مسائكم مبروك و عدوكم مهلوك حبيباتي وجميلاتي؛؛
حبيباتي اليوم بنتكلم ع كريم بيبانثين والفرق بين انواعه ولشني يستخدم لان هلبا عضوات يسئلوا ع الفرق وانا طبعاً ك العاده ح نوضحلكم بمختصر المفيد؛؛
- اول شي خلوني انوضحلكم فكره ع كريم بيبانثين انه بمختلف انواعه واشكاله والوانه خالي تماماً من الكرتيزون تماماً أمن ع البشره ويستخدم للكبار والصغار وحتي البيبيات عادي غير مضر بيبنانثين كريم يعيد ترميم خلايا الجلد يخفف من الهيجان وتحسس البشره ولو كان فيه طياب او الحرار ب العاميه حتي عند البيبي من البامبرز ينفع ليه يعني الكريم هذا مفيد جداً جداً انا انحبه بكل انواعه مستحيل يكمل مني اول ما يكمل ع طول نمشي نشريه سر جمال بشرتي ونظارتها وتوحيد لونها ولله يا بنات ع قد ما استعملت من ماركات عالميه من الرخيص للغالي مهما يكون نرجع لكريم بيبانثين مستحيل نستغني عليه وعندي التوب ف الترطيب سواء الخفيف او الترطيب الشديد؛؛
- انجو لأنواع البيبانثين كريم:-
- بيبانثين الي فيه خط برتقالي اسمه بيبانثين بلس هذا قوامه اثقل من الازرق بحاجه بسيطه يستخدم للجروح والتشققات المزمنه زي تشققات الرجلين او الشفايف او جفاف حلمات الصدر من الرضاعه وتقدري تستعمليه لو طلعتلك حبه ملتهبه ف وجهك كويس لحب الشباب او لو طلعلك طفح جلدي تحسس وتهيج شديد للبشره زي الي يصيرلك بعد الحلوه او الشمعه او الفتله الكريم هذا يهديه تماماً لان فيه ماده معقمه لأماكن الجروح والالتهاب والتحسس الشديد ويكون استعماله ف لليل فقط لان مافيشي حمايه من الشمس،،
- بيبانثين الي فيه خط ازرق هذا نوعه كريم قوامه خفيف جداً يستعمل لترطيب الوجه وتحت العين لتخفيف من تجاعيد والهالات مناسب جداً للبشره الدهنيه والمختلطه والعاديه بسرعه تمتصه البشره ب الاستمرار عليه يوحد لون البشره يصفيها مايخليش القشور تعرف طريق وجهك ويستخدم للكبار وللصغار عادي وينفع ك مرطب يومي للبشره مافيش اي مشكله حاليا انا امدايره منه طبعاً استخدامه يكون ف لليل فقط لان مافيش حمايه من الشمس؛؛
- بيبانتين الي فيه خط وردي هذا اثقل شي نوعه مرهم قوامه مشابه للفازلين يستعمل للبشره شديدة الجفاف وفيها قشور يقضي ع القشور تماماً تقدري تستعمليه للمرافق والرجلين الي يكون فيهم جفاف وتشققات هلبا هذا ح يرطبها ولو عندك قشور جنب الانف والفم تستعملي هذا ممتاز انا ديما نستعمل فيه وقت نبدا مزكومه خشمي يولي كله قشور حاله هو يقضي عليهم ولا كان صارلك حروق من الشمس ديري هذا او الكريم خلال اسبوع ح يختفو تماماً انا نستعمل فيه ونآكدلكم ع كل كلمه نكتب فيها لاني مجرباته شخصياً و عادي يستعمل ك مرطب يومي يكون استعماله ف لليل لان مافيشي واقي شمس؛؛
- لوشن بيبانتين الي ع اليمين شيشه الطويله هذا خاص ب الجسم لجميع انحاء الجسم من المنطقه الحساسه للايدين للرجلين لكل الجسم ممتاز ب الاستمرار عليه يفتح الجسم ويوحد اللون تجربتي معاه للوشن هذا ولله يا بنات طلعلتي حساسيه ف رجلي خلف الركبه وحالتي حاله للوشن هذا الي عالجني وحولي الحساسيه والاثر الاسود بسبب الحساسيه بجد رهيب وتمتصه البشره بسرعه يستعمل طبعاً بعد الدوش ع بشره تكون نظيفه وعادي يستعمل ك مرطب يومي؛؛
- حاجه اخيره بيبانتين كريم بكل انواعه تقدرو تستعملوه للبشره الحساسه مستحيل يتحسس منه لانها خاليه من العطر تماماً؛؛
- والي تبي تنقل المعلومه تكتب المصدر لان جهدي وكتابتي وتجربتي واسلوبي وحتي ف القوقل مافيه..
وبس حبيبات قلبي دومتم بود اتمني فدتكم بمعلومه ع جميع انواع كريمات بيبانثين ك العاده اوووهبكم امووواه
