سلسلة الاهتمام بالبشره

مسائكم طيب بنوتاتي ومداماتي المزموزات
كيف نعتنو ب وجه مشرق و صافي وخالي من الشحوب بنتكلم انا ع الغسولات الي جربتها وطريقة غسل الوجه الصحيحه بدون ما نسببو اي اذي او ضرر لوجهنا..

306

  • قبل اي غسول او صابون او منظف زي ماقلنا المية المصقعه هي الاساس لغسل وجهنا شتاء او صيف لان فايدتها كبيره للوجه؛؛
  1. الحافظه الي ف صوره رقم واحد هادي عباره عن صابون دوف +مية الورد+قطرتين زيت للوز طبعا انا مدايرتها خلطتي ف الحوش نبشر الصابون الدوف ف صونيه ونصب عليه قطرتين مية ورد ونحطه ف ميكرويف يذوب نطلع نحركه ب الكاشيك ونصب عليه مية الورد عادي ع حسب رغبتك ف الكميه لكن انا نصب ف كمية كبيره لان يشرب الصابون بعدين وانا انحبه سايل شويه زي الكريمه ونحط عليه قطرتين زيت لوز لو ماعندكش مش لازم امر مخير ليك وطبعاً هذا نغسل بيه اول مانوض من النوم الصبح وهذا اساسي ف روتيني اليومي اساسي فايدة الخلطه هادي يمنع اي حبوب ويصفي البشره ويحول اي تصبغات وتحسي بشرتك نظره؛؛
  2. غسول كلين كلير من جونسون هذا غسول رغوه يعني لطيف ع الوجه يمنع ظهور الحب ومنظف بعمق بدون مايسبب اي جفاف للوجه استعمالي ليه مش كل يوم يعني ع حسب بشرتي مرات لما نروح للبيت من الخدمه نمسح وجهي بمية الورد ونغسل بيه هو الطف من الصابون او قبل مانرقد بس الي بشرتها جافه ماتغسلش وجهه كل يوم ب غسولات او منظفات لان يجففها اكثر؛؛
  3. غسول رغوة جونسون منظف للوجه وعجبني هلبا ما يجفف البشره ب العكس ينظف الوجه ويرطبه وحتي هو استعمالي ليه مش كل يوم ع حسب مناخ بشرتي؛؛
  4. جل منظف من جونسون هذا جل موازن للبشره يعني للبشره الدهنيه والمختلطه ورهيب طبعاً الي بشرتها جافه مش لازم تاخد منه ولكن للعلم انا بشرتي عاديه لمختلطه مرات واخداته نستعمل فيه قبل المكياج يعني مرات تبدا جيهة الانف والذقن والجبهه زيوت ف انا نستعمل فيه قبل المكياج ع خاطر للقطه هادي يعني استعمالي ليه مش كل يوم حتي هو ع حسب مناخ بشرتي؛؛
  5. جل منظف المنظف من لوريال يزيل الشوائب ويريح البشره وينظفها هو جل مناسب للبشره الجافه والحساسه لان خالي تماماً من العطور استعمالي ليه ع حسب مناخ بشرتي مرات انحسها شاحبه وجافه نستعمله؛؛
  • حبيباتي نتمني فدتكم ببعض المنتجات الي مجربتها تقريباً اذكرت جميع انواع البشره والي يناسبها ومش شرط تاخدو زي الي عندي بس عرفتكم لكل بشره ليها نوع خاص من المنظفات سواء دهنيه مختلطه او جافه انا ناخد ف الغسولات ونستعمل فيهم ع حسب مناخ بشرتي بس مش اساسيات استعمالهم وطبعاً الماركات مخيره ليكم انا اكثر شي نستخدم ف الماركات الطبيه وتكون خفيفه ع البشره لان انا بشرتي صافيه وخاليه تماماً من العيوب الحمدالله اغلب ماركات غسولات هي جونسون لان الطف شي للبشره قريبه لبشرة البيبي وعندكم ماركات طبيه ممتازه خاصة الي بشرتها تعبانه اتفيديها منها؛؛ كلارنس. كلينيك. ايفنت. نوكس. سيفر. كيوڤي هادي كلها ماركات معروفه وطبيه ومنتجاتها مضمونه للبشره بدون اي خوف؛؛

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Customized Social Media Icons from Acurax Digital Marketing Agency
error: Content is protected !!