش متوفره تستعملي بدلها فرشة الاسنان نفس الفكره بس اتكون جديده وتخصصيها فقط لتنظيف الاظافر صراحة فرشة الاسنان ديما تعاني مني لان نستخدم فيها ف استخدامات عجيبه غريبه,,
   
4. قصاصة اظافر المتعارف عليها؛؛
   
5. مبرد اظافر بس يكون من النوع الخفاف زي الصوره مش حديد لان يجرح الجلد ف الخفاف يكون الطف وافضل لبرد الاظافر؛؛
   
6. كريم ترطيب للرجلين اي نوع زي فازلين او سيباميد او بيبانتين او جلسرين اي نوع متوفر عندكم؛؛
   
7. لو مش متوفر كريم ترطيب تاخدو بدله زيت للترطيب زي زيت للافندر او زيت البيبي او زيت الياسمين او زيت اللوز الحلو هادي كلها زيوت عطريه حلوه ريحتها وتنعم الجلد متوفره ف العطريات ولو ماعندكمش مش لازم هي نقطه بديله لكريمات الترطيب؛؛

• طريقة الاستعمال:-
  تجيبو الكروانه تعبوها مية دافيه ك اساسي بس الي بتحطوه فيها هذا امر مخير ليكم اختارو الي تبوه انا كل اسبوع اندير ف حاجه مثلا؛؛
  – مرات انحط ف الميه ملح ك معقم ومطهر ومقشر طبيعي للرجلين ولو في اكياس مائيه يجففها ويعالجها؛؛
  – او مرات اندير ف الميه قطرات ليم عصري ومعاها نقطه زيت لوز حلو او زيتون عادي وطبعاً يساعد الليمون وزيت اللوز ع تبيض الرجلين وينعم الجلد ويوحد لونها وممتاز لليمون للاظافر كمقوي ليهم؛؛
  ـ او مرات ناخد نعناع نغليه نصفيه ونصب منه شويه ف الميه يساعد ع تهدئه الرجلين وينعمها وتحسيها يعطيها انتعاش حلو؛؛
  
• تحطي رجليك ف الكروانه لمدة من ربع ساعه الي نص ساعه يتنقعو كويس بعدها تاخدي الفوطه وتجففي ب الرجل وتاخدي اي مقشر عندك تجاري ولو مش متوفر بديله السكر خلطيه بشويه كريم مرطب تدهني الرجل من تحت وتبدي تدلكي في رجلك بحركه دائريه وتاخدي حجر المقشر وتدلكي بيه من تحت فقط من فوق ماديريهاش تجرحي روحك وتدلكي بحركه خفيفه وبشويه مايغركش انك تدلكي ب القوه ما تحسي بروحك لان منقعات الرجلين ب الميه السخونه فلهذا بشويه بشويه قشريهم بعد ماتكملي تقشيرهم تجي للاظوافر تدعكيهم ب الفرشه كويس وبعدها غطسي رجليك ف الكروانه مصمصيهم ب الميه وجففيهم مره تانيه؛؛
• بعدها بتجي مرحلة قص الاظافر لما تبو تقصو ظوافركم ردو بالكم اتقصوها وهي مببلوله تسببو تقصفها وتكسرها فلهذا قصو الظفر جاف ولما تبدو تقصوها يفضل بشكل مستقيم ومتساوي وتجنبو تقصوها من الاطراف بعمق لان لما بيطول الظفر تخش ف الجلد وتسبب آلم فلهذا قصوها بشكل مستقيم افضل؛؛
• بعدين تاخدو المبرد وتبردو الاظافر بشكل متساوي وزي ماقلت يفضل المبرد الي يكون ورق او خفاف مش حديد لان يجرح ف الجلد؛؛
• لو في زمالطو ع ظوافر تمسحوها ب اسيتون تاخدو قطنه وتمسحو اظافركم بعد المسح مباشرة ماتخلوش الاسيتون يتشربه الظفر تاخدو قطنه ممبلوله مية وتمسحو ع كل اظافركم من الاسيتون لان مضر ب الاظافر لو قعد ع الظفر مده طويله؛؛
• انا بنقوللكم ع طريقتي ف مسح الزمالطو اسهل واقل ضرر نمسح ف الزمالطو ع ظوافري ب الزمالطو المقوي الشفاف نحطه فوق الظفر ثواني ونمسح ع طول لو قعد باقيه ف جوانب الظفر ناخد عود اوذان ونمشي ب الاستون وبعدها ناخد قطنه نبلها ب الميه ونمشي ع كل ظفر؛؛
• اخر مرحله للرجلين تجي مهمة الترطيب رطبو ب الي يعجبكم زي ماقلت الي متوفر عندكم وضروري الترطيب يا بنات للرجل بعد السنفره او البديكير ؛؛
• بعد ما ترطبو الرجلين من فوق وتحت في لقطه ايديرو فيها الكوافيرات وهادي امر مخير ليكم طبعاً يعني نقطه مخيره وليس اساسيه ريتو الحكه امتاع الكريم الحمراء ف الصوره هادي كريم ترطيب مخلطه معاها بودرة (دم الغزال) متوفره ف العطريات تاخدو منها نقطه ع روس صوابعكم وتدهنو بيها من تحت القدم فقط تعطي منظر البيبي فوت يعني يعطيهم لون وردي حلو واللون ع راحتك ف الي يحبه قوي وف الي يحبه خفيف معناها خففي او قوي ع ذوقك؛؛؛
• والناس الي دير ف الزمالطو توا رجلك جاهزه ليه تقدري تحطي اللون الي يعجبك بعد ماتكملي تخليه ينشف وتلبسي شخشير تحمي رجليك من الجفاف والتشققات ويفضل يكون قطن يخلي الرجلين تتنفس ويمتص كل العرق؛؛
• الناس الي ما دير ف زمالطو بعد الترطيب ب 10دقايق تلبس شخشير وتخشي تنني ههه نبصر ديرو الي يريحكم؛؛
• هذا كله كم مره يستعمل ف الاسبوع مره واحده فقط ب النسبه للتقشير والسنفره حافظو كل اسبوع ديرو هكي ولله رجليكم لما يبدو يبرقو برق ونعومه خيال مع الترطيب اليومي المستمر اكيد؛؛
• ملاحظة اخيره هي انك تتجنبو لبس الكعب العالي والاحذيه الضيقه قدر المستطاع لان يضر الرجلين والظهر ولو اضطريتي تلبسيه لما تروحي لحوشك تاخدي كروانه تعبيها ميه دافيه مع ملح ح يريحك شويه ويحول الانتفاخ.
  وبس حبيبات قلبي بوست طويل شوي وتعبني كتابته بس شرح مفصل كامل للعنايه ب الاقدام اتمني الافاده للجميع دومتم مزموززززات ع طول اوهبكم امووووواه