سلسلة الإهتمام بالبشره

مسائكم ورد بنوتاتي ومداماتي حبيبات قلبي

303

  • الموضوع هذا مهم للبنوتات وللمدامات الي تسئل فيا طريقة تنظيف الوجه بطريقة صحيحه طبعاً ح نشرح عليها وع كل منتج ف الصوره وزي مانقول ديما مش ضروري تتقيدو بنفس الماركه الي عندي ولكن تاخدو الطريقه الصحيحه لتنظيف الوجه والمسام والرؤس السوداء انجو نوضحو الي ف الصوره؛؛
  1. هذا السكراب امتاعي (بلق جلق) هو منظف ومغدي ب الخوخ وغداء الملكات العسل وريحته تجنن مرات نحس ف روحي بناكله.
    طريقة استعمال السكراب او المقشر الصحيحه ضروري تركزو في كلامي لان هلبا يعطو ف طريقة غلط واصلاً استعمالهم خاطئ تماماً نخشو ف صلب الموضوع انا مصوره ايدي رقم (2) هذا السكراب فيه حبيبات لتقشير وازالة القشره الميته من الوجه والجسم تاخدي بطرف اصوابعك تحطي شويه ع الجبهه الانف الخدود والذقن وتوزعي بطرف صوابعك بحركه دائريه مساج للوجه وب الشويه ماتنزلو ع وجهكم لان بضرو ارواحكم رودو بالكم تستعملو اي ماكينة تقشير مع الاسكراب ردو بالكم لان بتزيلو الطبقه الحمايه الي عطيهانا ربي يسبب لوجهكم الخدوش والتشققات والجفاف فلهذا احذرو الاستعمال بحذر بدون عنف زايد ايوا اهو نبهتكم بعد ما نستعملو اي سكراب ضروري نصكرو المسام وهادي اهم نقطه بعد التقشير طبعاً احسن شي لقفل المسام بعد التقشير هي (ميةالورد) تونر طبيعي للبشره اما الناس الي تصكر ف مسام ب التونر اي كانت ماركته انا شخصياً ما انفضلاش لان ف الي بشرتها حساسه وجافه ممنوع عليها تستعمل التونر مانعاً باتاً حتي الي بشرتهم دهنيه مايستعملو بكثرة لان يجفف البشره ويسبب ف تششققات فلهذا مية الورد افضل ومرري ثلجة ع وجهك بعد ماتغسليه ب الميه المصقعه وً بعد اي سكراب ونصكرو مسامات نحطو كريم مرطب اي كان الامر اختياري ليكم طبعاً؛؛
  2. وفي حاجه تانيه لعملية التنظيف للوجه خاصة الي يعانو من الزيوان ورؤس سوداء وبشرتهم دهنيه هو البخار ماكينة بخار للوجه طريقة استعمالها تغمي راسك بفوطه وطبسي ع البخار دقيقتين وتحولي راسك اتنفسي وارجعي تاني لمدة ربع ساعه كافيه طبعاً براحتك الي تبي تحطيه ف ماكينه زعتر او نعناع او اكليل هذا كله كويس للبخار تستنشقه البشره وبعد ماتكملي البخار تغسلي وجهك ب المية مصقعه ثلج ومرري ثلج مية الورد حتي اتنين عادي وبعدها ديري كريمة الترطيب وردي بالك تطلعي اليوم هذاكا ولا تحطي مكياج بعد اي عملية تنظيف ب السكراب او البخار كريمة ترطيب فقط وننو؛؛
    ـ كم تستعملوه مره السكراب يستعمل فقط مره ف الاسبوع والي بشرتها حساسه كل 15 يوم تقشر بشرتها،، اما البخار بالنسبه للبشره الدهنيه يستعمل مرتين ف الشهر وللبشره العاديه او الجافه مره واحده فقط ف الشهر؛؛
  3. هادي ماكينة برش واش او تقشير هادي طريقة استخدامها الصحيحه هي تستعملوها مع غسول ناعم زي الي مصوراته ف ايدي اما رغوه زي غسول كلين كلير او جونسون او زي لوريال ردو بالكم ردو بالكم تستعملوها مع مقشر او غسول يكون فيه حبيبات خشنه سكراب زي الي انشوف فيه ف بعض الصفحات ينزلو ف طرق خاطئه تماماً يقولو نستعملو ف السكراب مع ماكينة التقشير وهذا خطآ فادح وطبعاً فايدة الماكينه انها تزيل كل الشوائب والزيوت وتنظف الوجه حلوه لتنشيط الدوره الدمويه انا ماكينتي في معها هلبا قطع امتاع مساج ونركب ف متاع الاسفنجه مش التانيه لان بشرتي صافيه ورطبه هلبا مانتحملهاش وتستعمل مره ف الاسبوع كافي ب النسبه الي بشرتها حساسه مره كل 15يوم كافي ليها وحتي هي لما نستعملوها نصكرو المسام بثلجه او مية الورد؛؛
  4. صورة الماكينة برش واش والغسولات الي تقدرو تستعملوها معاها زي ماقلنا غسول يكون ناعم مش خشن لان يضر البشره؛؛
  • معلومه سريعه ع السكراب او التقشير تقدري اديريه بمواد طبيعه بدون ماتشريه ب السكر وزيت زيتون ونص ليمه قارصه وادعكي بيها الاماكن الغامقه والخشنه زي الرجلين من تحت او الايدين يحول الطبقه الميته والقشره السمراء الي واخدتها من الشمس بس للوجه لا ماتستعملوش لليم لان في ناس تتحسس منه.

وبس سلامتكم وعافيتكم.. وكالعاده اووووهبكم امووواه..

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP Facebook Auto Publish Powered By : XYZScripts.com
Social Media Widget Powered by Acurax Web Development Company
error: Content is protected !!