سلسلة الاهتمام بالبشره

مسائكم عسل يقطر بنوتاتي ومداماتي الطرفونات؛؛

304

  • بعد ماشرحنا كيف نتعنو ب بشرتنا ف النهار توا بنقول كيف نعتنو ب بشرتنا ف لليل طبعاً البشره الصحيه والنظره والمنعشه تبي اهتمام ماتجي ب الساهل يعني بتهملي نفسك ماتحلمي ابداً ب بشره نظره وصحيه حتي ف الحلم احنا مرات نبخلو ونطنشو ع اهم شي للبشره وهو (الترطيب ثم الترطيب) يا عضواتي الكرام الترطيب هذا اهم اساس لبشره صحيه ونظره بعد التنظيف ومزايا الترطيب هو الحفاظ ع بشره ناعمه ورطبه خاليه من القشور الجفاف والسواد لان بنعطيكم معلومه مهمه شني الي يخلي بشرتنا تطلع فيها تصبغات مرات بدون سبب او فرق لون مابين الفم وف جنب الانف وهو عدم ترطيب بشرتنا الكافي ينتج عنه جفاف الجلد ثم الاسوداد او تصبغات الجلديه طبعاً فلهذا ع طول رطبو وفكوني من البخل امتاعكم ايوا؛؛
  • اهم نقطه لبشره صحيه ونظره وناعمه هي شرب الميه ثم الميه ثم الميه مهمه جداً يا بنوتاتي ومداماتي ضروري نشربو الميه طول اليوم اقل شي من 2/4لتر يومي عودو انفسكم اغصبو ارواحكم ولله ح تشوفو الفرق بشرب الميه بكثره لانها اهم عامل للترطيب البشره ونظارتها؛؛
  • توا بنشرح ع كل كريم وظيفته:
  1. الي ف صوره مية ورد واسبونج صغيرونات انا مانستعملش ف القطن نستعمل ف الاسفنجات هادي ارطب للبشره ومريحتي لان مرات القطن يتحسس منها بشرتي ومية الورد اساسيه ف حياتي لو تركزو ذكرتها ف عنايتي الصباحيه وتوا ف المسائيه قبل مانرقد نبخ وجهي بمية الورد نطبطب ب الاسفنجه لين تمتصها بشرتي بعدها نخش ف مرحلة الترطيب؛؛
  2. كريم ترطيب ليلي بفيتامين e من بدي شوب ترطيب حلو قوامه خفيف وتمتصه البشره بسرعه ويعطي اشراقه للوجه لان بفيتامين eمفيد للبشره ويعطي حيويه؛؛
  3. كريمة ترطيب ليلي من ماركة لونا الماركة هادي معروفه ب المرطبات وكريمات الترطيب للوجه والجسم والشفايف طبعاً الي ف صوره هادي تقدري تستعمليها لكل الجسم ترطيبها عالي وقوامها ثقيل لانها بزبدة الكاكاو وزبدة الشيا؛؛
  4. كريمة لوريال ليلي قويه ع بشرتي وتناسب الي مافوق 30سنه لان زي ما مكتوب عليها تحارب التجاعيد ومزيج من 10 عوامل متعدده ضد تقدم سن البشره انا لان بشرتي صافيه ورطبه ف حسيتها قويه ع بشرتي معاش استعملتها؛؛
  5. كريمة ترطيب للعيون من ماركة نوكس هادي ماركة معروفه ب الاعشاب وطبيعيه صرف مهتمه للعنايه ب البشره فقط ك تجربتي للكريم حلوه تريح العين وتخفف من الهالات ولكن تبي استمرار عليها؛؛
  6. هادي مرهم فوسيدين المعروفه عندنا ب(الاسد) طبعاً هي مضاد حيوي انقوللكم كيف نستعملها يعني لو طلعتلي حبه مزعجه نحطه عليها لانها مضاد حيوي تقتل اي بكتريا او نستعمل لما يكون عندي جفاف هلبا وقشور بسبب الصقع تحت الانف او حول الفم ندهن منها شويه وتقضي عليهم تماما وتقدرو تستعملوهًا بعد الحلوه او الفتله وخودو الي شكلها زي الصوره خطها اورنج لانها خاليه من الكرتيزون؛؛
  7. كريم ومرهم بيبانتين الحب هادي حبيبة قلبي ف الترطيب ع قد ما استعملت من ماركات ب الهبل بس هادي هي التوب عندي ف الترطيب وغير مضره للبشره ابداً لانها خاليه من الكرتزون تماماً وطبعاً المرهم ترطيبه عالي جداً اعلا من الكريم يعني اصحاب البشره الجافه يستعملو المرهم اما الدهنيه يكتفو بترطيب الكريم؛؛
  8. هادم كريمات لترطيب الشفايف منها ماركة بودي شوب ولونا ومرهم خاص لترطيب الشفايف وبدي بوكس ترطيبهم حلو وعادي مرات نستعمل ف بيبانتين لان ترطيبها قوي وغير مضره؛؛
  9. زيت لوز الحلو ممتاز للترطيب هذا للناس الي اتقول ماعنديش اي كريم للترطيب ودير ف السبل الزايده مش تهرب ماترطب بشرتها لانها باخله انا زابطتكم ماعندكم وين تهربو مني عادي تقدرو ترطبو بشرتكم بزيت للوز وترطيب عالي جداً جدا وفوائده عديده لان للوز ف تركيبته فيتامين eطبيعي وفوائد فيتامين eلاتحصي ولاتعد استعماله ف لليل حتي الضي مايبيش لان اي زيت للترطيب ع طول يتفاعل مع حرارة الضوء يعني ترطبو من هنا طفو الضي وننو من هنا سواء هو او زيت الزيتون ممتاز ف الترطيب ويعطي لمعه للوجه وبس.

هاهاها ادهشت سلامتكم وعافيتكم اووووهبكم امووواه؛؛؛

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Customized Social Media Icons from Acurax Digital Marketing Agency
error: Content is protected !!